Actemaclha ningayo Dios
(Sal 70)1 Alinlhanacmec coo siljalhanma Visqui ingac.
Apjalhnoc alhta silmalhnancama yoyam jepasmoc.
2 Avanjec alhta siclhinganyam.
Malha sictolhnay acpatyapma.
Elicasquic alhta Visqui ingac aptomja semasma.
Elhnesquic alhta netin mataymong, yoyam ongvimpeclha mocjam.
3 Etnescasquic alhta yoyam omnaycmacsic actemaclha alhnancoc.
Otnejic sat siyayo Dios Visqui ingac naysicsa sicminaycmascama.
Ellingac sat enlhitaoc, cotlapsic sat maa.
Melyasamquejec sat aptomjaclha Visqui ingac.
4 Ningilinyejemo nincoo ningiltomja mongyasquiyam Visqui ingac.
Mepqui nintingyey quilaycmasquiscama.
Mepqui ningyiplovquiscama movan amyaa.
5 Dios Visqui ingac.
Aplhamaseclhec lhip aptamjaycam simpilapquiscama.
Singiltimnascama aptemaclha singmasma apyimtalhnamo, am elhno poc.
Altamjo inyicje olngacsic aclhamoclhojo.
Movanqueje inyicje osavojo.
6 Am eyispac mataa lhip macmescama nintom najan ninatoscama.
Am eyispac mataa lhip macmescama acticyovam acyanmongam mongilyascalhma.
Ejaycaoc innac coo yoyam ongvaylhojo lhip.
7 Actomjac coo siyanya lhip:
—Jelanojo coo.
Yitnec vaycajac singanamaclha actalhesamalhca selhanma coo (yavamlha otnejic) — alhta actomjac coo.
8 Dios Visqui ajac.
Pac oyiplovcasojo lhip apmayjayoclha.
Yitnec evalhoc coo lhip singanamaclha.
9 Aclingasquic coo aptemaclha singmasma napatavo enaymacoc, lhip apnaymacoc.
Am olvatasac mataa siclingascama.
Apyasamcoc lhip Visqui ingac.
10 Aclingasquic coo aptemaclha acpeyvomo.
Mepqui sicposcama evalhoc coo.
Aclingasquic coo aptemaclha singasicjayo najan singvomquiscama tap.
Am alhta omyavac mataa amyaa actomja nasoc anco napatavo enaymacoc.
11 Lhip Visqui ajac. Nomyov nasa singaycaoc lhip.
Omyovalhcac sat mataa ayinyema lhip singaycaoc.
Ayinyema lhip singasicjayo.
12 Avanjec mataa siclingaycamco acmasom.
Movanquejec olyipsitic.
Avanjec mataa sictemaclha ajanco.
Movanquejec olyipsitic.
Cotningvoyam nelha sictemaclha ajanco.
Inquilvatasquic mataa evalhoc coo.
13 Visqui ajac. Jevomquis tap coo.
Visqui ajac. Jepasingvota quilhvo nac jay.
14 Ilane sat elmancangvomoc selinmelhaycam.
Enatovasacpoc sat maa.
Elinyajamcoc sat acyiplomo apquilmancactama apquiltomja selinmelhaycam.
15 Elinyajamcoc sat acyiplomo apquilmancactama apquiltomja selasmescama.
16 Colpayjiclhac sat apquilvalhoc aplhamoclhojo apnaymacoc apquilpeyvomo.
Eltimjic sat apquillingascama actamilaycam apquilvalhoc:
—Apyimtalhnamo nac Visqui ingac — sat eltimjic.
17 Visqui ingac aptomja semasma coo naysicsa mepqui coo.
Lhip nac sepasmom najan sevomquiscama tap.
Dios Visqui ingac. Jepasingvota quilhvo nac jay.
© © Biblia en Enhlet (Lengua Norte) © Paraguayan Bible Society, 1995.
