1 Ningyasamcoc nincoo yoyam ongilmasquingvomoc sat. Comascoc sat actemaclha ningyovoclhojo, malha tingma acyavataclhojo ningma congne. Appenasoc Dios maa netin singillanesquiscama tingma ingac apquilmilaneycaoc. Jave enlhit apquillanay as tingma. 2 Naso, ningiliclhangvec nincoo mataa naysicsa ningileyvam as nalhpop. Ningiltamjoc nincoo ongvitac tingma ingac maa netin. 3 Malha ningilantalhnayclha apava sat cotnejic yoyam ongiltimjic nincoo mepqui ningilalhnayo. 4 Yimtilhec mataa ingvalhoc, inyiplovcoc najan ningiliclhangvom naysicsa ningileyvam as nalhpop. Am ongiltamjo inyicje ongilmasquingvomoc, malha coyoyam ongiljalhyovacsic ningilantalhnama apquinyema nalhpop. Ningiltamjo inyicje ongiltimiclha ingjalhnancaoc, malha ningilantalhnayclha apava apjalhnancoc apquinyema netin. Comascoc sat ningyovoclhojo yoyam ongvitac sat acyimnatem ingnenyic cotmongvoycamlha nelha. 5 Dios aptomja singillanesquiscama yoyam ongvita as asoc. Appiquinquic ingvalhoc Espíritu Santo actomja ningillhoy amamyi. Ongillhovac sat mocjam tap cotlaycaoc asoc.
6 Am ongilvatescacmoc mataa mongilyasquiyam. Ningyasamcoc nincoo: Am ongilvocmoc mocjam ningaoclha alhnancoc apnaclha Visqui ingac naysicsa ningileyvam mocjam as nalhpop. 7 Ningileyvec nincoo acyiplomo mongyasquiyam naysicsa mongvitay mocjam asoc yoyam colvac sat. 8 Am ongilvatescacmoc mataa mongilyasquiyam. Ningiltamjo inyicje ongyinyoc ningyovoclhojo as nalhpop yoyam ongnam sat apcaoclha Visqui ingac cotmongvoycamlha nelha. 9 Ningilinlhanacmec mataa ningyiplovquiscama yoyam jingilyispac Visqui ingac. Ningileyvec sat ancoc mocjam as nalhpop, inlhoyqui laa onlhic sat apnaclha Visqui ingac, ningiltamjoc yoyam jingilyispac Visqui ingac. 10 Incaymalhquic nincoo ningilanalhco ongilvoclha apnaclha Cristo apna netin aptajanem singyicpilquemoclha. Moclhama enlhit ellhovac sat acyanmongam ayinyema actamila apquiltemaclha naysicsa apquileyvam. Poc sat elvita acyanmongayclha ayinyema apquiltemaclha acmasom naysicsa apquileyvam as nalhpop.
Actemaclha actamilaycam ingvalhoc
11 Ningyasamcoc nincoo as asoc. Yitnec najan ayay ingvalhoc napato Visqui ingac. Eycaso ayinyema ningilinlhanyacmo yoyam colmoc apquilvalhoc enlhitaoc Dios appayvam. Apyasamcoc Dios actemaclha ingvalhoc ingac. Apquilyasamcoc quellhip lha sictemaclha coo ayinyema acyascamco anco apquilvalhoc. 12 Am ongiltamjoc ongilyimtalhnesalhcojo inganco nipyesicsa quellhip. Ningiltamjoc yoyam eltimjic singilpasmeyquiclha nincoo. Yoyam najan melvajaniclhojo quellhip enlhitaoc apquiltomja apquillhenomacpo apanco mepqui actamilaycam apquilvalhoc. 13 Apquilanayquic mataa napocja enlhitaoc ongiltomja ayanem. Cotnejic ac maa, ongilanam sat nincoo Dios. Am sat ancoc ongiltomjac ayanem, ongilanam sat quellhip. 14 Actomjac coo silanya quellhip: Singasicjayo ayinyema Cristo actomja singyimnatescama. Inlhenquic mataa ingvalhoc nincoo: Lhama aptomja apquitsepma acyanmongam aplhamoclhojo enlhitaoc. Eycaso ayinyema apquiltomja malha apquilitsepma lhama Cristo aplhamoclhojo enlhitaoc. 15 Apquitsepquic alhta Cristo acyanmongam aplhamoclhojo enlhitaoc yoyam ongilanam Cristo ningiltomja ingjalhnancaoc. Ayinyemaclha apquitsepquic alhta najan aplhaticjangvocmec alhta Cristo singyanmongam. Mongvanquejec mocjam ongilanam inganco. 16 Am colhenac mataa ingilvalhoc actemaclha apyimpejic enlhit aptomja ningvitay. Am najan colhenac mataa ingilvalhoc actemaclha apyimpejic Cristo ningvitay alhta naysicsa aptiyascam. 17 Ningiltomjac sat ancoc ningilpasmeyquiclha Cristo, ongiltimjic sat ingjalhnancaoc. Inmasquec nintemaclha nano, ingjalhnancaoc ningiltomjaclha.
18 Eycaso ayinyema aptimesquiscama Dios aptomja singasicjayclho mocjam ayinyema Cristo. Ingilasinaquic nincoo Dios, yoyam ongilpayecsic as amyaa actemaclha singasicjayclho mocjam. 19 Dios aptomja aptimesquiscama apcasicjayclho aplhamoclhojo enlhitaoc lhalhma anco ayinyema Cristo. Am alhta elyipsatac Dios melyascalhma enlhitaoc. Ingilasinaquic nincoo yoyam ongilpayecsic as amyaa actemaclha singasicjayclho mocjam. 20 Quilhvoc ningiltomja ningilsoycam amyaa ningilapajasomalhca ayinyema Cristo. Ningiltimnasquic nincoo actemaclha singanama Dios yoyam ongiltimnacsic quellhip. Najan actemaclha singanama Cristo yoyam ongiltimnacsic quellhip: Elane sat colhic actimesa actamilaycam apquilvalhoc napato Dios. 21 Am coyitnac lhama meyascalhma Cristo. Dios aptomja appatimquiscama Cristo mongilyascalhma nincoo. Yoyam jingiltimesquisic ningilpeyvomo ayinyema ninpasmeyquiclha Cristo.
© © Biblia en Enhlet (Lengua Norte) © Paraguayan Bible Society, 1995.
