Aptalhesquiscama Pedro yoyam elyipsitic Jesucristo apmolhama
1 Coo nac Simón Pedro, sictimem silancam najan sictimem apóstol siyapajasomalhca ayinyema Jesucristo. Actalhoscasquic as vaycajac quellhip, ayinyemaclha acyitna melyasquiyam quellhip acno nincoo lha, actomja malha asoc acmamnave. Mongyasquiyam ayinyema Dios najan Jesucristo singvomquiscama tap aptomja appeyvomo. 2 Altamjoc coo yoyam ellhovamcoc quellhip Dios apcaycaoc yoyam najan coytic actamilaycam apquilvalhoc. Ayinyemaclha apquilyasingvocmec quellhip actemaclha Dios najan Visqui ingac Jesús.
Altamila apquiltemaclha Jesucristo apmolhama
3 Apmopvan innac Dios. Ingilmasquic aclhamoclhojo asoc alaymomalhca nincoo yoyam ongiltimjic nasoc anco ningilayo Dios. Ningilyicpilcangvocmec nincoo Dios aptomja apyimtalhnamo, aptomja singilanem ongilyoclhojo apnaclha. 4 Ingillhicmosquic alhta Dios asoc alyiviy najan asoc altamila yoyam colvac sat. Ningilvatsamquic sat ancoc nintamongvaycmolhma as ningvamlha nac jay, ongilinmalhingvoclhac sat aptemaclha Dios. 5 Eycaso ayinyema sicpayvam silanya quellhip: Elyimnac sat yoyam elsavojo asoc altamila. Yitnec sat ancoc melyasquiyam quellhip, elyiplovquis actemaclha apquiltamilcasomacpo apanco. Natamin elyiplovquis actemaclha apquilyicpilcangviyam. 6 Natamin eltamesap apanco. Natamin elyiplovquis actemaclha apquilinlhanyacmo. Natamin elyiplovquis actemaclha apquilayo Dios. 7 Natamin elyiplovquis actemaclha apquilasicjamacpo nipyesicsa ingilyalhinga. Natamin elyiplovquis actemaclha apquilasicjayo aplhamoclhojo enlhitaoc.
8 Apquilyiplovcasqui inyicje quellhip aclhamoclhojo as asoc. Incaymalhquic elyimnac quellhip yoyam melvatsamquejec. Yoyam cotalhca actemaclha apquilyiplovquiscama, malha ningvitay acyilhna. Coyangvomoc sat apquilyicpilquemo aptemaclha Jesucristo Visqui ingac. 9 Am sat ancoc elyiplovcasac quellhip as asoc, eltimjic sat quellhip malha mepqui apataoc. Inquilvoncacmec actemaclha alhta almascosomalhca melyascalhma. 10 Quellhip elyalhinga. Elyimnac sat quellhip apquiltomja Dios apquilyacyescama najan apquilanem elyoclhojo apnaclha. Apquilinlhanacmec sat ancoc quellhip, melsilhnanacpejec sat. 11 Elvitamcojoc sat quellhip comayjiclhac atong acyiviy acno yoyam elantilhic quellhip actomjaclha apquilnancascama cotmongvoyam nelha. Actomjaclha apquilnancascama apanco Visqui ingac Jesucristo aptomja singvomquiscama tap.
12 Apquilyasamco inyicje quellhip as asoc. Apquilyiplovcasqui inyicje quellhip amyaa actomja nasoc anco. Altamjo eyca olyascasingvoclhojo quellhip. 13 Movanqueje coo moltimnacsic quellhip naysicsa sictiyascam. Altamjoc coo olantiyaponquisojo quellhip, 14 ayinyemaclha camquitvaac yoyam oyinyoc sicmaclha. Eyascasingvocmec alhta Jesucristo Visqui ingac. 15 Altamjoc coo mataa yoyam elyasingvoclhojo quellhip netamin coo amyaa actomja nasoc anco.
Apquilvitaycamco actemaclha apyimtalhnamo Cristo
16 Am alhta oltimnasac quellhip amyaa nano ayinyema enlhit. Ningiltimnasquic alhta actemaclha apmopvan najan apvoyctamlha sat Jesucristo Visqui ingac. Ningvitac alhta nincoo actemaclha apyimtalhnamo Visqui ingac. 17 Ningvitac alhta nincoo actemaclha Dios Ingyapam aptimesquiscama apcayo Apquitca. Aptomjac alhta appayvam Dios apna ayitsayoclhilhma: “Eycaso sictamongvoyam siyasicjayo, acyispaquic coo aptemaclha” —alhta intomjac appayvam. 18 Ninlingay inganco alhta nincoo lha as appayvam ayinyema netin. Ayinyemaclha ningnec alhta lhama Visqui ingac netin inquilhe Dios apyacyescama.
19 Yitnec nincoo quilhvo actomja nasoc anco aclhanma profetas apnatalhescama nano, ayinyema ningvitay alhta. Ellhnasojo sat quellhip lha actema nac nincoo. Elyiplovquis sat mataa as amyaa, actomja malha calevascama ningvitay naysicsa yatescamalhma. Eyca as amyaa cotnejic sat ayitsasquiscamalhma apquilvalhoc, malha apyova apyiviy aptiyapma acvocmo ayitsaca. 20 Elyasamcojo quellhip: Copvanquejec enlhit elhicmocsic apanco Dios appayvam actalhesomalhca. 21 Cotnaja enlhit ayinyema apquillhicmoscama apanco Dios appayvam actalhesomalhca. Eyca ayinyema enlhit apquilponquinomap apquiltomja Dios apquillingascama. Ayinyemaclha Espíritu Santo aptomja apyascasingvoyam apquilvalhoc amyaa ayinyema Dios.
© © Biblia en Enhlet (Lengua Norte) © Paraguayan Bible Society, 1995.
