Apquilyimnatem apanco judíos
1 Invocmec nic nat acnim trece najan piltin doce, moc apvisay Adar, as acnim aclhanma vaycajac apcanamaclha apvisqui, yoyam eticyoc apyovoclhojo judíos. Apquilvitac nic nat moc actemaclha. 2 Apcaneclhec nic nat judíos tingma apquilvanyam lhalhma anco, yoyam elnapoc enlhit apquilinmelhaycam judíos. Am nic nat colapvancaac elnapacpoc, ayinyema acyivey apquilay metnaja judíos. 3 Am nic nat elinmelham apquilviscaa apquilyimtalhnamo, najan poc apquilviscaa najan poc mayayo, ayinyema acyivey apquilay napato Mardoqueo. 4 Aptomjac nic nat apvisqui mayayo Mardoqueo, apna apvisqui rey tingma pac. Inlingalhquic mataa aptemaclha apyimtalhnamo, coyangvomoc mataa apyimnatem apanco moclhama acnim. 5 Apticyovquic nic nat cotnaja ingmoc, ayinyema apquilnapma judíos. Apquillanac nic nat judíos apquiltamjoclha ellana. 6 Apticyovquic nic nat natingma Susa quinientos enlhit apquilinmelhaycam judíos. 7 Apquilvisay apticyovam: Parsandata, Dalfón, Aspata, 8 Porata, Adalía, Aridata, 9 Parmasta, Arisai, Aridai, Vaizata. 10 Eycaso ilhnic nat diez apquitquic Amán cotnaja ingmoc. Am nic nat colmalhcac apquilnatam.
11 Aplingac nic nat apvisqui apquilvamlha apticyovam natingma Susa.
12 Aptomjac nic nat apcanya avisqui Ester: —Apticyovquic natingma Susa quinientos enlhit najan diez apquitquic Amán. Nasoc lhaja appintalhnama apticyovam lhalhma anco yoclhilhma. Jelmalhna sat moc asoc, yavamlha otnejic — nic nat aptomjac apvisqui.
13 Incatingmavoc nic nat Ester: —Lhip visqui mayayo. Apquiltamjoc sat ancoc lhip, ingyane sat elnapoc judíos secaseclha mocjam natingma Susa. Elilhnesacpoc sat netin yamit diez apticyovam Amán apquitquic — nic nat intomjac.
14 Aptomjac nic nat apvisqui apcanama, yoyam elyiplovcasojo actema nac lha. Inlingalhquic nic nat amyaa natingma Susa, yoyam elilhnesacpoc netin yamit diez apticyovam Amán apquitquic.
15 Apcaneclhec nic nat judíos natingma Susa acnim catorce najan piltin Adar. Apquilnapquic nic nat trescientos enlhit apquilinmelhaycam judíos. Am nic nat colmalhcac apquilnatam. 16-17 Apticyovquic nic nat yoclhilhma provincia as acnim trece najan piltin Adar malha setenta y cinco mil apquilinmelhaycam judíos. Am nic nat colmalhcac apquilnatam. Apquilnaclhec nic nat acnim catorce, ellanac sat fiesta apquilitsovascama.
18 Apquilnapquic nic nat judíos cotnaja ingmoc acnim trece najan catorce. Apquilnaclhec nic nat acnim quince, ellanac sat fiesta apquilitsovascama. 19 Apquillanac nic nat fiesta apancaoc judíos apnaycam amyip, metnaja tingma apvanyam, acnim catorce najan piltin Adar. Apquilitsovasoc nic nat acyiplomo apquilmescama nasa asoc nipyesicsa maa.
Fiesta acvisay Purim
20 Aptalhosquic nic nat vaycajac Mardoqueo, apcapajasa yoclhilhma lhalhma anco apcanamaclha apvisqui Asuero, najan ningato, najan mocjay. 21 Apquilanyacpec apyovoclhojo judíos ellanac fiesta acnim catorce najan quince, piltin Adar. 22 Cotnejic acyitnama ingatic apquillingaycamco judíos apquilinmelhaycam cotnaja ingmoc najan acmayovsa apquilvalhoc najan apquiliclhangveycam, actomjayclho apquilitsovascama najan fiesta actamila as acnim. Incaymalhquic elitsovacsojoc apyovoclhojo judíos, acyiplomo apquilmescama nasa nipyesicsa maa. Najan apquilmescama nasa asoc ellhovamcoc enlhit mepqui asoc. 23 Eycaso aptalhescama nic nat Mardoqueo actomjayclho apquiltemaclha apancaoc judíos. 24 Apquiltamjoc nic nat cotnaja ingmoc Amán, yoyam enatovasacpoc najan eticyoc judíos. 25 Inquiltimnasquic nic nat avisqui Ester amyaa apnaclha apvisqui. Aptomjac nic nat apvisqui apcanya, ayinyema vaycajac actalhesomalhca, yoyam elngamcojoc sat Amán acyanmongayclha aptemaclha apanco. Apquilhnesacpec nic nat Amán najan apquitquic netin yamit. 26 Eycaso acnim alvisay purim, lhama acnim acvisay pur (fiesta apancaoc purim).
Ayinyema ilhnic nat aptalhescama Mardoqueo najan apnaymacoc apquilvitaycamco. 27 Apquilvajanamquic nic nat moclhama año, cotnejic apquiltemaclha apancaoc judíos najan aptovana najan apquiltomjayclho judíos apquilpalhaviyam: colapvanquejec mataa mepqui fiesta, acno ilhnic nat apquilanyomap elana fiesta. 28 Cotnejic sat acyitnama ingatic nipyesicsa apquilmolhama judíos lhalhma anco, yoyam colvoncamejec sat mataa nipyesicsa judíos najan aptovana niptamin. 29 Intalhosquic nic nat avisqui Ester, Abihail apquitca, najan Mardoqueo judío mocjam lhama vaycajac aclhenamalhca fiesta acvisay Purim, yoyam cotnatsalhquejec mataa actomja nasoc anco primera vaycajac. 30 Apquilapajasquic nic nat nipyesicsa judíos lhalhma anco ciento veintisiete provincias yoclhilhma apcanamaclha apvisqui Asuero. Yiplovcoc nic nat acnatalhesomalhca altamila appayvam. 31 Apquilanyacpec nic nat apyovoclhojo judíos ellanac as fiesta Purim as acnim apcanama siclho Mardoqueo najan avisqui Ester, elyiplovcasojoc sat mataa aptovana. Inlhenalhquic nic nat najan apquiltemaclha acmayovsa apquilvalhoc najan apquiliclhangveycam najan apquililmalhnancama mepqui aptoycaoc. 32 Avisqui Ester nic nat ayanama, colhic acyiplovquisa mataa as fiesta Purim. Yitnec lhama vaycajac libro acnatalhesomalhca acyovoclhojo asoc.
© © Biblia en Enhlet (Lengua Norte) © Paraguayan Bible Society, 1995.
