Job napato Dios
1-2 Aptomjac nic nat Job apcanya Dios: Acyasamcoc coo apmopvan apanco lhip, ellanac aclhamoclhojo asoc lhalhma anco.
3 Movanquejec coo oyascomoc lhip apyimtalhnamo, naysicsa mepqui sicyascamco. Altimnasquic coo sicpayvam, najan simpilapquiscama mepqui sicyascamco.
4 Aptomjac alhta lhip seyanya coo: Ingyeylhojo sicpayvam. Olmalhnam sat lhip jeyatingmojo — alhta aptomjac lhip.
5 Aclingac alhta amyaa aplhenacpo lhip. Quilhvo eyca sicvita lhip najato.
6 Acmancaquic coo siclhanma sicpayvam. Naso, sicsilhnanomalhca ajanco, sicna coo netin lhopactic najan tajap — nic nat aptomjac Job.
Mayasicjayclha Job
7 Appenasquic nic nat Dios appamejitquiscama Job. Aptomjac nic nat Dios Ingyapam apcanya Elifaz: —Inlovquic evalhoc coo sicvita lhip najan apcanit apnaymacoc. Apquilmopvancaa amyaa nac quellhip. Nasoc alhta appayvam Job selhanma coo. 8 Eltingya sat quellhip siete vayqui inquilinava najan siete nipquesic. Enaliclha sat apnaclha Job. Elaa sat actemaclha selmescama coo acyanmongam melyascalhma. Job sat elmalhnesquisic, ongvaylhojoc sat apquilmalhnesquiscama. Motvacsejec sat quellhip, apquiltomja inlhojo apquilmopvancaa amyaa sellhanma coo. Nasoc alhta appayvam Job selhanma coo — nic nat aptomjac Dios Apyimtalhnamo.
9 Apquillhinquic nic nat Elifaz, najan Bildad, najan Zofar. Apquilyiplovcasquic nic nat actema nac apcanama Dios. Apjalhnoc nic nat Dios apquilmalhnesquiscama Job.
10 Appenasquic nic nat apquilmalhnesquiscama Job. Intamilaclhec nic nat apyimpejic Job. Aplhocac nic nat Job aclhamoclhojo apquilnatam, najan aclhamoclhojo apnatoscama, am colhnoc siclhoc alhta, dos veces más. 11 Apquilmiyantac nic nat apnaclha Job eltimjic maycaa apquilpipma, apquilyalho, apquilyalhinga, apquilmolhama, najan apnaymacoc nano. Apquillanac nic nat fiesta Job tingma pac. Apquillhenquic nic nat acmayovsa apquilvalhoc naysicsa aplingaycamco acmasom Job. Apquiltamilquiscacmec nic nat apvalhoc Job. Innec nic nat almesa nicja solyayem najan alatquiscama apopejic oro alyinmom.
12 Avanjec anco appasmom Dios as apquilvamlha nac jay Job, am colhno nano. Apquilyipsatquic nic nat catorce mil apnatoscama nipquesic. Seis mil apnatoscama camellos voncayispoc. Dos mil vayqui yamquilvanaa najan mil apnatoscama yamelyeyjaycoc. 13 Apvitac nic nat catorce apquitquic apquilinava najan tres quilvanaa apquitquic. 14 Actiyam amamyi acvisay nic nat Jemima Valhaay moc acvisay nic nat Cesia Asoc Masis, moc acvisay nic nat Keren-hapuc, ningiltimem Ningiltilhnamalhca Acmasis. 15 Altamila anco as quilvanaa, am colhno moc quilvanaa lhalhma anco. Inquillhocac nic nat almayclha inquilyap apquilnatam. Najan inquilyipmaa, apquillhoy nic nat apquilnatam ayinyema apquilyap.
16-17 Aptiyasam nic nat mocjam Job ciento cuarenta años. Apquitsepmec nic nat aptomjaclha apvanyam apanco. Apvitac nic nat apyovoclhojo apquitquic, najan aptovana, najan aptovana apquitquic.
© © Biblia en Enhlet (Lengua Norte) © Paraguayan Bible Society, 1995.
