Actemaclha ningayo Visqui
1 Otnejic sat siyayo Visqui ingac ayinyema evalhoc coo.
Cotnejic sat evalhoc ayayo apvisay acponquinomalhca.
2 Otnejic sat siyayo Visqui ingac najan evalhoc.
Mejelvoncamejec sat seyaycaoc altamila.
3 Visqui ingac aptomja apmascoscama molyascalhma.
Aptomja setamilquisquiyam acmasca eyimpejic.
4 Jemyoc sat naysicsa yoyam ongvitsapoc.
Aptomja seyasicjayclha mocjam, seyimlayquiclho.
5 Aptomja seyaycaoc asoc altamila, yoyam oyipcanmojo.
Jetnescasiclhac sat mocjam eyitcoc, malha mama apvinatem aptolhnaycam netin.
6 Visqui ingac aptomja acpeyvomo singyicpilquemo.
Apyasamcoc ayinyemayaclha apquillingaycamco enlhit.
7 Apyascasingvocmec nic nat actemaclha aptamjaycam simpilapquiscama.
Apnaclha Moisés najan napatavo enlhitaoc Israel.
8 Singasicjayo aptomja Visqui ingac najan aptamila.
Actamilaycam apvalhoc najan singasicjayclha.
9 Comascoc sat aplom najan actemaclha aclom apvalhoc.
10 Am alhta eyanmoncasiclhac nintemaclha acmasom najan nintemaclha mongilyascalhma.
11 Avanjec anco singilasicjayo ningiltomja ningayo.
Malha acvoyacmo nitnoc anco tap yipjopay.
12 Mocjay anco apquilhac mongilyascalhma, malha acvoyacmo actiyapmaclha acnim najan actalhningvamlha acnim.
13 Avanjec anco singilasicjayo ningiltomja ningilayo.
Malha apyap apquilasicjayo apquitquic.
14 Apyasamcoc Visqui ingac actemaclha ningyovoclhojo.
Apyasamcoc ningilinyemayaclha lhopactic.
15 Malha paat ayimja amyip intomjac ningileyvam.
Malha ilhnamoc ayimja amyip.
16 Inquilhcajacmec alhcajayam, inmasquingvocmec ningvitay.
Am ongilyasamcoc ayimjaclha alhta ilhnamoc.
17 Comasquejec sat mataa actemaclha singilasicjayo ningiltomja ningilayo Visqui ingac.
Comasquejec sat mataa aptemaclha acpeyvomo nintamin sat cotmongvoycamlha nelha.
18 Ningyiplovcasquic mataa actemaclha apmayjayoclha.
Ningilyajaclhoc mataa actemaclha singanamaclha.
19 Netin appiquenac Visqui ingac aptajanem apanco.
Aptomja Apvisqui netin najan as nalhpop.
20 Quellhip ángeles, eltime sat apquilayo Visqui.
Apquiltomja apquilyajayquiclho apcanamaclha Visqui ingac.
21 Quellhip apquilasinancama appintalhnama.
Eltime sat apquilayo apquiltomja apquilyiplovquiscama apmayjayoclha.
22 Eltime sat apquilayo quellhip apquileyvam lhalhma anco.
Najan aclhamoclhojo asoc alantipsomalhca as nalhpop.
Coltime sat alayo Visqui ingac.
Otnejic sat coo siyayo Visqui ingac.
© © Biblia en Enhlet (Lengua Norte) © Paraguayan Bible Society, 1995.
