Asoc ningmescama quilaycmasquiscama acyitsomalhca Dios
1 Altamjoc olhenic actemaclha moc asoc. Inlhenalhquic apitic macmescama quilaycmasquiscama acyitsomalhca Dios. Intomjac alhta vaycajac setalhesquiscama quellhip: “Nincoo ningiltomja ningilyascamco” —alhta apquiltomjac quellhip. Nintemaclha ningilyascamco inganco actomja actipquiscama ningilyimtalhnesomalhca inganco. Nintemaclha ningasicjayo actomja singyascasingvoyam. 2 Ninganayquic sat ancoc coyitnac ningyascamco, colhejec sat lhama asoc ningyascamco. 3 Ningasicjavoc sat ancoc Dios, eyasamcojoc sat Dios nintemaclha nincoo.
4 Inlhenalhquic apitic macmescama quilaycmasquiscama acyitsomalhca Dios. Paj nincoo lhalhma anco lhama quilaycmasquiscama acyitsomalhca Dios. Paj poc, apvamlha lhama apanco Dios. 5 Apquilanayquic mataa enlhitaoc lhalhma anco elhnam aplhamoclhojo dioses ingilyapam netin najan as nalhpop. Ayinyemaclha apquiltimec mataa apquilayo aplhamoclhojo dioses ingilyapam najan aplhamoclhojo apquilviscaa apancaoc. 6 Paj nincoo aplhamoclhojo dioses ingilyapam. Apvamlha eyca lhama Dios Ingyapam. Ayinyemaclha Dios Ingyapam aptomja apquilantipquiscama aclhamoclhojo asoc. Ningyicplovcasquic mataa nincoo naysicsa ningileyvam. Apnec najan apvamlha lhama Visqui ingac Jesucristo, aptomja apquilanescama aclhamoclhojo asoc najan nincoo lha singmescama acyimnatem ingnenyaoc.
7 Jave aplhamoclhojo ingilyalhinga apquilyascamco as asoc. Napocja ingilyalhinga apquiltimec alhta mataa apquilayo quilaycmasquiscama acyitsomalhca Dios. Apquilanayquic quilhvo naysicsa aptoycaoc apitic cotnajac nasoc anco macmescama quilaycmasquiscama acyitsomalhca Dios. Inyiplovcoc mataa actamjaycam apquilvalhoc, ayinyemaclha am coyimnac mocjam apquilvalhoc. Incacoc apnenyaoc esilhnanacpoc ayinyema aptoycaoc. 8 Elyasamcojo quellhip: Am colhenac mataa apvalhoc Dios ontovamcoc apitic, am najan colhenac apvalhoc ongyinyoc apitic. Mejingiltimesejec ningiltamila ontoc apitic. Mejingiltimesejec ningilmasomcaa montoc apitic. 9 Apvancaa quellhip eltimjic apquililtamjoclha eltimjic. Elavojo anco, noelsilhnana nasa poc acyitna mocjam coyimnatem apvalhoc. 10 Apyasamco inyicje lhip as asoc. Apvitacpec sat ancoc lhip naysicsa aptom congne tingma acyitnamaclha quilaycmasquiscama. ¿Pa ya evjaniclhojo etovc apitic ingyalhing aptomja apvitaycamco, acyitna mocjam coyimnatem apvalhoc? 11 Lhip aptomja apyascamco. Malha apsilhnanoncama aptomjac lhip as ingyalhing aptomja apvitaycamco yoyam etvasacpoc. Eyca Cristo aptomja najan apquitsepma acyanmongam as ingyalhing. 12 Apquilsilhnanaquic sat ancoc quellhip ingyalhing naysicsa coyimnatem mocjam apvalhoc. Elsilhnanacpoc sat apanco quellhip napato Cristo. 13 Acsilhnanaquic sat ancoc coo eyalhing ayinyema setaycamco sictom apitic, motovejec sat mataa apitic yoyam metvasacpejec sat ingyalhing.
© © Biblia en Enhlet (Lengua Norte) © Paraguayan Bible Society, 1995.
