LIBRO IV
Salmo 90—106
Aptemaclha Dios Visqui ingac
1 Visqui ingac, lhip aptomja ningyilhanmeycam aclhamoclhojo acnim alhta.
2 Apnec nic nat mataa lhip Visqui ingac cotmongvoycamlha nelha.
Apnec nic nat lhip cotyapmaclha mocjam inquilhe najan cotyapmaclha as nalhpop najan aclhamoclhojo asoc lhalhma anco.
3 Lhip ayinyema ningitsepma yoyam ongiltimiclhac nincoo lhopactic.
Aptomjac nic nat lhip apcanya:
—Quellhip enlhitaoc, eltimiclha sat mocjam lhopactic — nic nat aptomjac lhip.
4 Naso, acyavataclhojo intomjac mil años napatoc lhip.
Malha lhama acnim alhta intomjaclhac.
Malha ningiljalhneycam alhtaa alhta intomjac.
5 Apquilvonquipquic alhta enlhitaoc, lhip alhta apmascosquiyam.
Malha nintiyanma alhta apquiltomjac.
6 Malha paat alyimseleycaoc alhta apquiltomjac.
Alyimseleycaoc intomjac mataa alhtoo, ilhnamoc innamcoc.
Inquiljalhec mataa actalhnam, inyamamqui.
7 Naso, lhip aplom actomja singmascosquiyam.
Lhip aplom ayinyema ningillhinganingvoyam.
8 Apvitac lhip nintemaclha ningilmasomcaa.
Appiquenaclhec ayalhnaclhojo alquitamsama ingvalhoc almasomcaa.
9 Naso lhip aplom ayinyema apmascoscama ningileyvam.
Inmasquec ningileyvam, malha ningvatipnapma intomjac nintamin.
10 Ningileyvec nincoo acvamlha setenta años.
Acvoncaclhojo mataa ningileyvam acvoyacmo ochenta años.
Avanjec mataa ninlingaycamco najan nintamjaycam naysicsa ningileyvam.
Inquilvonquipquic mataa quilhvo aclhamoclhojo años.
Acno nincoo lha quilhvoc ongilvonquepiclha.
11 ¿Soc enlhit apyasamcoc acvamlha aplom lhip?
¿Soc enlhit apcaca actemaclha aclom apvalhoc lhip?
12 Jingillhicmos sat acvamlha acnim yoyam ongileyoc mocjam.
Coytic sat acyascamco anco ingvalhoc.
13 Visqui ingac, ivota sat ningnaclha.
Vamlha itne aplom.
Ingyapyovsojo sat elanojo lhip apquilancam.
14 Iyancasojo singasicjayo alhtoo.
Ongilitsovacsojoc sat mataa.
Copayjiclhac sat mataa ingilvalhoc aclhamoclhojo acnim.
15 Aclhamoclhojo años alhta ninlingaycamco acyimtalhnama.
Ilhnasojo sat lhip acvamlha acpayjayclha ingilvalhoc.
16 Ingyane sat elvitac lhip apquilancam najan aptovana, actemaclha apcanamaclha lhip najan actemaclha apyimtalhnamo lhip.
17 Lhip Dios Visqui ingac, jingimliclhojo mataa nincoo.
Visqui ingac, iyancasojo sat actemaclha nintamjaycam nincoo.
Naso, iyancasojo sat actemaclha nintamjaycam.
© © Biblia en Enhlet (Lengua Norte) © Paraguayan Bible Society, 1995.
