Aptemaclha enlhit meyascalhma
1 Quellhip elyalhinga. Evotac sat mocjam Jesucristo Visqui ingac. Jingansiclhojoc sat apnaclha. Pac oltimnasiclhojoc mocjam quellhip: 2 Noelvajaniclhojo nasa moc amyaa apquillingay quellhip, actemaclha aplhenamap apvoyctamo Visqui ingac. Inlhenqui inyicje amyaa ayinyema Espíritu apanco Dios, najan ayinyema siclhanma coo, najan aclhanma sictalhescama coo. 3 Noelyejiclhojo nasa enlhitaoc yoyam elyinimsic quellhip. Cotyapoc sat amamyi acyinamam olhma nipyesicsa enlhitaoc apquiltomja apquilinmelhaycam Dios, yicpintama evotac Visqui ingac. Etacpoc sat lhama apyimtalhnamo apvisay mongyascalhma inyap, etvasacpoc sat ningiltovasomalhquilha. 4 Eycaso aptomja mongyascalhma inyap cotnaja ingmoc. Aptomja apyimtalhnesomacpo apanco yoyam ingyinmelham aclhamoclhojo asoc ayinyema Dios. Covac sat acnim yoyam elhic mongyascalhma inyap cotnaja ingmoc congne tingma apponquinomap. Iltamjacpojoc sat apanco apvisay Dios.
5 Altimnasquic alhta quellhip as asoc sicma alhta nipyesicsa quellhip. ¿Apquilyasamco ya mocjam quellhip? 6 Apquilyasamcoc quellhip, yejemec evac yoyam eyimtalhnesacpoc apanco mongyascalhma inyap cotnaja ingmoc. Comoc sat acnim yoyam etacpoc sat apvisay mongyascalhma inyap cotnaja ingmoc. 7 Yitne inyicje actemaclha mongilyascalhma nipyesicsa enlhitaoc, malha asoc acyilhomalhca. Incaymalhquic etyapoc siclho aptomja apmasma yoyam elinmelham. 8 Natamin etacpoc sat mongyascalhma inyap nipyesicsa enlhitaoc. Ematong sat mongyascalhma inyap apvactamo sat Visqui ingac Jesús. Apvatipnapma sat cajic naysicsa ayitsayolhma apanco apvoyctamlha sat. 9 Etacpoc sat mongyascalhma inyap apyimtalhnesomacpo ayinyema acmovanesquiscama yavey Satanás. Cotalhcac sat actemaclha apmopvan najan actemaclha asoc monquinatquiscama najan aptamjaycam sinpilapquiscama actomja acmovan amyaa. 10 Elsilhnanac sat mongyascalhma inyap yoyam elnatovasacpoc sat enlhitaoc. Cotnejic sat acyanmongayclha melyiplovquiscama actomja nasoc anco. Am alhta elasicjac actomja asoc anco. Ayinyemaclha avanquic colvomsic tap as enlhitaoc actomja nasoc anco. 11 Etnesquisic sat Dios yoyam melyascamejec acmovan amyaa, aptimesquiscama apquillhinganyam as enlhitaoc. 12 Elnatovasacpoc sat aplhamoclhojo apquiltomja apquilyasquiyam actomja nasoc anco. Elnatovasacpoc sat najan apquiltomja apquilyisponcama acmasom.
Elvomsacpoc sat tap apquiltomja apquilyacyesomap
13 Quellhip ingilyalhinga apquiltomja apquilasicjamacpo ayinyema Visqui ingac. Ningilinlhanacmec mataa nincoo nintimem gracias Dios Ingyapam naysicsa ningilmalhnesquiscama quellhip. Ayinyemaclha Dios aptomja apquilyacyescama quellhip siclhoc anco apquilantipquiscama aclhamoclhojo asoc. Apquiltamjoc yoyam elvomsacpoc tap quellhip ayinyema Espíritu apanco Dios aptomja apponquinquiscama quellhip. Najan ayinyema actomja nasoc anco apquiltomja apquilyiplovquiscama quellhip. 14 Dios aptomja apquilyacyescama quellhip, malha apquevoycam ayinyema tasic amyaa ningiltimnascama mataa quellhip. Apquiltamjoc yoyam elpasmoc quellhip Jesucristo Visqui ingac gloria aptemaclha apyimtalhnamo.
15 Quellhip ingilyalhinga. Elvascap sat apquilyiplovquiscama actemaclha ningillhicmoscama alhta najan actemaclha ningiltalhesquiscama quellhip. 16 Jesucristo Visqui ingac najan Dios Ingyapam aptomja singilasicjayo nincoo. Dios singaycaoc ayinyema ningillhoy acpayjayclha ingvalhoc cotmongvoycamlha nelha najan aljalhneycam ingvalhoc actamila. 17 Ningiltamjoc nincoo yoyam epayesiclha apquilvalhoc Dios. Yoyam elyimnaticsojoc apquilvalhoc naysicsa apquilpameteycam actamila najan naysicsa apquiltamjaycam actamila.
© © Biblia en Enhlet (Lengua Norte) © Paraguayan Bible Society, 1995.
