Acnim apcasicjayquiclha mocjam Dios
1 Yitnec nic nat mocjam appayvam Dios, apquillhenacpo Aarón apquitquic apquilitsepma naysicsa apquilyoyquiclha apmaclha Dios. 2 Aptomjac nic nat Dios apcanya Moisés:
Ingyane sat lhip Aarón metalhningvotayc sat sicmaclha coo tap apava apjalhtamomap, payjoc acyitnamaclha ayapma atong yamit aysicsic acyitnamaclha Dios appayvam, ingyitsapoc sat maa. Evanquic coo ongvanic etalhningvota sicmaclha, olhicmocsic sat sicmayjayoclha ajanco naysicsa yipjopay tacjalhit yamit aysicsic acyitnamaclha Dios appayvam. 3 Incaymalhquic Aarón etalhningvota santuario acponquinomalhca acyiplomo vayqui inquinavo macmescama Dios acyanmongam melyascalhma, najan acyiplomo nipquesic apquinavo actemaclha macmescama Dios malvatnama talha. 4 Incaymalhquic Aarón eyapacsic yingmin apyimpejic. Natamin etalhniclhac sat apava aptalhnama túnica de lino, najan calzoncillos de lino, najan apyapmam cinturón, najan appocanma turbante, apvisay apava apponquinomap apquilantalhnama Aarón.
5 Etingyac sat Aarón apcanit yataay apquilinava apnatoscama israelitas, actemaclha macmescama Dios acyanmongam melyascalhma, najan lhama nipquesic apquinavo macmescama Dios actemaclha holocausto malvatnama talha. 6 Ingyajic sat vayqui inquinavo macmescama Dios acyanmongam meyascalhma apanco Aarón. Colhic sat acmoscosa meyascalhma apanco Aarón najan melyascalhma apancaoc apquilmolhama familia. 7 Natamin etingyac sat Aarón apcanit yataay apquilinava, payjoc apatong carpa apponquinomap, etnejic sat macmescama Dios. 8 Colhic sat actovasa (actingyasa) sicas suerte: lhama yataay ematong sat macmescama Dios, poc yataay colhic sat ayapajasa yoclhilhma actamopeycaoc (Azazel). 9 Etnejic sat Aarón lhama yataay apquinavo macmescama Dios, ayinyema sicas suerte, ematong sat acyanmongam meyascalhma. 10 Etnejic sat Aarón poc yataay apquinavo macmescama Dios mepqui apmatnam, colhic sat acmascosa melyascalhma, ingyapajacsic sat yoclhilhma actamopeycaoc, apnaclha Azazel.
11 Etingyac sat Aarón vayqui ayitcoc macmescama Dios, yoyam colhic acmascosa meyascalhma apanco, najan melyascalhma apancaoc apquilmolhama familia. 12 Natamin emoc sat atilh avalhoc asoc payjem. Atilh ayinyema netin altar apquilvatnamaclha, emoc sat najan anit apyacvom apmic asoc acmasis anic, esaclhac sat tap apava apjalhtamomap. 13 Epalacsic sat asoc acmasis anic naysicsa atilh, cotyapoc etin. Cotnejic sat etin ayinyema asoc acmasis, malha ayapma tapa yamit aysicsic acyitnamaclha Dios appayvam. Mengyitsepejec sat maa Aarón. 14 Elcoc sat Aarón ayitcoc ema ac vayqui inquinavo, ingyilhpajac sat tapa atong yamit aysicsic, nicja payjoc actiyapmaclha acnim. Etnejic sat apopjejic congne ema ac ayitcoc, ingyilhpajac sat siete veces nalhpop payjoc tapa atong yamit aysicsic. 15 Natamin ingyajic sat Aarón lhama yataay apquinavo macmescama Dios acyanmongam melyascalhma enlhitaoc, esaclhac sat ema pac tap apava apjalhtamomap, ingyilhpajac sat netin tapa najan nalhpop payjoc tapa atong yamit aysicsic, acno apquilhpajay siclho ema ac vayqui inquinavo. 16 Cotniclhac sat mocjam santuario mepqui actanovmalhca napato Dios, ayinyema melyascalhma najan apquiltemaclha apancaoc enlhitaoc israelitas. Cotniclhac sat mocjam carpa apponquinomap mepqui aptanovmap napato Dios, ayinyema apquiltemaclha apancaoc enlhit, apyitna inlhojo carpa apponquinomap nipyesicsa as enlhitaoc.
17 Incaymalhquic Aarón aplhapco etlhic congne santuario, mepqui poc aplhalhma acvaycmo aptiyapma mocjam, colhic sat acmascosa melyascalhma apancaoc enlhit. Inmascosalhquic sat ancoc meyascalhma apanco Aarón, najan melyascalhma apquilmolhama familia, najan melyascalhma apyovoclhojo enlhitaoc. 18 Natamin etyapoc sat mocjam, emyaclhac sat acyitnamaclha altar apquilvatnamaclha. Elcoc sat ayitcoc ema ac vayqui inquinavo najan ema pac yataay apquinavo, eltilhnamcoc sat inquipetaoc altar najan niyava altar. 19 Etnejic sat apopjejic congne ema, ingyilhpajac sat siete veces altar apquilvatnamaclha. Cotniclhac sat mocjam altar mepqui actanovmalhca napato Dios. Ayinyema siclho actanovmalhca altar apquiltemaclha melyascalhma israelitas.
20 Appenasquic sat ancoc Aarón santuario, najan carpa apponquinomap, najan altar apquilvatnamaclha. Ingyanic sat colhic acyantamenta yataay apjalhnancoc. 21 Appiquinquic apmeoc netin apcatic yataay, elhenic sat melyascalhma apancaoc enlhitaoc, najan apquiltemaclha apancaoc almasomcaa. Coytic sat netin apcatic yataay acyovoclhojo acmasom najan melyascalhma enlhitaoc. Eyantemiclhac sat lhama enlhit as yataay yoclhilhma actamopeycaoc. 22 Elhnanmoc sat yataay, aptomja apsoycam (appatmeycam) melyascalhma apancaoc enlhitaoc, payjoc mepqui apquileyvomaclha enlhit.
23 Etlhic sat mocjam Aarón congne carpa apponquinomap, eljalhyovacsic sat apquilantalhnama, eytic sat as apava congne santuario. 24 Eyapacsic sat yingmin apyimpejic Aarón, etalhniclhac sat mocjam apava sacerdote, etingyac sat apnatoscama macmescama Dios actemaclha holocausto malvatnama talha, najan poc aptoscama macmescama Dios acyanmongam melyascalhma enlhitaoc. Colhic sat acmascosa meyascalhma apanco najan melyascalhma enlhitaoc. 25 Colhic sat alvatna talha aptipilhmoc netin altar apquilvatnamaclha. 26 Incaymalhquic enlhit apyantamayclha yataay yoclhilhma actamopeycaoc Azazel (emoc sat Azazel), incaymalhquic eyimyecsic apava apquilantalhnama, eyapacsic sat yingmin apyimpejic, natamin etlhic sat mocjam carpa tingma nipyesicsa apnaymacoc.
27 Apitic ayaymomalhca vayqui inquinavo najan nipquesic apquinavo macmescama Dios acyanmongam melyascalhma, najan ema apsayclha congne santuario, yoyam colmascosalhcac sat melyascalhma, cotlhalhcac sat tap carpa tingma, najan ayimpejic, najan apitic najan ayi, colhic sat alvatna talha. 28 Enlhit apquilvatnama talha eyimyecsic sat apava, najan eyapacsic yingmin apyimpejic, natamin etlhic sat mocjam carpa tingma nipyesicsa apnaymacoc — nic nat aptomjac.
29 Comasquejec sat mataa as singanamaclha nipyesicsa quellhip: vocmec sat ancoc diez acnim najan séptimo piltin ellanac sat fiesta quellhip. Noeltovaoc nasa quellhip as acnim, paj najan metnaja israelitas, noeltamjam nasa quellhip. 30 Colhic sat acmascosa melyascalhma quellhip, mepqui apquiltanovmap napato Dios cotnejic sat as acnim. 31 Comasquejec sat mataa singanamaclha: Acvisay acnim ninnayclhilha quellhip, acnim mepqui apquiltamjaycam, najan acnim mepqui aptoycaoc quellhip. 32 Etnesam sat sacerdote apponquinomap niptamin apyap ninga, colhic sat acmoscosa melyascalhma enlhitaoc. Etalhniclhac sat apava lino apquilantalhnama as acnim. 33 Etlhic sat congne santísimo apponquinomap, najan carpa apponquinomap, najan altar apquilvatnamaclha, colhic sat acmascosa actanovmalhca napato Dios, colhic sat najan acmascosa melyascalhma sacerdotes najan melyascalhma apyovoclhojo enlhitaoc comunidad.
34 Comasquejec sat mataa singanamaclha: Acvisay fiesta una vez al año, colhic acmascosa melyascalhma apancaoc apyovoclhojo israelitas.
Apquilyajaclhoc nic nat Aarón, acno apcanama siclho Dios napato Moisés.
© © Biblia en Enhlet (Lengua Norte) © Paraguayan Bible Society, 1995.
