1 Oltamilquiscomoc sat apquilmolhama Efraín najan co Samaria. Cotalhcac sat apquiltemaclha apquilsilhnanomap apanco najan apquiltemaclha apquilmapsomcaa. Apquiltemaclha mataa apquilmopvan amyaa, najan apquilminyilhma moclhama tingma, acyiplomo apquilnapma amay.
2 Am colhenac apquilvalhoc sicyascamco apquiltemaclha apancaoc apquilmapsomcaa, mepqui selvoncayam. Inlhameclhec apquiltemaclha apancaoc nipyava maa, sicvita mataa najato — alhta aptomjac.
Ticyovam yapmayc
3 Aptomjac alhta Dios Apyimtalhnamo: Apquiltimescasquic apvisqui rey najan yatapquilviscaa naysicsa apquiltemaclha apancaoc, naysicsa apquilmopvan amyaa.
4 Apquiltemaclha apancaoc apquilyamasma. Apquilyitsomacpo malhic acyitna talha acyivey congne. Apquiljalhnec apquillaney pan macyelaquiscama motajap.
5 Naysicsa fiesta mactimesquiscama rey apvisqui, apquilyinamco acyivey anmin yatapquilviscaa. Apquilyinamquic alhta lhama apvisqui najan apquiltomja apquilinmelhaycam.
6 Malha talha intomjac apquilvalhoc congne malhic. Aptinquic apquillaney pan acyovoclhojo alhtaa. Apvitac alhtoo malhic acmelhanma.
7 Inmelhnec apquilvalhoc apyovoclhojo enlhit, malha malhic acmelhanma. Apnatovasacpec maa yatapquilviscaa. Apticyovquic apquilviscaa reyes. Paj lhama enlhit, yoyam etnejic seyayo coo — alhta aptomjac.
Apquiltemaclha apquilyamasma Dios
8 Aptomjac alhta Dios Apyimtalhnamo: Apquilpalhavocmec apquilmolhama Efraín nipyesicsa enlhitaoc metnaja apquiltemolhama. Apquilyitsomacpo nilpayescama netin talha mepqui acpaycomalhca.
9 Apquilyamposquic mataa metnaja apquiltemolhama, am eyca elyasamcoc enlhitaoc Efraín. Inquilmopeclhec apva apcatcoc, am eyca elyasamcoc.
10 Avanjec mataa ayajamalhco apquilvalhoc, actomja seyinmelhaycam. Am alhta elyanmoncasac moc apquilvalhoc, am eltiyaningvocmoc mataa Dios Apyimtalhnamo.
11 Efraín apquilmolhama apquilyitsomacpo valhaay mepqui apyascamco. Apquilanayquic alhta siclho elpasingvotac co Egipto, natamin eyca yoyam elpasingvotac co Asiria.
12 Naysicsa apquiltingyey maa, oyinyoc sat yamyamayin, yoyam olmoc apyovoclhojo. Elpalamoc sat coning, malha nata alimpay yoyam copalamoc. Oyanmongsiclhac sat apquiltemaclha apancaoc co Efraín.
13 Enlhit layi, apquiltomja alhta selyamasma coo. Enatovasacpoc sat ayinyema selinmelhaycam coo. Altamjo inyicje olvomsic tap, sicvita eyca apquilmopvan amyaa.
14 Apquilyimnatasquic apquilpayvam netin apquiltajanma, am conyemac apquilvalhoc. Apquililtamjoc olmecsic nintom najan ningyam uva ayingmenic, apquilyimsasa apyimpeoc. Apquiltomja mataa selinmelhaycam coo.
15 Acyasingvocmec alhta sicyimnatesa apyimpeoc. Yiplovcoc mocjam selinmelhaycam coo.
16 Apquiltingyac mataa quilaycmasquiscama Baal. Apquilyitsomacpo pilhpaalh ápac, actaticponga yanca. Eticyoc sat apquilyimtalhnamo, ayinyema sovo acvinatem, ayinyema apquilantipquiscama sicvisay. Elasmesacpoc sat maa yoclhilhma Egipto — alhta aptomjac Dios Apyimtalhnamo.
© © Biblia en Enhlet (Lengua Norte) © Paraguayan Bible Society, 1995.
