Apquilpatmeyquinta yamit aysicsic Jerusalén
(2~S 6.12-23)1 Apvisqui David nic nat apcanama, colhic allana apquilmaclha enlhit apvisay David Tingma pac. Najan colhic allana carpa apponquinomap, yoyam copquenalhcac sat yamit aysicsic acyitnamaclha Dios appayvam. 2 Aptomjac nic nat apcanya: Elpatmentac sat levitas yamit aysicsic acyitnamaclha Dios appayvam. Eycaso apcanama siclhoc nat Dios, levitas nac apquilyacyesomap elpatmaoclhac mataa yamit aysicsic, yoyam eltimesam mataa napato Dios — nic nat aptomjac David.
3 Apcansaclhec nic nat apvisqui David apyovoclhojo israelitas tingma Jerusalén, yoyam elpatmentac yamit aysicsic acyitnamaclha Dios appayvam. Copquenalhcac sat congne carpa apponquinomap. 4 Apquilanyacpec nic nat Aarón aptovana niptamin najan apquilmolhama Leví. 5 Apcaneclhec nic nat apquilmolhama Coat ciento veinte, Uriel nic nat apquilmolhama apquilyap. 6 Apquilmolhama Merari 220, Asaías nic nat apquilmolhama apyap. 7 Apquilmolhama Gersón 130, Joel nic nat apquilmolhama apyap. 8 Apquilmolhama Elizafán 200, Semaías nic nat apquilmolhama apyap. 9 Apquilmolhama Hebrón 80, Eliel nic nat apquilmolhama apyap. 10 Apquilmolhama Uziel 112, Aminadab nic nat apquilmolhama apyap.
11 Apquilanyacpec nic nat sacerdotes Sadoc najan Abiatar, najan maa levitas Uriel, Asaías, Joel, Eliel, najan Aminadab. 12 Aptomjac nic nat apquilanya: Quellhip apquilvisay apyapmayc apquilmolhama levitas. Ellaniclha sat apquilvalhoc quellhip najan apquilmolhama. Elpatmentac sat yamit aysicsic acyitnamaclha Dios appayvam, Dios Visqui apancaoc Israel. Copquenalhcac sat maa tingma apquillanesomap. 13 Moc actemaclha siclhoc alhta naysicsa apquilpatmeyquinta. Apquilnapquic nic nat Dios napocja ingnaymacoc, ayinyema mepqui ilhnic nat ningilpamejitsomalhca Dios — nic nat aptomjac apvisqui David.
14 Apquillaneclhec nic nat apquilvalhoc sacerdotes najan levitas, yoyam elpatmentac yamit aysicsic acyitnamaclha Dios appayvam, actomja apanco Dios Visqui apancaoc Israel. 15 Apquilpatmam nic nat neplatane apancaoc navayc yamit alvinatem, acno ilhnic nat apcanama Moisés ayinyema Dios Visqui ingac.
16 Apvisqui David nic nat apcanama nipyesicsa apquilmolhama apyapmayc, yoyam eltingyasquisic enlhit apquilminaycmascama najan apquilpayvascama arpas, salterios najan platillos. Colhic sat ayaco Dios acyiplomo apquilitsovascama.
17 Apquiltingyascasquic nic nat levitas, apcanyacpo Hemán, Joel apquitca najan Asaf, Berequías apquitca, apmolhama Hemán. Najan Merari apquilmolhama apcanyacpo Etán, Cusaías apquitca. 18 Poc nic nat, apquilmolhama apquilanyomap siclhoc anco, eltimjic sat apquiltimesaycam apquilpasmeyquiclha: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías najan apquiltamilquiscama atong Obed-edom najan Jeiel.
19 Apquilvisay nic nat apquilpayvascama Hemán, Asaf najan Etán, apquilmaycam nic nat platillos de bronce. 20 Poc nic nat Zacarías, Aziel, Semiramot, Jehiel, Uni, Eliab, Maasías najan Benaía, apquilmaycam nic nat salterios apquiltemaclha apquilpayvascama elamita. 21 Poc nic nat Matatías, Elifelehu, Micnías, Obed-edom, Jeiel, najan Azazías, apquilmaycam nic nat arpas apquiltemaclha apquilpayvascama siminita. 22 Apyascamco apanco ilhnic nat Quenanías, mayayo nipyesicsa levitas aptomja aplhinquiscama apquilpayvascama. 23 Apquiltamilquiscama atong apquilvisay nic nat Berequías najan Elcana. 24 Poc nic nat sacerdotes Sebanías, Josafat, Natanael, Amasai, Zacarías, Benaías najan Eliezer apquilpayvascama trompetas apquillhingam apquilmamyi naysicsa apquilsoycam yamit aysicsic apanco Dios. Poc nic nat apquiltamilquiscama atong Ebed-edom najan Jehías.
25 Apquilmiyaclhec nic nat Obed-edom tingma pac apvisqui David, najan apquilvanyam mayayo najan singilpilhtetemo apquilviscaa. Apquiltingyac nic nat yamit aysicsic acyitnamaclha Dios appayvam, moc acvisay cofre del pacto. Avanjec nic nat acpayjayclha apquilvalhoc. 26 Appasmec nic nat Dios Visqui ingac levitas apquilpatmeycam yamit aysicsic acyitnamaclha Dios appayvam. Apquilnapquic nic nat siete vayqui yamquilvanaa najan siete nipquesic actemaclha macmescama Dios. 27 Appava apquilhyevay najan apmopoy nic nat aptalhnama David, najan maa apquilantalhnama levitas apquilpatmeycam yamit aysicsic, najan maa apquilantalhnama apquilminaycmascama enlhit najan aptalhnama Quenanías, aptomjac aplhinquiscama enlhitaoc apquillhingam. Poc mocjam apava ilhnic nat David, apvisay efod sacerdote apava. 28 Apquilpatmaoclhec nic nat yamit aysicsic cofre del pacto acyiplomo apquilitsovascama najan apquilpalhamaycam, najan apquilpayvascama nipquesic apquipitaoc, najan trompetas, najan platillos, najan salterios najan arpas.
29 Apquilvocmec nic nat apquilpatmeycam yamit aysicsic cofre del pacto payjoc David Tingma pac. Innec nic nat tingma ac alaneyo atong ayitcoc quilvana Mical, Saúl nic nat apquitca. Invitac nic nat aptemaclha apvisqui David apquiltaycam naysicsa apquitsovascama. Avanjec nic nat acvenneycam avalhoc quilvana Mical.
© © Biblia en Enhlet (Lengua Norte) © Paraguayan Bible Society, 1995.
