Apquiltajayclha israelitas apquilmomap
1 Covac sat acnim, yoyam cotsovacsojoc sat yoclhilhma actamopeycaoc, colvitalhcac sat ilhnamoc, avanjec ayitsovascama.
2 Colvitalhcac sat aclhamoclhojo ilhnamoc, avanjec anco ayitsovascama. Dios Aptimesquiscama actamila anco, acno inquilhe Líbano, acno inquilhe Carmelo najan amyip acvanyam Sarón ayictinquiscama ninganma. Elvitac sat enlhitaoc gloria mayayoclha Dios Visqui ingac apyimtalhnamo.
3 Elyimnaticsojo sat enlhit melyimnatem, elyimnaticsojo sat apquilyampay.
4 Eltime sat elanic alpilapiyam apquilvalhoc: ¡Elvascap mocjam, noela nasa quellhip! ¡Quip elanojo Dios singvomquiscama tap! ¡Eyanmongsiclhac sat apquiltemaclha apancaoc cotnaja ingmoc! — sat eltime elanic.
5 Colhnam sat mocjam apataoc enlhit mepqui apataoc. Colhnam sat apjaycaoc enlhit mepqui apjaycaoc.
6 Elnilhtong sat malha popyit enlhit mepqui alhta apquillhingam. Elpalhamam sat mocjam mepqui alhta apquilpayvam. Cotalhcac sat mocjam acyitnamaclha yingmin yoclhilhma actamopeycaoc, cotniclhac sat ayinyem yingmin.
7 Cotalhcac sat yingmin acyayengviyam payjoc yoclhilhma actamopeycaoc, aclhamoclhojo alantiyapmaclha yingmin. Cotalhcac sat ayimjaclha yammamoc najan moc ayimjaclha, payjoc aleyvomaclha yamvavo chacales.
8 Cotalhcac sat maa amay actamila, apquiltimec acvisay Amay Acponquinomalhca. Colapvanquejec elyiplaclha as amay metnaja Dios apquilyacyescama, najan enlhit acyeyjamelhma apquilvalhoc.
9 Cotjanyalhquejec sat as amay asoc navjac aclom, paj najan yamacmeyva. Eltajanyacpoc sat enlhit apquilvomsomap tap, apquilmomap siclho.
10 Dios Visqui ingac ayinyema apquilvomquiscama tap, elmiyantac sat tingma Jerusalén naysicsa acpayjayclha apquilvalhoc, comasquejec sat mataa acpayjayclha apquilvalhoc naysicsa apquileyvam. Apquilinyejemoc sat eltimjic. Comascoc sat mataa actemaclha acmayovsa apquilvalhoc najan apquiliclhangveycam — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
