Innec ayaco Visqui ingac
1 Innec ayaco Visqui ingac.
Innec ayaco ayinyema netin.
Eltime sat apquilayo quellhip apnaycam netin.
2 Eltime sat apquilayo quellhip apquilvisay ángeles.
Eltime sat apquilayo quellhip aplhamoclhojo apnaycam netin.
3 Innec ayaco Visqui ingac ayinyema acnim najan piltin.
Innec ayaco Visqui ingac ayinyema aplhamoclhojo apyova.
4 Innec ayaco Visqui ingac ayinyema netin.
Innec ayaco Visqui ingac acyitnamaclha yingmin nitnoc anco.
5 Eltime sat apquilayo apvisay Visqui ingac.
Appayvam ayinyema apquilantipquiscama aclhamoclhojo asoc.
6 Comasquingvomejec sat mataa actomja apquilantipquiscama.
Covanquejec mataa coya'mongsic moc ayinyema apcanamaclha.
7 Eltime sat apquilayo Visqui ingac quellhip apnaycam as nalhpop.
Innec ayaco ayinyema yingmin acvanyam najan acyitnama nayingmin.
8 Innec ayaco ayinyema quilyinmayam najan yingmin alyayem (ajicjaoc).
Innec ayaco ayinyema piyam aptiyam najan ayinyema tiyam etin.
Innec ayaco ayinyema yatipiyam apcanyomap ingyilhcama.
9 Innec ayaco Visqui ingac ayinyema aclhamoclhojo inquilh'a.
Innec ayaco ayinyema aclhamoclhojo yamtaa.
10 Innec ayaco ayinyema ninatoscama najan ayinyema asoc navjac.
Innec ayaco ayinyema anata najan asoc alpilhyevaycam nalhpop.
11 Eltime sat apquilayo quellhip apquilviscaa najan aplhamoclhojo enlhitaoc.
Eltime sat apquilayo quellhip apquilimja apmamyi najan apquilyimtalhnamo.
12 Eltime sat apquilayo quellhip enlhitaoc najan quilvanaa, quilyimnanic najan apquilvanyam.
13 Eltime sat apquilayo quellhip aplhamoclhojo.
Apvamlha Visqui ingac aptomja apyimtalhnamo.
Paj poc maa netin najan as nalhpop aptomja apyimtalhnamo apanco.
14 Visqui ingac aptomja apmescama apquilmopvan enlhitaoc apancaoc.
Apquiltimec apquilayo aptomja apquilyacyescama.
Apquilvisay apnaymacoc enlhitaoc Israel.
Innec ayaco Visqui ingac.
© © Biblia en Enhlet (Lengua Norte) © Paraguayan Bible Society, 1995.
