Actemaclha acmasca ingyimpejic
1 Jingmeyvoc sat Visqui ingac, apvita inlhojo ningapeycam enlhit mepqui asoc.
Ningilinyejemo sat ontimjic.
2 Jingiltamilsic sat Visqui ingac, jingilmeyvoc sat.
Ningilinyejemo sat ontimjic lhalhma anco.
Ongilmiyovalhcac sat napatavo apquilmapsomcaa.
3 Jingiltamilquiscomoc sat naysicsa ningmasquem singajem.
Ontimjic sat ningyimnatem naysicsa acmasca ingyimpejic.
4 Actomjac alhta siyanya:
—Visqui, jeyasicjojo coo. Jetamilquisquim coo.
Naso, sicmasom coo napato lhip, ayinyema sictemaclha ajanco — alhta actomjac coo.
5 Apquiltomjac mataa selinmelhaycam sellhena coo:
—¿Quilhvo ya ingyitsapoc?
¿Quilhvo ya comascoc apvisay apanco? — apquiltomjac.
6 Aptomjac alhta maycaa sicnaclha.
Mepqui alhta actamilaycam apvalhoc.
Aptajaclhec alhta maycaa acyiplomo aplingascama movan amyaa selhena coo.
7 Apcaneclhec maa selinmelhaycam elantipsic sicvisay.
Apquilanem acyanmongayclha sicsilhnanomalhca ajanco — intomjac apquilvalhoc.
8 Yavey actovascama apvalhoc, metamalvomeje.
Metyisamejec sat mocjam — alhta apquiltomjac sellhena coo.
9 Lhama sictimem emoc alhta.
Sictomó lhama alhta sictom, aptasic alhta.
Aptomjaclhec seyinmelhaycam quilhvo nac jay (apyimtalhnesacpec apanco).
10 Lhip Visqui ingac. Jemyov coo.
Jetamilquisquim sat coo.
Oyanmongsiclhac sat mocjam apquiltemaclha selinmelhaycam.
11 Oyicpilcojoc sat aptemaclha seyasicjayo lhip.
Sicvita inlhojo mepqui apquilyimtalhnamo enlhit selinmelhaycam.
12 Coo eyca mepqui sicsilhnanomalhca ajanco.
Jemyov sat mataa coo napato lhip.
13 Aptasic apanco Visqui ingac.
Innec ayaco Dios Visqui apancaoc Israel apquilmolhama cotmongvoycamlha nelha.
Nasoc anco (Amén).
© © Biblia en Enhlet (Lengua Norte) © Paraguayan Bible Society, 1995.
