Singyinimquiscama ingmoc
1 Dios Visqui ajac. Ingyeylhojo silmalhnancama.
Ingyeylhojo sicpayvam.
2-3 Jeyatingmojo quilhvo nac jay naysicsa ayay evalhoc.
Impilhyinimquic evalhoc siclinga apquilpayvam selinmelhaycam.
Siclinga apquilpalhamaycam apquilmapsomcaa.
Enatovasquic alhta siclingaycamco apquiltemaclha selinmelhaycam.
4 Impilhyinimquic evalhoc coo.
Avanjec siyay coo yoyam omatong.
5 Inlingamcoc ayay evalhoc acyiplomo sicpilhyinamam sicyovoclhojo.
6 Intomjac evalhoc coo:
—Incaymalhquic colhnam elhimpancoc malha valhaay.
Ongvimpac sat coo yoyam olovsic sicyampay.
7 Ongvinyejic sat mocjay, payjoc yoclhilhma actamopeycaoc, yoyam olhic maa.
8 Quilhvoc sat otingya sicyilhanmeycam sicvita inlhojo apquilhcajacmo piyam — intomjac evalhoc coo.
9 Visqui ajac.
Ingyilhpanquis apquilpayvam selinmelhaycam.
Apquiltemalcha apancaoc apquilatingmomap najan apquilnapomap.
10 Apquilvocjac mataa tingma acnim anco najan alhtaa.
Avanjec amyaa natingma nipyesicsa enlhitaoc.
Avanjec apquiltemaclha apquilmapsomcaa.
11 Avanjec apnatovascama apvalhoc tingma.
Avanjec mataa apquilyinimquiscama.
12 Jave enlhit cotnaja ingmoc aptomja seyinmelhaycam.
Evanquic olngamcojo.
Jave enlhit setanoncama aptomja seyinmelhaycam.
Evanquic oyilhanmoc.
13 Lhip nac seyinmelhaycam, aptomja siclhalhma.
Apvisay sictimem emoc.
14 Siclhalhma alhta ninganeyquiclhilha tingma apponquinomap.
Apvisay emoc alhta naysicsa ningilpamejitsomalhca, siclhalhma alhta mataa.
15 Eticyoc sat cotnaja ingmoc.
Elmacpoc sat alyascamaclha ingjangaoc.
Avanjec acmasom apquilvalhoc (apquiltemaclha apancaoc).
16 Coo eyca olmalhnac Dios Visqui ingac.
Jevomsic sat tap.
17 Oliclhangvam sat naysicsa sicvinama sec'a najan actalhnam najan alhtaa.
Ingyeylhojoc sat lhip sicpayvam.
18 Jevomquis tap coo, jemyoc naysicsa ningilnapomalhca.
Aplhamoc mataa selinmelhaycam (cotnaja ingmoc).
19 Dios nic nat Visqui apyimtalhnamo najan as ningvamlha nac jay.
Eyanmongsiclhac sat apquiltemaclha apancaoc.
Am elyanmongcasac mocjam.
Am coyitnac ayay apquilvalhoc napato Dios Visqui ingac.
20 Apquilinmelham mataa apquiltomja apnaymacoc actamilaycam apquilvalhoc.
Apquiltovasquic alhta actemaclha apquilpamejitsomap.
21 Moc actemaclha apquilpayvam.
Malha inyicje acmasis apquilpayvam.
Moc actemaclha apquilvalhoc.
Malha inyicje yoyam elnapacpoc.
Mepqui acmasom apquilpayvam.
Malha mepqui apquilsilhnanomap apanco.
Moc actemalcha apquilvalhoc.
Malha apquilmaycam sovo acvinatem intomjac.
22 Pac ongillhenic napato Visqui ingac actemaclha ingvalhoc.
Ongmiyovalhcac sat.
Jingmeyvoc sat apvita inlhojo nintemaclha ningilpeyvomo.
23 Dios Visqui ajac.
Enatovasacpoc sat ticyovam yapmayc najan apquilmopvancaa amyaa.
Etlhacpoc sat congne malhic (tacjalhop) nalhit acnim.
Lhip semasma coo.
Moyinyovejec mataa lhip.
© © Biblia en Enhlet (Lengua Norte) © Paraguayan Bible Society, 1995.
