Elías profeta Dios aplingascama
1 Apnec nic nat profeta Dios aplingascama apvisay Elías, tingma Tisbe yoclhilhma Galaad.
Aptomjac nic nat profeta Elías apcanya apvisqui Acab: —Dios Apvisqui apancaoc Israel aptomja aplingayo sicpayvam. Sictomja silancam Dios apquilmilaneycaoc. Naso, mepqui acmamay najan mepqui yalya sat cotnejic as ningvamlha nac jay, acvocmo siltamjo sat yingmin — nic nat aptomjac.
2 Aplingac nic nat Elías Dios apcanama. Aptomjac nic nat Dios apcanya: 3 —Iyinyov sat apmaclha. Iyas sat actiyapmaclha acnim. Iyilhanim sat alvata acvisay Querit, nicja vatsam Jordán. 4 Iyin sat yingmin nalhit alvata. Elsantimsic sat aptom mama apyayem, etoc sat lhip — nic nat aptomjac.
5 Apquilyajaclhoc nic nat profeta Elías. Aplhinquic nic nat actiyapmaclha acnim. Apnaclhec nic nat alvata Querit, nicja vatsam Jordán. 6 Apsantimcasquic nic nat mataa aptom mama apyayem. Aptovquic nic nat pan najan apitic, alhtoo najan actalhnam. Apyinquic nic nat yingmin nalhit alvata. 7 Inyamacac nic nat yingmin alvata nalhit acnim. Acvoncaclho ilhnic nat mepqui acmamay as nalhpop.
8 Aplingac nic nat Dios appayvam Elías. Aptomjac nic nat Dios apcanya: 9 —Ingva, ingyimpiclha sat mocjam. Iyas sat tingma Sarepta yoclhilhma Sidón. Ilhnim sat maa. Elhcac sat aptom, comquecsic sat tampeyi ayinyema coo siyanem — nic nat aptomjac.
10 Apquimpaclhec nic nat profeta Elías. Tingma Sarepta nic nat apyasac. Apvocmec nic nat nipva tingma apvanyam acyitnamaclha atong. Apvitac nic nat lhama tampeyi naysicsa acyicjeycam alhpongja.
Apquevam nic nat profeta, aptomjac nic nat apcanya: —Jesantimquis siclho yingmin ac, oynic sat coo — nic nat aptomjac.
11 Inlhinquic nic nat quilvana yoyam covoclha yingmin. Yejemoc nic nat apquevamcaa mocjam profeta. Aptomjac nic nat apcanya: —Jesantimquis sat najan pan napocja — nic nat aptomjac. 12 Incatingmavoc nic nat tampeyi: —Dios Apyimtalhnamo aptomja aplingayo sicpayvam. Paj eyitnac pan siyayingvoyam coo. Apcanito apcaymacpoc sepo yompac (motajap) aplhancoc. Inquitsic aceite alhancoc. Acyintilhvocmec lhac coo. Altamjoc otajiclha siclho olaningvoclha nintom ayitcoc. Osavojoc sat sictom coo najan sictamongvoyam. Mayic sat jingilnapoc. Ongvitsapojoc sat lhama sictamongvoyam — nic nat intomjac.
13 Aptomjac nic nat profeta apcanya tampeyi: —Noncotnajam nasa avalhoc lhiya. Cotajiclha siclho, colaningvoclha aclhena lhcac. Jesantimquis sat emamyi alpayescama apquitcoc. Alhayi sat colaniclha actom lhiya najan aptom ayitca.
14 Eycaso actemaclha alhta Dios appayvam aptomja Apvisqui apancaoc enlhitaoc Israel: —Mesovjacpejec sat mataa sepo yompac aplhancoc. Coymasalhquejec sat mataa aceite alhancoc acvocmo sat acnim acmamay'aclha as nalhpop ayinyema Dios — nic nat aptomjac profeta.
15 Inquilyajaclhoc nic nat actomjaclha appayvam. Aptovquic nic nat Elías najan tampeyi najan ayitca. Aclhamoclhojo acnim nic nat aptom. 16 Am nic nat esovjacpoc mataa sepo yompac (motajap) aplhancoc. Am nic nat coymasalhcac mataa aceite alhancoc. Innoc nic nat actemaclha apcanama Dios.
17 Innec nic nat quilvana actomja tingma ac. Ningmasquem nic nat incajac ayitca. Avanjec nic nat ningmasquem. Intalhneclhec nic nat apquinamam.
18 Intomjac nic nat ayanya profeta: —¿So actema apvoya nac tingma ajac? Lhip profeta Dios aplingascama. ¿Apquiltamjo ya lhquip jeyascasingvoclhojo sictemaclha ajanco? ¿Apquiltamjo ya lhquip ingyajic sictamongvoyam? — nic nat intomjac.
19 Apcatingmavoc nic nat profeta: —Jimques siclho ayitca — nic nat aptomjac.
Apcaynec nic nat ayitca apquitsepma profeta Elías. Apsaclhec nic nat netin tingma. Appicanvoclhec nic nat apyitnamaclha netin.
20 Apyimnatasquic nic nat appayvam profeta apquilmalhnesquisa: —Dios Visqui ajac. Semam tacja alhta as tampeyi. ¿Apquiltamjo ya lhquip colngamcojo acyimtalhnama as tampeyi aptimesquiscama lhip apquitsepma ayitca? — nic nat aptomjac.
21 Apyajapquic nic nat profeta apyitnaclha apquitsepma. Natqui apyajapayclha ilhnic nat aptomjac. Apyimnatasquic nic nat appayvam apquilmalhnesquisa: —Dios Visqui ajac. Ingyane sat cotalhningvota mocjam apvanmoncama — nic nat aptomjac.
22 Aplingac nic nat Elías appayvam Dios. Invoctac nic nat mocjam apvanmoncama. Apyimnavocmec nic nat apquitcoc. 23 Apcaynec nic nat profeta Elías. Aptipquic nic nat netin tingma. Apsantimcasquic nic nat inquin.
Aptomjac nic nat apcanya: —Ca incolanojo ayitca, aptamalvocme — nic nat aptomjac.
24 Incatingmavoc nic nat tampeyi: —Acyicpilcangvocmec lhip aptomja nasoc anco Dios aplingascama. Nasoc anco actomja Dios appayvam aplingascama lhip — nic nat intomjac.
© © Biblia en Enhlet (Lengua Norte) © Paraguayan Bible Society, 1995.
