Dios appamejitquiscama Job
(38.1—42.6)1 Aptomjac nic nat Dios Apyimtalhnamo apcanya Job nipyesicsa yatepiyam:
2 ¿Soc enlhit qui? Aptomjac apyasquiyam sicpayvam, mepqui apyascamco.
3 Ipenacsojo sat lhip. Ivascap sat lhip, yoyam jeyatingmojo silmalhnaycam lhip.
4 ¿Co laa apnaclha lhip, naysicsa silantipquiscama siclhoc nat as nalhpop? ¿Apyasamco ya lhquip? Jeltimnas quilhvoc anco.
5 ¿Soc nat aplhanma acvamlha acyivey collanalhcac as nalhpop? ¿Soc nat enlhit apmopvan esavojo elyipsitic?
6 ¿Apyasamco ya lhquip acyitnaclha avjac as nalhpop? ¿Soc nat enlhit appicanma mataymong acyivey, avjac as nalhpop?
7 Apquilminaycmasquic nat apyová apyivey najan apyová aplhamoclhojo. Apquilitsovasoc nat silasinancama apnaycam netin.
8 ¿Soc nat enlhit apquillanay nicja acyitnamaclha yingmin acvanyam, actiyapma siclhoc nat co congne?
9 Coo nac ayinyema. Sillanay nat yipjopay malha ayalomalhca. Tiyam etin malha ayalomalhca ayitcoc.
10 Coo nat ayinyema. Sillanay nelha yingmin acvanyam, malha siyapayclha atong.
11 Coo nat ayinyema sicpayvam: Quip aso actomjaclha nelha, covanquejec colyeycaja alyayajayam.
12 Naysicsa aptiyascam alhta lhip, aptomja ya lhquip apcanya: ¿Acmopayam congne, cotsasquis sat olhma?
13 Cotalhcac ayitsayolhma lhalhma anco, elinyajamcoc sat apquilmapsomcaa, ¿aptomja ya lhquip apcanya?
14 Injapec anco as nalhpop, malha yelpa. Malha apava acma aptalhamavo intomjac.
15 Melvityejec ayitsayolhma enlhit apquilmapsomcaa. Comascoc sat apquilmopvan.
16 ¿Apvita ya lhquip ayinyemaclha yingmin acvanyam? ¿Aptiyasam ya lhquip ayaptovnilha yingmin acvanyam?
17 ¿Apvita ya lhquip atong alyascamaclha ingjangaoc, yatesaclhilhma acvanyam?
18 ¿Apyasamco ya lhquip acvamlha nelha as nalhpop? ¿Apyasamco ya lhquip aclhamoclhojo asoc? Jeltimnas quilhvo nac jay.
19 ¿Apyasamco ya lhquip ayinyemayaclha ayitsay, najan ayinyemayaclha yatescamalhma?
20 ¿Apvanqui ya lhquip evomsic lhalhma anco? ¿Apvanqui ya etajicsojo?
21 Incaymalhquic lhip eyasamcojo aptomjaclha apvanyam. Nanoc aptiyaycamlha lhip.
22 ¿Apvita ya lhquip tingma apyivey, acyitnamaclha yingmin alyayem najan piyam?
23 Ongvapajacsic mataa sicvita inlhojo apquillingaycamco acyimtalhnama. Sicvita inlhojo apquilimpocjay enlhit, najan apquilnapomacpilha enlhit.
24 ¿Co laa acpayjo amay actiyapmaclha acnim? ¿Najan ayinyemayaclha alhcajayam?
25 ¿Soc enlhit apquillanay yingmin atamnic acmamay? ¿Aptimesquiscama tacja?
26 ¿Soc nat aptimesquiscama acmamay yoclhilhma acyamayolhma, mepqui lha tingma?
27 Cotnejic mataa acyesolhma lhopactic, coticteypoc paat alyimseleycaoc.
28 ¿Apne ya acmamay inyap najan yalya inyap?
29 Impalacmec yingmin alyayem najan piyam. ¿Co laa acvisay inyapmoc acpalescama?
30 Cayjec actomjayclho yingmin, malha mataymong. Najan maa yingmin acvanyam.
31 ¿Apvanqui ya lhquip ingyansiclha apyova Pléyades? ¿Apvanqui ya elcoc apyová Orión?
32 ¿Apvanqui ya lhquip etipsic ayitsay alhtoo? ¿Apvanqui ya lhquip elhingsic apyová apvisay Osa Mayor najan apvisay Osa Menor?
33 ¿Apyasamco ya lhquip aclhamoclhojo altemaclha acnaycaoc netin najan alinyema netin, yoyam ongvita as nalhpop?
34 ¿Apvanqui ha lhquip ingyanic yipjopay, yoyam comamá?
35 ¿Inquilyajaclho ya tacja, apcanya inlhojo lhip, yoyam colyinmam?
36 ¿Co laa ayinyema acyascamco nata navjac Ibis najan tataa inquinavo ayevam acmamay?
37 ¿Apvanqui ya lhquip elyipsitic, acvamlha yipjopay maa netin? ¿Soc enlhit apmopvan etnesquisic acmamay?
38 Lhopactic acyamay cotniclhac sat acyimnatem, malha mataymong.
39 ¿Aptingyascasqui ya lhquip actom yamacmeyva inyapmoc, yoyam colpasmiclha actoycaoc ayitcavoc?
40 ¿Apvita inlhojo lhip alyanca acyilhanmomaclha malhic najan yamit acmampanac?
41 ¿Co laa ayinyema aptoycaoc mama apquitcoc naysicsa mayic alnapma? Selmalhnaycam coo naysicsa apquilpáyvam, yoyam otingyasquisic aptoycaoc — nic nat aptomjac Dios.
© © Biblia en Enhlet (Lengua Norte) © Paraguayan Bible Society, 1995.
