Quilaycmasquiscama acyitsomalhca dios
1 Aptomjac nic nat profeta: Apquilvoctac alhta sicnaclha napocja apquilvanyam co Israel. Apquililtamjoc alhta elyasamcojo amyaa ayinyema Dios. 2 Aptomjac alhta Dios Apyimtalhnamo seyanya coo: 3 Lhip enlhit, apquilvoctac as enlhit apquiltomja apquilayo quilaycmasquiscama. Apquilyispaquic mataa asoc ayinyemayaclha apquilsilhnanomap apanco. ¿Evanqui ya opamejitsalhcojo as enlhit? 4 Ipamejitquis sat lhip. Itne sat elanic as enlhitaoc: Eycaso appayvam ayinyema Dios Apyimtalhnamo: Acvitac coo enlhit co Israel apquiltomja apquilayo quilaycmasquiscama. Apquilyispaquic mataa asoc ayinyemayaclha apquilsilhnanomap apanco. Apquiltiyaningvoctac apnaclha profeta elyasamcojo sicmayjayoclha coo. Ongvatingmojoc sat coo, sicvita inlhojo aclhamoclhojo quilaycmasquiscama — alhta aptomjac Dios Apyimtalhnamo.
5 Aptomjac alhta mocjam: Otnesquisic sat aclingaycamco apquilvalhoc apyovoclhojo enlhitaoc Israel, selyamasma alhta, apquiltomja apquilayo quilaycmasquiscama. 6 Itne sat elanic apquilmolhama Israel: Eycaso appayvam ayinyema Dios Apyimtalhnamo: ¡Elpaycacpojo quellhip! ¡Etlhaoc sat quilaycmasquiscama! ¡Elvatsaoc sat apquiltemaclha apancaoc meyisponcama Dios! 7 Acvitac sat ancoc israelitas najan metnaja israelita nipyesicsa quellhip, apquiltomja apquilayo quilaycmasquiscama. Apquilyispaquic sat ancoc asoc ayinyemayaclha apquilsilhnanomap apanco. Apquiltiyaningvoctac sat ancoc apnaclha profeta elyasamcojo sicmayjayoclha. Ongvatingmojoc sat coo: 8 Oyanmongsiclhac sat apquiltemaclha apancaoc, cotlapsic sat apquilvita apnaymacoc. Omascocsic sat aptiyascam nipyesicsa Israel. Elyicpilcangvomoc sat quellhip, sicvisay Dios Visqui apancaoc — alhta aptomjac.
9 Aptomjac alhta mocjam Dios Apyimtalhnamo: Aplingasquic sat ancoc profeta apmopvan amyaa, ayinyema coo sicyinimquiscama siclho. Omascocsic sat aptiyascam as profeta nipyesicsa apnaymacoc. 10 Colhic sat acyanmongseclho apquiltemaclha apancaoc apquilyoctama profeta najan maa aptemaclha apanco profeta. 11 Mejelyinyovejec sat mocjam enlhitaoc Israel, melsilhnanacpejec sat mocjam apquilyiplovquiscama acmasom. Otnejic sat enlhit ajancaoc, sicvisay Dios Visqui apancaoc. Eycaso sicpayvam sicvisay Dios — alhta aptomjac.
Apquiltemaclha apancaoc co Jerusalén
12 Aptomjac alhta Dios Apyimtalhnamo seyanya coo: 13 Lhip enlhit, apquiltomjac sat ancoc selinmelhaycam enlhitaoc apquilvatseycaoc selyiplovquiscama. Oyanmongsiclhac sat apquiltemaclha apancaoc, omyoc sat nintom. Mayic colnapoc sat enlhitaoc, elitsapoc sat enlhit najan apnatoscama. 14 Apnam sat ancoc apnatqui apquilpeyvomo nipyesicsa maa, apvisay Noé, najan Daniel, najan Job. Elvomsacpoc sat tap apquilvamlha as apnatqui. Eycaso sicpayvam sicvisay Dios.
15 Evanquic olapajacsic asoc navjac aclom as yoclhilhma, yoyam colnapoc enlhitaoc. Cotniclhac sat yoclhilhma actamopeycaoc. Metyisamejec sat mataa enlhit ayinyema apcay asoc navjac aclom. 16 Apnam sat ancoc as apnatqui apquilpeyvomo nipyesicsa maa. Colapvanquejec elvomsic tap apquitquic, apquilvamlha apquilvomsomap tap as apnatqui sat cotnejic. Cotniclhac sat yoclhilhma actamopeycaoc. Nasoc anco sicpayvam sicvisay Dios. 17 Evanquic olapajacsic enlhit apquilimpocjay as yoclhilhma, eticyoc sat enlhitaoc najan apnatoscama. 18 Apnam sat ancoc as apnatqui apquilpeyvomo nipyesicsa maa, colapvanquejec elvomsic tap apquitquic. Apquilvamlha apquilvomsomap tap as apnatqui sat cotnejic. Nasoc anco sicpayvam sicvisay Dios. 19 Evanquic olapajacsic ningmasquem nipyesicsa maa, olnapoc sat naysicsa siclom. Elitsapoc sat enlhitaoc najan apnatoscama. 20 Apnam sat ancoc as apnatqui apvisay Noé, najan Daniel, najan Job, colapvanquejec elvomsic tap apquitquic. Apquilvamlha apquilvomsomap tap as apnatqui sat cotnejic. Nasoc anco sicpayvam sicvisay Dios.
21 Actomjac coo silanya quellhip: Evanquic olapajacsic cuatro sicyanmongsayclha apquiltemaclha apancaoc tingma Jerusalén: apquilimpocjay enlhit, najan mayic ataoc, najan asoc navjac aclom, najan ningmasquem. Elitsapoc sat enlhitaoc najan apnatoscama. 22 Elmiyovacpoc sat napocja enlhit acyiplomo apquitquic. Colhic sat acnalaclho apquilaymomap yoclhilhma apnamcaclha quellhip. 23 Elvitac sat quellhip apquiltemaclha as enlhitaoc. Elyasingvomoc najan cotamalvomoc sat apquilvalhoc quellhip, apquillinga inlhojo ayinyemayaclha sicyanmongsayclha apquiltemaclha apancaoc co Jerusalén. Eycaso sicpayvam sicvisay Dios — alhta aptomjac Dios Apyimtalhnamo — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
