Coro: (quilvanaa)
1 ¿Co la apyasa acponcanma lhiya? Jingiltimnas sat lhiya actomja actamila anco naysicsa quilvanaa. ¿Co laa apyasa, yoyam ongilpasmoc onsovjam acponcanma lhiya?
Quilvana:
2 Amyip ayimjaclha ninganma apyasac sicponcanma, payjoc acyitnamaclha acpaniyam acmasis. Apnalaclhec apnatoscama, elcoc sat najan ilhnamoc rosas.
3 Coo ajanco sicponcanma siyasicjayo, aptomja seponcanma coo. Aptamilcasquic apnatoscama payjoc ayimjaclha ilhnamoc rosas.
Quinto canto ningminaycmascama
Enlhit:
4 Lhiya sicponcanma, actamila anco lhiya najan actamila avalhoc. Acyitsomalhca lhiya tingma Tirsa najan Jerusalén. Acno lhiya singilpilhtetemo.
5 ¡Nojelanojo nasa coo, ataoc lhiya altomja selmam coo!
Acyitsomalhca ava lhiya yataay apquitcavoc netin inquilhe Galaad.
6 Alyitsomalhca amaoc lhiya nipquesic macyapascama yingmin, colhic acyesesa apva.
7 Lhiya acmalhimpancoc alyitsomalhca acyilhna granada, tap ayalomalhca apcatic.
8 Apvisqui apnatamcaa acvaycmo sesenta, najan moc apnatamcaa ochenta, najan aclhamoclhojo mocjam quilvanaa ayitcavoc.
9 Acvamlha lhama silyacyescama coo, acyitsomalhca valhaay mepqui apsilhnanomap. Inquin alhta actimquiscama lhama anco ayitca. Inquilvitac alhta moc anaymacoc quilvanaa, altomja alayo. Inquilvitac alhta apvisqui apnatamcaa najan moc apnatamcaa, altomja alayo sicponcanma.
Coro: (quilvanaa)
10 ¿Soc quilvana yi, acyitsomalhca ayitsay alhtoo? Actamila anco quilvana, malha piltin apcapongmatem, ¡malha acnim ayitsasquiscama olhma, acno singilpilhtetemo!
Quilvana:
11 Acmiyaclhec coo ayimjaclha yamit acma acyilhna, olanojoc ayimjaclha actamila payjoc alvata. Olanojoc alyipvatem ayimjaclha uva avjac, najan ilhnamoc granados.
12 Paj oyasamcoc mocjam sictomjaclha. Acnec alhta netin carro apnaclha principe sicponcanma.
Coro: (quilvanaa)
13 ¡Lhiya copaycalhca, Sulamita copaycalhca! ¡Ongilanojoc sat lhiya, copaycalhca!
Quilvana:
¿Soc lha yi, jelanojoc sicvisay Sulamita?
Coro:
¡Pac ongilanojo acjalhyincayam (danza) lhiya, malha nano carpa tingma!
© © Biblia en Enhlet (Lengua Norte) © Paraguayan Bible Society, 1995.
