Ongiltamsalhcac sat actamila anco
1 Actamila anco singayo, am colhno asoc acmasis ningatsisquiscama.
Actamila anco acnim ningitsepma, am colhno acnim nintiyaycamlha.
2 Actamila anco ongilpasmoc ningatoynma enlhit, am colhno ningitsovasomalhca. Ningatoynma actomja singyascasingvoyam actemaclha nelha nintiyascam nincoo.
3 Actamila anco ningvinama, am colhno nintemaclha ningitsovascama. Natamin ningvinama, cotniclhac sat actamila anco ingilvalhoc.
4 Yitnec aclhanma ingvalhoc acnim ningitsepma, acyitna inlhojo acyascamco ingvalhoc. Yitnec aclhanma ingvalhoc ningitsovascama, acyitna inlhojo acyeyjamelhma ingvalhoc.
5 Actamila anco singascama enlhit apyascamco, am colhnoc singayo enlhit acyeyjamelhma.
6 Apquitsovascama enlhit acyeyjamelhma, colhojoc talha coning vaynca, apnilhtingayclha apyová (apquilhpajay). Alhto inyicje actema nac jay.
7 Cotniclhac sat acyeyjamelhma ingvalhoc, ningvita inlhojo singminascama (singascama) enlhit. Incaymalhquic ongavojo singmescama nasa asoc.
8 Actamila anco ningilvatescama ningilyataycam, am colhno ningenmo ningilyataycam.
Actamila anco ningiltamilcasomalhco inganco, am colhno ningyimtalhnesomalhco inganco.
9 Incaymalhquic coytic actamilaycam ingvalhoc. Aclom apvalhoc aptemaclha apanco enlhit acyeyjamelhma.
10 Jave nintemaclha nano actomja actamila anco, am colhno nintemaclha as ningvamlha nac jay. Cotnaja ninlhanma actema nac jay, ningilvisay ningyascamco.
11 Intasic anco actemaclha acyascamco ingvalhoc najan actemaclha ningiltamsomalhca as nalhpop (naysicsa ningileyvam). 12 Actamila anco acyascamco ingvalhoc najan solyayem ingac, malha singmasma intomjac naysicsa ningileyvam.
13 Incaymalhquic jingilvoncamejec mataa aptomjaclha Dios. Asoc actajem apquilantipquiscama Dios, mongvanquejec ongilpeyvacsic. 14 Incaymalhquic copayjiclhac ingilvalhoc, nintajanyaa inlhojo actemaclha actamila. Ningiltajanyac sat ancoc actemaclha acmasom, incaymalhquic colhenic ingvalhoc aptomjaclha Dios Visqui ingac. Paj ongilyasamcoc nincoo, yavamlha etnejic mocjam Dios Visqui ingac.
15 Acvitac alhta coo naysicsa sictiyascam acyavatem as nalhpop: Apquilitsepquic alhta enlhit apquiltamilcasomacpo apanco. Am alhta elitsapac enlhit apquilmapsomcaa, apquileyvec alhta aclhamoclhojo años.
16 Mongvanquejec ongilyeycajacsic nintemaclha ningilpeyvomo, mongilyeycajacsejec sat najan nintemaclha ningyascamco. ¿Ningiltamjo ya ongiltovasalhcac inganco?
17 Mongvanquejec ongilyeycajacsic nintemaclha ningmasom, mongilyeycajacsejec sat najan nintemaclha acyeyjamelhma. ¿Ningiltamjo ya ongitsapoc quilhvo?
18 Incaymalhquic ongmeyvoc lhama actemaclha, mongyinyovejec sat moc actemaclha. Ongmiyovalhcac sat, ningyiplovquisa inlhojo actemaclha ayinyema Dios.
19 Actamila anco acyascamco ingvalhoc actomja singyimnatescama, am elhno diez apquilviscaa tingma apvanyam.
20 Naso, paj lhama enlhit as nalhpop aptomja appeyvomo apanco, mepqui inlhojo meyascalhma napato Dios.
21 Incaymalhquic mongilaylhojoc mataa amyaa nipyesicsa ingnaymacoc, comejec sat ingilvalhoc, apquilantipquisa inlhojo ningilvisay enlhit singiltimesaycam. 22 Ningyasamcoc nintemaclha inganco nintipquiscama apquilvisay ingmoc.
Nintingyey actemaclha acyascamco ingvalhoc.
23 Actingyac alhta actemaclha acyascamco ingvalhoc, am otaac coo. 24 Yitnec mocjay anco najan congnoc anco actemaclha acyascamco ingvalhoc, mongvityejec sat mataa.
25 Natamin actingyac alhta moc actemaclha sicyasingvoyam. Altamjoc oyasamcojo ayinyemayaclha acmasom ingvalhoc, ¿naso ya ayinyema nintemaclha inganco?
26 Acyasingvocmec alhta acyimtalhnescama ingvalhoc, actomja actanovmalhca anco, am colhno nintanoncama ningitsepma. Acvisay quilvana actomja singilmam, malha trampa, najan singilpatjetma actengaoc. Ingyinyejic sat enlhit aptomja apvisqui pac Dios, emacpoc sat enlhit meyascalhma, metnaja apvisqui pac Dios.
27 Coo sicvisay Predicador, elyasingvom sat quellhip sicpayvam silanya quellhip: 28 Am otaac mocjam asoc najan actemaclha sitamsama mataa. Nipyesicsa mil enaymacoc sicvita lhama enlhit sicyisponcama coo, am otaac lhama quilvana sicyisponcama. 29 Acyasingvocmec alhta actema nac jay: Dios nic nat apquillanay enlhit appeyvomo, eyca avanjec mataa alquitamsama ingilvalhoc naysicsa ningileyvam.
© © Biblia en Enhlet (Lengua Norte) © Paraguayan Bible Society, 1995.
