Aptalhesquiscama Pablo yoyam elyipsitic Timoteo
1 Coo nac Pablo, sictimem apóstol siyapajasomalhca ayinyema Jesucristo. Eyasinaquic alhta Dios aptomja singvomquiscama tap najan Jesucristo ayinyema aljalhneycam ingvalhoc. 2 Actalhoscasquic as vaycajac actemaclha aclhanma evalhoc lhip Timoteo. Ayinyemaclha lhip aptomja malha sictamongvoyam ayinyema mongyasquiyam. Altamjoc yoyam epasmoc lhip Dios Ingyapam najan Jesucristo Visqui ingac yoyam najan ingyimlimojo najan coytic actamilaycam apvalhoc.
Elavojo singillhicmoscama acmovan amyaa
3 Naysicsa yoyam olhong alhta yoclhilhma Macedonia actomjac alhta siyanya lhip: Ilhniclha sat mocjam lhip as tingma Efeso. Imyov sat ellhicmocsic napocja enlhit moc actemaclha apquillhicmoscama yoyam elsilhnanac. 4 Yoyam elvatsamcoc actemaclha apquillhanma amyaa nano najan apquillheneycam apquilinyemayaclha siclhoc anco apquilyeyjamcaa —alhta actomjac coo. Eycaso ayinyema mataa apquilatingmomap nipyesicsa enlhitaoc. Eyca as asoc altomja singilyascamalhma ongillhicmocsic actemaclha aptamjaycam Dios ayinyema actemaclha mongyasquiyam.
5 Incaymalhquic ongillhicmocsic mataa tasic amyaa yoyam coyaveclha actemaclha ningasicjayo. Pac ongilyiplovsic sat ningasicjayo ayinyema ayalhnayo ingvalhoc najan ayinyema acyasingvayclho ingvalhoc actamila najan ayinyema mongyasquiyam actomja nasoc anco. 6 Apquillhinganacmec alhta napocja. Am alhta elyiplovcasac asoc siclhanma lhac. Apquilyiplovcasquic alhta actemaclha apquillhamasomap. 7 Apquililtamjo inyicje eltimjic apquillhicmoscama singanamaclha Moisés. Am eyca elyasamcoc as enlhitaoc actomjaclha apquillhanma. Apquilyimtalhnesacpec mataa apanco naysicsa apquillhicmoscama.
8 Ningyasamcoc nincoo, ningilpeyvasoc sat ancoc ninlhanma singanamaclha, actamila sat cotnejic. Incaymalhquic ongillhicmocsic actemaclha actomja nasoc anco. 9 Ningyasamcoc nincoo apquillhenamap apquilmapsomcaa ayinyema singanamaclha. Eyca acyitna singanamaclha Dios apquillhenamap: enlhit melilyajayquiclho najan enlhit apquilyasquiyam najan enlhit apquilmapsomcaa najan enlhit melyascalhma najan enlhit apquilajayclha apyap najan inquin najan ticyovam yapmayc. 10 Apquillhenamap enlhit apquilanatama najan apquilvajaneycaoc moc actemaclha apquilpatjeteycaoc najan enlhit apquilminyilhayclha poc najan apquilmopvancaa amyaa najan enlhit apquiltimesquiscama nasoc anco naysicsa apquilmopvancaa amyaa. Inlhenalhquic najan aclhamoclhojo asoc alinmelhaycam singillhicmoscama actamila. 11 Eyca as singillhicmoscama actamila ayinyema tasic amyaa actemaclha mayayo Dios aptomja apyimtalhnamo. Eyasinaquic coo oltimnacsic as tasic amyaa.
Gracias Dios Ingyapam aptomja singamliyam
12 Gracias actomjac coo Jesucristo Visqui ingac aptomja seyimnatescama. Eponquinquic alhta otnejic apquilancam. 13 Eyasicjaclhoc alhta mocjam Jesucristo ayinyemaclha sictemaclha alhta sicyamneycam. Acminlhinquic alhta mataa apquiltamsoycaoc. Ayascasquic alhta mataa apyimpeoc. Eyimlaclhoc alhta mocjam, ayinyemaclha am alhta oyanmoncasac mocjam evalhoc. Am alhta oyascamcoc yoycamlha otnejic. 14 Avanjec anco seyimlayquiclho Visqui ingac, malha mongmovan onsavojo. Emcasquic alhta actemaclha moyasquiyam najan actemaclha siyasicjayo ayinyema sicpasmeyquiclha Cristo Jesús.
15 Nasoc anco as amyaa actomja actamila anco yoyam colmoc apquilvalhoc aplhamoclhojo enlhit: Apvoyac nic nat Cristo Jesús as nalhpop yoyam elvomsic tap enlhit melyascalhma. Coo eyca actomja acyiviy anco moyascalhma, am colhnoc melyascalhma poc enlhitaoc. 16 Eycaso ayinyema seyimlayquiclho Dios. Elhicmosquic alhta Jesucristo emamyi actemaclha aljalhanma apvalhoc mepqui appecjescama. Apquiltamjoc alhta Jesucristo elhicmocsic enlhitaoc sictemaclha coo yoyam elyanmongsic apquilvalhoc. Yoyam najan coytic acyimnatem apnenyaoc cotmongvoycamlha nelha ayinyema melyasquiyam. 17 Pac ongilavojo mataa Dios Visqui netin aptomja mengyitsepma, aptomja mongvitay, aptomja apvamlha pac lhama cotmongvoycamlha nelha. Amén.
18 Lhip Timoteo aptomja malha sictamongvoyam. Apquillhenquic nanoc alhta Dios apquillingascama aptemaclha lhip. Ayasinaquic coo lhip yoyam emyoc meyasquiyam najan acyasingvayclho apvalhoc actamila, malha ningilnapomalhca. 19 Apquilvatsamquic alhta napocja ingilyalhinga. Inmasquingvocmec alhta melyasquiyam. 20 Apquilvatescacmec alhta ingyalhing Himeneo najan Alejandro. Ayanayquic alhta yavey Satanás yoyam colmoc as enlhit. Elvatsamcoc sat apquiltipquiscama apvisay Dios.
© © Biblia en Enhlet (Lengua Norte) © Paraguayan Bible Society, 1995.
