Apvisqui Manasés nipyesicsa co Judá
(2~Cr 33.1-20)1 Vocmec nic nat doce años aptiyascam Manasés aptimesacpo apvisqui tingma Jerusalén. Aptimec nic nat apvisqui acvaycmo cincuenta y cinco años. Inquin nic nat acvisay Hepsiba. 2 Somcoc nic nat aptemaclha apanco napato Dios Visqui ingac. Apyiplovcasquic nic nat apquiltemaclha apancaoc actomja apquilaoclha, apyinyovquiscama ilhnic nat Dios Visqui ingac napatavo israelitas. 3 Apyap Ezequías nic nat aptovascama acyitnamaclha quilaycmasquiscama. Manasés nic nat apquillanayclha mocjam acyitnamaclha quilaycmasquiscama, najan altares acvatnamaclha asoc macmescama quilaycmasquiscama Baal, najan apquillanay quilaycmasquiscama Asera, acno ilhnic nat apquillanay Acab apvisqui co Israel. Apquiltimec nic nat apquilayo apyovoclhojo apyová, malha apquilviscaa apancaoc. 4 Appiquinquic nic nat altares apquilvatnamaclha quilaycmasquiscama congne tingma apponquinomap, apmaclha Dios Dios tingma Jerusalén. 5 Apquillanac nic nat mocjam altares apquilvatnamaclha nipyava tingma apponquinomap, yoyam colhic ayaco apyová.
6 Apcajac nic nat moclhama apquitquic, eltimjic macmescama quilaycmasquiscama. Aptingyac nic nat mataa quilaney poc, najan apquilyascamco actemaclha yavey. Aplovquic nic nat Dios Visqui ingac, apvita aptemaclha apanco. 7 Appiquinquic nic nat congne tingma apponquinomap quilaycmasquiscama Asera. Eycaso ilhnic nat apmasma Dios Visqui ingac, aptomja ilhnic nat apcanya David najan apcanya Salomón: Olhic sat mataa coo as tingma apponquinomap, silyacyescama coo nipyesicsa apquilmolhama tribus co Israel, tingma Jerusalén. 8 Moyinyovsejec sat mataa as yoclhilhma apquileyvomaclha israelitas, sicmescama alhta siclho apquilyeyjamcaa, apquilyiplovquisa inlhojo siyanamaclha najan siyascamaclha, najan acyovoclhojo apquillhicmoscama selancam Moisés— nic nat aptomjac Dios.
9 Am nic nat eyiplovcasac apvisqui Manasés. Aptomjac nic nat apquilsilhnanoncama enlhitaoc Israel. Inyangvocmec nic nat apquiltemaclha apancaoc, am nic nat colhno apquiltemaclha apancaoc actomja apquilaoclha, apquilantipquiscama ilhnic nat Dios Visqui ingac napatavo israelitas. 10 Yitnec nic nat Dios Visqui ingac appayvam, apquillingascama profetas: Quip elaylhojo sicpayvam. 11 Avanjec alhta apsilhnanoncama enlhitaoc apvisqui Manasés. Somcoc anco aptemaclha apanco, am alhta colhno apquiltemaclha amorreos apquilictingam apmamyi. Aptimescasquic alhta elsilhnanacpoc apanco enlhitaoc payjoc acyitnamaclha quilaycmasquiscama. 12 Eycaso sicpayvam Dios Visqui apancaoc Israel. Ellingamcojoc sat acyimtalhnama apyovoclhojo Jerusalén najan apyovoclhojo Judá. Cascoc sat apjaycaoc, apquillinga inlhojo amyaa. 13 Oyanmongsiclhac sat apquiltemaclha apancaoc co Jerusalén, colhojoc sat sicyanmongsayclha apquiltemaclha apancaoc co Samaria najan aptovana apvisqui Acab alhta. Omascoscomoc sat apquileyvam natingma, elhojoc sat tingma asoc payjem ayalhnayo acpaycomalhca. 14 Poc enlhit ajancaoc apquilaymomap, olyinyovsic sat apquilmaclha, elmacpoc sat nipyesicsa cotnaja ingmoc, elhojoc sat apquilyamonquilhma nipyesicsa maa. 15 Somcoc anco apquiltemaclha apancaoc najato, seltovascama coo yoyam olvoc, ayenmo alhta sicyinyovquiscama yoclhilhma Egipto, acvaycmo as ningvamlha nac jay — alhta intomjac appayvam — nic nat aptomjac profeta.
16 Avanjec nic nat apsilhnanoncama apvisqui Manasés nipyesicsa co Judá. Avanjec nic nat aptanoncama Dios aptemaclha apanco. Apcapajasquic nic nat eticyoc apnaymacoc mepqui apquilmapsomcaa natingma Jerusalén. Invitalhquic nic nat ayinyem ema apancaoc apticyovam. 17 Yitnec nic nat mocjam amyaa actalhesomalhca aptemaclha apanco Manasés, najan aptemaclha apsilhnanomap apanco napato Dios, acvisay vaycajac crónicas apquilviscaa co Judá. 18 Apquitsepquic nic nat Manasés, apcatoynacpec nic nat ayimjaclha ilhnamoc apvisqui tingma pac, acvisay amyip apanco Uza. Aptimesacpec nic nat apquitca Amón, etnejic apvisqui apya'monquiscama apyap ninga.
Apvisqui Amón nipyesicsa co Judá
(2~Cr 33.21-25)19 Vocmec nic nat veintidós años aptiyascam Amón aptimesacpo apvisqui. Aptimec nic nat apvisqui tingma Jerusalén acvaycmo dos años. Inquin nic nat acvisay Mesulemet, inyap nic nat apvisay Hazur apna tingma Jotba. 20 Somcoc nic nat aptemaclha apanco napato Dios Visqui ingac, acno ilhnic nat aptemaclha apanco apyap Manasés. 21 Aptomjac nic nat apcayo quilaycmasquiscama, acno ilhnic nat aptemaclha apcayo quilaycmasquiscama apyap. 22 Apquilvatasquic nic nat apcayo Dios Visqui apancaoc apquilyeyjamcaa, mengyajalhenmo apmajayoclha Dios.
23 Apquilinmelham nic nat singilpilhtetemo apquilviscaa, apquilaja congne apvisqui tingma pac. Apmatnec nic nat Amón. 24 Apquilpasmeclhec nic nat enlhitaoc, elnapoc apquilviscaa singilpilhtetemo. Apquiltimescasquic nic nat apquitca Josías, etnejic apvisqui apya'monquiscama apyap ninga.
25 Yitnec nic nat mocjam amyaa actalhesomalhca aptemaclha Amón, acvisay vaycajac crónicas apquilviscaa co Judá. 26 Apcatoynacpec nic nat amyip apanco Uza. Aptimesacpec nic nat apvisqui apquitca Josías, apya'monquiscama apyap ninga.
© © Biblia en Enhlet (Lengua Norte) © Paraguayan Bible Society, 1995.
