Apyitquiscama Jesús mayinayclha actic
(Mr 4.1-9Lc 8.4-8)1 Eyca as acnim aptepa alhta Jesús tingma. Apnacmec alhta niyava acyayengviyam. 2 Apquicjingvoctac alhta aplhamoclhojo enlhit apnaclha Jesús. Yejemoc alhta aptalhningvoclho barco, yoyam elhic. Apcanvocmec alhta enlhitaoc nicja yingmin (netin inquilhe). 3 Apquillhicmosquic alhta Jesús aclhamoclhojo asoc actemaclha apyitquiscama:
—Quip elaylhojo. Aplhinquic nic nat apcanma, yoyam epalesam actic. 4 Appalesamquic nic nat actic. Inpalvocmec nic nat nicja actic avalhoc amay. Natamin alhta acpalvaa nata. Intovcamquic nic nat actic. 5 Inpalvocmec nic nat nicja actic tacjalhit mataymong. Acyapaleycaoc nic nat lhopactic netin mataymong. Yejemoc nic nat actepa ayinyema acyapaleycaoc lhopactic. 6 Invaac nic nat netin acnim ayaja majat. Am nic nat inquipmenaoc ma. Yejemoc nic nat acyamamco. 7 Inpalvocmec nic nat nicja actic coning yammeyac. Inquictinquic nic nat yammeyac. Inquimpanatesquic nic nat. 8 Inpalvocmec nic nat nicja actic actamilaclha lhopactic. Inquictinquic nic nat. Inlhamaclhec nic nat acyilhna. Lhama actic nic nat invocmec cien actic. Moc actic invocmec sesenta actic. Moc actic invocmec treinta actic. 9 Ingjaycaoc innac nincoo, pac ongilaylhojo —alhta aptomjac.
Aptemaclha Jesús apquiltimnascama apyitquiscama
(Mr 4.10-12Lc 8.9-10)10 Yejemoc alhta apquilyoctamo apquiltamsoycaoc apnaclha Jesús. Apquiltomjac alhta apquiltamsoycaoc apquilanya Jesús:
—¿Soctomja apquiltimnamcaa nac lhip actemaclha apyitquiscama? —alhta apquiltomjac.
11 Apcatingmavoc alhta Jesús:
—Apvancaac quellhip elyasingvomoc asoc acyilhomalhca acyitsomalhca Visqui netin apquilnancascama. Colapvancaac elyasingvomoc poc enlhitaoc. 12 Yitnec sat ancoc asoc, ongillhoveclhac sat mocjam. Colhamiclhac sat asoc inganco. Yitnec sat ancoc lhama asoc, colhic sat sintapilhquiscaso asoc ingac. 13 Eycaso ayinyema siltimnascama enlhitaoc actemaclha sicyitquiscama. Apquilano inyicje, am eyca elvitac. Apquiljalhno inyicje, am eyca ellingac. Am alyasamcoc amyaa. 14 Invocmec nelha Dios appayvam aplhanma ilhnic nat Isaías, profeta Dios aplingascama:
Apaycaoc inyicje innac quellhip, melyasingvomeje eyca.
Apataoc inyicje innac quellhip, melyicpilcangvomeje eyca.
15 Alyimtalhnama apquilvalhoc as enlhitaoc.
Invoncacmec apaycaoc as enlhitaoc.
Innatincasquic apataoc as enlhitaoc.
Melvityejec sat acna apataoc.
Mellingejec sat acna apaycaoc.
Colyasingvomejec sat apquilvalhoc.
Melyanmongsejec sat apquilvalhoc, yoyam moltamilquiscomoc
—nic nat intomjac appayvam.
16 ‘Apquilinyejemoc anco quellhip. Apataoc innac quellhip, yoyam elvita. Apaycaoc innac quellhip, yoyam ellinga. 17 Actomjac coo silanya quellhip: Apquilvitac quellhip as asoc. Aplhamoc nic nat profetas Dios apquillingascama najan enlhit apquilpeyvomo apquililtamjoc nic nat elvita. Am nic nat elvitayac. Apquililtamjoc nic nat ellinga. Am nic nat ellingayac —alhta aptomjac Jesús.
Appeyvescasquiclha Jesús actemaclha apyitquiscama
(Mr 4.13-20Lc 8.11-15)18 ‘Aptomjac alhta mocjam Jesús: Quip elaylhojo quellhip sicyitquiscama enlhit apquinayclha actic. 19 Am sat ancoc elyasamcoc enlhit apquillingay amyaa Dios apquilnancascama. Acyitsomalhco actic mayinayclha avalhoc amay. Yejemoc acvaa somquic quilyicjamo. Inliquic amyaa almam apquilvalhoc enlhitaoc. 20 Poc enlhit acyitsomalhco actic mayinayclha tacjalhit mataymong. Apquillinga inyicje amyaa. Apquilsovasoc siclho almam apquilvalhoc. 21 Inquilvanamongvocme eyca, malha mepqui inquipmenaoc apquilvalhoc. Apquillingamcoc sat ancoc mactovascama najan malminlhinaycam ayinyema tasic amyaa, eyca pa elvatsamcoc actemaclha apquilinlhanyam. 22 Poc enlhit eyca acyitsomalhco actic mayinayclha coning yammeyac. Apquillinga inyicje amyaa. Moc asoc eyca inquilvanatescacmoc amyaa: Asoc allhanma apquilvalhoc lhalhma anco najan acsilhnanoncama solyayem. Coylhejec acyilhna apquilvalhoc enlhit. 23 Poc enlhit eyca acyitsomalhco actic mayinayclha actamilaclha lhopactic. Apquillingac anco amyaa. Yejemoc apquilmam apquilvalhoc. Inlhamaclhec apyilhna enlhit. Lhama actic invocmec cien actic. Moc actic invocmec sesenta actic. Moc actic invocmec treinta actic —alhta aptomjac Jesús.
Apyitquiscama Jesús apquimjaclha motajap acpalhalhama yammilovqui
24 Apquiltimnasamcaa alhta Jesús moc apyitquiscama.
—Visqui netin apquilnancascama acyitsomalhco aptemaclha ilhnic nat enlhit. Apquinaclhec nic nat actic actamila apquilcacjam. 25 Lhama ilhnic nat acnatenalhco tingma. Apvaac nic nat eyca lhama cotnaja ingmoc. Appalescaac nic nat actic almasomcaa nipyesicsa motajap mayinayclha. Yejemoc nic nat aptajavo mocjam. 26 Apquictinquic nic nat motajap. Invitalhquic nic nat apyilhna. Invitalhquic nic nat najan yammilovqui. 27 Yejemoc nic nat apquilvactamo apquilancam apquiltimnascactamo apvisqui apancaoc: “Visqui, ¿intasi ya alhta actic apquinayclha alhta lhip? ¿Jalhco ayinyemaclha yammilovqui actepa nac?” —alhta apquiltomjac. 28 Apcatingmavoc nic nat apvisqui: “Cotnaja ingmoc nac apquinayclha” —nic nat aptomjac. Apquiltomjac nic nat apquilancam: “¿Apquiltamjo ya lhquip ongapitvoclha?” —nic nat apquiltomjac. 29 Apcatingmavoc nic nat apvisqui: “Paj, noelapit nasa. Apquilaptec sat ancoc yammilovqui eyiplovjoc sat motajap.” 30 Cotnamoc sat siclho lhama acvocmo acnaclhomalhquilha acyilhna. Invocmec sat ancoc acnaclhomalhquilha acyilhna, olanic sat enlhit apquiltomja apquiltamjaycam: “Elyatemen siclho yammilovqui. Elnatejit sat nalhtaa, ongvatniclhac sat maa. Ellhatavoclha sat motajap apactic congne tingma ajac” —nic nat aptomjac.
Apyitquiscama Jesús mosiyov actic
(Mr 4.30-32Lc 13.18-19)31 Apquiltimnasam alhta mocjam moc apyitquiscama Jesús:
—Visqui netin apquilnancascama acyitsomalhco mosiyov actic. Apquinaclhec nic nat actic apquilcacjam, malha mostaza actic. 32 Quitsic anco mosiyov actic, am colhno moc actic lhalhma anco. Inquinalhquic sat ancoc actic, coctong sat. Yejemoc actomja acyiviy, malha yamit. Inpayjingvocmec actingaoc. Avanquic colyinavac nata netin actingaoc —alhta aptomjac.
Apyitquiscama Jesús quilpasmongam apquimpascaoc
(Lc 13.20-21)33 Apquiltimnasam alhta mocjam moc apyitquiscama Jesús:
—Visqui netin apquilnancascama acyitsomalhco quilpasmongam apquimpascaoc. Inpalhacasquic sat ancoc quilvana nipyesicsa motajap, natqui acyacvom inlhojo. Yejemoc apquimpamco apyovoclhojo motajap macyelaquiscama —alhta aptomjac.
Aptemaclha Jesús apquiltimnascama apyitquiscama
(Mr 4.33-34)34 Apquiltimnasamcaa alhta amyaa Jesús actemaclha aclhamoclhojo apquilyitquiscama. Am alhta eltimnasac amyaa mepqui apyitquiscama. 35 Invocmec nelha Dios appayvam aplhanma ilhnic nat profeta Dios aplingascama:
Oltimnasam sat amyaa actemaclha sicyitquiscama.
Oltimnasam sat asoc acyilhomalhca ayenmo siclhoc anco apquillaneya Dios as nalhpop
—nic nat intomjac aplhanma.
Appeyvescasquiclha Jesús apyitquiscama yammilovqui
36 Natamin apquiltimnaycam Jesús apquiltajaclho alhta enlhitaoc. Aptalhningvoclhec alhta Jesús congne tingma. Yejemoc alhta apquilyoctamo apquiltamsoycaoc. Apquiltomjac alhta apquilanya Jesús:
—Jingillhicmos nincoo apyitquiscama yammilovqui ayimja apquilcacjam —alhta apquiltomjac.
37 Aptomjac alhta Jesús apquillhicmosa apquiltamsoycaoc:
—Enlhit aptomja apquinayclha altamila actic sicvisay Sictiyam Sictomja Enlhit. 38 Apquilcacjam acvisay lhalhma anco as nalhpop. Dios apquitquic eyca apquilyitsomacpo actic altamila. Somquic quilyicjamo ayitquic apquilyitsomacpo yammilovqui. 39 Yavey somquic quilyicjamo nac cotnaja ingmoc actomja ayanma yammilovqui. Acnaclhomalhquilha acyilhna acvisay actamongvomlha nelha acnim as nalhpop. Angeles Dios apquilasinancama apquiltomja apnaclheycaoc. 40 Malha inyicje apquilyatemenma yammilovqui, yoyam colvatnalhca talha, sat cotnejic maa actamongvomlha nelha acnim. 41 Elapajacsic sat ángeles apquilasinancama apvisay Aptiyam Aptomja Enlhit. Elansiclhojoc sat aplhamoclhojo enlhit apquilsilhnanoncama najan enlhit melyascalhma (apquilmapsomcaa). 42 Etlhacpoc sat congne malhic talha. Elyipcalham sat maa najan cotovamcoc sat apmaoc. 43 Elapongmatic sat apquilvamlha enlhit apquilpeyvomo Ingyapam apquilnancascama, malha acnim sat eltimjic as enlhitaoc. Ingjaycaoc innac nincoo, pac ongilaylhojo —alhta aptomjac.
Apyitquiscama Jesús asoc acmamnave
44 ‘Aptomjac alhta mocjam Jesús actemaclha apyitquiscama:
—Visqui netin apquilnancascama acyitsomalhco asoc acmamnave acposomalhca amyip. Apvitangvocmec nic nat enlhit asoc acmamnave. Yejemoc nic nat apposeclho mocjam. Aptajaclhec nic nat mocjam. Inpayjeclhec nic nat apvalhoc. Apquilhaquic nic nat aclhamoclhojo apquilnatam. Apyanmoncasquic nic nat amyip —alhta aptomjac.
Apyitquiscama Jesús lamom acmamnave
45 ‘Visqui netin apquilnancascama acyitsomalhco almacenero aptingyey nic nat lamom altamila. 46 Apvitangvocmec nic nat lhama lamom acmamnave anco. Yejemoc nic nat apquilha aclhamoclhojo apquilnatam. Apyanmoncasquic nic nat lamom acmamnave —alhta aptomjac.
Apyitquiscama Jesús yamyamayin
47 ‘Visqui netin apquilnancascama acyitsomalhco yamyamayin malhayquinta yingmin acvanyam. Inquilantalhnec nic nat quilasma alpalhcomalhca. 48 Lhama ilhnic nat aclana yamyamayin. Apquilyinyovasentac nic nat tingyey quilasma netin inquilhe. Yejemoc nic nat apnamcaa. Apquilhatmec nic nat apquillhatam altamila quilasma. Apquilhaquic nic nat altajapma. 49 Sat cotnejic actamongvomlha nelha acnim as nalhpop. Elyacsic sat lhalhma anco ángeles Dios apquilasinancama. Elilhpansic sat enlhit apquilmapsomcaa apquilpalhcomap enlhit apquilpeyvomo. 50 Etlhaoc sat enlhit apquilmapsomcaa congne malhic talha. Elyipcalham sat maa najan cotovamcoc sat apmaoc —alhta aptomjac.
Asoc alhnancoc najan asoc nano
51 Aptomjac alhta Jesús apquilanya enlhitaoc:
—¿Apquilyasamco ya quellhip aclhamoclhojo amyaa siltimnaycam? —alhta aptomjac.
Apquilatingmavoc alhta:
—Eje, ningyasamcoc nincoo —alhta apquiltomjac.
52 Aptomjac alhta mocjam Jesús:
—Apyasingvocmec sat ancoc lhama escriba apyascamco apquiltemaclha amyaa Visqui netin apquilnancascama. Eyitsacpojoc sat ningmolhama inyap acma asoc apanco acmamnave. Apvanquic elcoc mataa asoc alhnancaoc najan asoc nano —alhta aptomjac.
Jesús apna tingma Nazaret
(Mr 6.1-6Lc 4.16-30)53 Lhama alhta apsovja Jesús apquiltimnaycam apyitquiscama. Aplhinquic alhta. 54 Apvoctac alhta actomjaclha apcaoclha apanco. Apquillhicmosquic alhta congne tingma apcaneyquiclhilha. Pilapcasquic alhta enlhitaoc. Apquiltomjac alhta apquilpametamcaa:
—¿Jalhco ayinyema apyascamco as enlhit? ¿Jalhco ayinyema apmopvan aptamjaycam sinpilapquiscama? 55 ¿Jave ya José carpintero apquitca? ¿Jave ya María ayitca? ¿Jave ya apquilyalhinga apquilvisay Jacobo najan José najan Simón najan Judas? 56 ¿Jave ya apquilyalhinga altomja quilvanaa altomja ningmolhama nincoo? ¿Jalhco ayinyema apyascamco as enlhit aclhamoclhojo asoc? —alhta intomjac amyaa aplhenacpo.
57 Apquilnatjavoc alhta enlhitaoc. Yejemoc alhta aptomja Jesús apquilanya:
—Inne inyicje ayasicjavo profeta Dios aplingascama. Apvinacpe eyca mataa actomjaclha tingma pac najan apcaoclha apanco —alhta aptomjac.
58 Am alhta elhamasac aptamjaycam sinpilapquiscama maa. Enlhit alhta ayinyemaclha apquilyasquiyam.
© © Biblia en Enhlet (Lengua Norte) © Paraguayan Bible Society, 1995.
