Mocjam appayvam Job
1 Mepqui apyimnatem mataa enlhit, ayenmo aptiyaycamlha. Inyavatoc aptiyascam as nalhpop, avanjec mataa aclheneycam apvalhoc.
2 Apyitsomacpo yamit ilhnamoc, actamila siclho natamin acyamamco. Apyitsomacpo pisquisca, yoyam covonquepoc mocjam.
3 Apmiyovquic mataa Dios, yoyam eyipconic siclho, natamin eyinyovacpoc enlhit.
4 Mepqui ayalhnayo mataa apvalhoc enlhit, mepqui mataa aptemaclha appeyvomo.
5 Lhip Visqui ingac aptimesquiscama acvamlha años etyisam sat enlhit. Apyasamcoc lhip acvamlha acnim najan apvamlha piltin comascoc sat aptiyascam enlhit.
6 Iyinyov sat lhip enlhit, etyisam pac lha, copayjiclhac sat apvalhoc maa.
7 Inyatemenalhquic sat ancoc yamit, coticteypoc sat mocjam alhcapoc, coctong sat.
8 Intajapquic sat ancoc yamit avjac, najan maa ayquipmenaoc congne lhopactic.
9 Impalacmec sat ancoc yingmin ayitcoc, coctong sat alhcapoc, cotniclhac sat yamit.
10 Apquitsepquic sat ancoc enlhit, comascoc sat aptiyascam. ¿Co laa eyacsejic?
11 Nasoc lhaja coymac sat yingmin acvanyam, coymac sat yingmin vatsam ayinyem.
12 Mellhaticjangvomejec sat mataa enlhit apquilitsepma, melyinyovejec sat malhic. Elnateynic sat mataa, mepqui apnalhaticjangviyam.
13 Jeyilhanimquis sat coo nipyesicsa apquilmasquingvaycmo, acvaycmo acmasca lhip aplom pac. Ilhen sat acnim yavamlha jeyasicjiclhojoc mocjam coo.
14 ¿Naso ya elhaticjangvomoc sat mocjam enlhit? Altamjo inyicje olinlhanmojo siclingaycamco acmasca, acvaycmo acnim sictamilviyam mocjam.
15 Jeyanic sat lhip Visqui ingac, ongvatingmojoc sat coo. Jeyasicjiclhojoc sat coo ayinyema lhip aptomja selanay coo.
16 Jelanojoc sat lhip sictiyascam coo, sictemaclha siclhingam. Melhenejec sat lhip sictemaclha sicsilhnanomalhca ajanco.
17 Colvoncamoc sat acyovoclhojo sicsilhnanomalhca ajanco, jeyalhnacsic sat evalhoc.
18 Colpalhic sat mataymong alvinatem, colyaninic maa. Colhnanmoc sat inquilhe maa.
19 Avanquic yingmin cotvacsic mataymong. Avanquic acmamay coyinyovacsic (colhingsic) lhopactic. Apvanquic lhip emascocsic aljalhneycam apquilvalhoc enlhit.
20 Apyinjac lhip enlhit, etyamoc sat nalhpop, emasquingvomoc sat maa, mevotayc sat mocjam.
21 Paj eyasamcoc acyitna inlhojo mayayo apquitquic, paj eyasamcoc acyitna inlhojo macvenéycam apquitquic.
22 Avanjec aplingaycamco acmasca apyimpejic, avanjec acmayovsa apvalhoc enlhit aplhenamap apanco — nic nat aptomjac Job.
© © Biblia en Enhlet (Lengua Norte) © Paraguayan Bible Society, 1995.
