Actemaclha ningasicjayo najan actomja nasoc anco
1 Coo sictimem siyimja emamyi. Actalhoscasquic as vaycajac actemaclha aclhanma evalhoc Jesucristo apmolhama malha actomja Dios apponcanma najan ayitquic. Actomja nasoc anco actemaclha siyasicjayo Jesucristo apmolhama. Jave sicvamlha siyasicjayo coo. Apquilasicjavoc najan lha aplhamoclhojo enaymacoc apquiltomja melyasquiyam actomja nasoc anco. 2 Ayinyemaclha acyitna ingilvalhoc actomja nasoc anco mataa, quilhvoc najan cotmongvoycamlha nelha. 3 Altamjoc coo yoyam epasmoc quellhip Dios Ingyapam najan Jesucristo Ingyapam Apquitca. Ellhovac sat quellhip actemaclha apcamliyam najan actemaclha apcapeycam najan actamilaycam apquilvalhoc. Eyca ayinyema singasicjayo najan actomja nasoc anco.
4 Payjeclhec alhta evalhoc sicvita napocja apquiltamilcasomap apanco nipyesicsa Jesucristo apmolhama. Apquilyiplovcasquic mataa actomja nasoc anco actemaclha singanamaclha Dios Ingyapam. 5 Pac ongvanic quellhip yoyam ongilasicjalhcojo ningyesicsa. Cotnaja sictalhesquiscama quellhip singanamaclha alhnancoc. Actomja eyca singanamaclha siclhoc anco. 6 Ningasicjayo actomja ningyiplovquiscama singanamaclha Dios. Apquillinga inyicje quellhip singanamaclha siclhoc anco yoyam ongilyiplovcasojo mataa actemaclha ningasicjayo.
Apquilmopvancaa amyaa
7 Apquileyvec aplhamoclhojo apquilmopvancaa amyaa lhalhma anco. Apquilyascacmec mataa apvaa nat Jesucristo aptomjayclho enlhit apanco. Eycaso aptomja apmopvan amyaa aptomja apquinmelhaycam Cristo. 8 Elavojo quellhip, eltamilsacpojo apanco. Noelojo nasa comascoc asoc actamila apquilyiplovquiscama mataa quellhip. Yoyam ellhovac sat acyanmongam acyovoclhojo.
9 Apyitnocjasquic sat ancoc enlhit actemaclha singillhicmoscama Cristo, eyca as metnaja apyipitcayo Dios. Apquilinlhanacmec sat ancoc actemaclha singillhicmoscama Cristo, eyca as aptomja apyipitcayo Dios Ingyapam najan Apquitca. 10 Apquilvoctac sat ancoc apquiltomja apquilyitnocjascama amyaa, noelpayves nasa quellhip, noelma nasa tacja. 11 Apquilvajanamquic sat ancoc quellhip actemaclha apquilpayvescama, elsilhnanacpoc sat quellhip lha ayinyema apquiltemaclha acmasom.
Actomjaclha nelha appayvam aptalhescama Juan
12 Yitne inyicje aclhamoclhojo yoyam oltimnacsic quellhip. Am eyca oltamjoc otalhosquisic vaycajac. Inlhenquic evalhoc ovotamojoc sat apnamcaclha yoyam ongilpamejitsalhcojo. Yoyam coyavojo acpayjayclha ingilvalhoc.
13 Inquillhenquic apquilvalhoc ingilyalhinga ningnaycamo lhama apquiltomja Dios apquilyacyescama. Amén.
© © Biblia en Enhlet (Lengua Norte) © Paraguayan Bible Society, 1995.
