Aarón apanco yamit ayitcoc
1 Aptomjac nic nat Dios apcanya Moisés:
2 Ingyapajas sat lhip, colhic altimnasa apquilviscaa moclhama tribu apquilmolhama, eltingyac sat doce yamit ayitcoc, colhic sat actalhesa apvisay apyeyjamcaa tribu apquilmolhama, moclhama apquilvisay doce apquilyeyjamcaa Israel. 3 Lhama yamit ayitcoc colhic actalhesa apvisay Aarón, apyeyjamcaa ilhnic Leví. Acyovoclhojo doce yamit ayitcoc, colhic actalhesa doce apquilyeyjamcaa. 4 Ininquin sat yamit ayitcoc ningatoc yamit aysicsic acyitnamaclha Dios appayvam congne carpa apponquinomap, apcaneyquiclhilha quellhip najato coo. 5 Otnesquisic sat lhama yamit silyacyescama coyimselic sat ningvita ava. Comascoc sat alantipsomalhca apquilvisay quellhip nipyesicsa israelitas — nic nat aptomjac Dios.
6 Apquiltimnasquic nic nat Moisés as appayvam ayinyema Dios napatavo enlhitaoc. Aplhocac nic nat yamit ayitcoc ayinyema apquilmolhama apvisqui, apcansaclho doce yamit ayitcoc Moisés. Lhama yamit ayitcoc acyitna apvisay Aarón. 7 Apninquinquic nic nat Moisés yamit ayitcoc payjoc yamit aysicsic acyitnamaclha Dios appayvam. 8 Moc acnim nic nat intomjac. Pilapcasquic nic nat Moisés apvita yamit ayitcoc alyipvatem congne carpa apponquinomap, actomja Aarón apanco, apyeyjamcaa nic nat Leví. Apvitac nic nat Moisés ilhnamoc as yamit ayitcoc najan acyilhna almendra acmasis. 9 Apliquic nic nat Moisés acyovoclhojo yamit ayitcoc apquillhicmosa enlhitaoc Israel. Apquillhocac nic nat moclhama apquilviscaa yamit ayitcoc apanco.
10 Aptomjac nic nat Dios apcanya Moisés: Ipquinvoclha sat yamit ayitcoc apanco Aarón avalhoc yamit aysicsic acyitnamaclha Dios appayvam. Coytic sat maa actemaclha acyitnama ingatic enlhitaoc apquiltemaclha apquilinmelhaycam. Comascoc sat apquiltemaclha sevenneycam, melitsepejec sat maa enlhitaoc — nic nat aptomjac.
11 Apquilyajaclhoc nic nat Moisés appayvam ayinyema Dios. 12 Apquiltomjac nic nat israelitas apquilanya Moisés: ¡Ongilmasquingvomoc sat ningyovoclhojo! ¡Ongilitsapoc sat nincoo! 13 ¡Ingyitsapoc sat mataa enlhit apyipitcangviyam carpa apponquinomap, apvisay apmaclha Dios! ¿Mepqui ya singmasma nincoo? — nic nat apquiltomjac.
© © Biblia en Enhlet (Lengua Norte) © Paraguayan Bible Society, 1995.
