Mil años
1 Natamin acvitac alhta lhama ángel apvayventamo apquinyema netin. Apsoycam alhta apmic catquiscama atong malhic congno. Apsoycam alhta najan cadena acyiviy. 2 Appatjitquic alhta ángel sinavocpo actomja acvisay nano nimisma, moc acvisay yavey diablo najan yavey Satanás. Apquilpilhtitquic alhta cadena acvaycmo mil años. 3 Apyinyovquic alhta congne malhic. Apcapeclhec alhta atong. Apyimnatesquic alhta atong yoyam colcalhqueje. Cotyepejec sat mocjam acvaycmo mil años yoyam cosilhnanejec mocjam enlhitaoc apnaycam lhalhma anco. Natamin mil años colhic sat acpanamaclho acyavataclhojo yavey Satanás.
4 Natamin acvitac alhta aclhamoclhojo Visqui apquiltajanem. Apnam alhta apquilyimtalhnamo netin apquiltajanem yoyam eltimjic apquilyicpilquemo. Acvitac alhta najan apquiljangaoc apticyovam alhta nano, ayinyema apquillingascama alhta nano apvisay Jesús najan apquillingascama Dios appayvam. Am alhta elpayasoc nano asoc navjac aclom najan quilaycmasquiscama anco. Am alhta colcajasalhca payjaclha napaat inlhoyqui laa apmic. Inquilyimnavocmec alhta mocjam apnenyaoc apticyovam nano. Apquilviscaa alhta apquiltomjac apquillhalhmaa Cristo acvocmo mil años. 5 Eycaso acvisay ningnalhaticjangvoycamlha amamyi. Am alhta colyimnavocmoc mocjam apnenyaoc poc apquilmasquingvaycmo nano acvocmo natamin mil años. 6 Apquilinyejemoc enlhitaoc najan apquilyacyesomap apquiltomja yoyam enalhaticjangvomoc apmamyi. Melmasquingvomejec sat mocjam ayinyema moc ningitsepma. Eltimjic sat apquilancam Dios najan apquilancam Cristo. Eltimjic sat apquilviscaa apquillhalhmaa Cristo acvaycmo mil años.
7 Invocmec sat ancoc mil años colhic sat acyamyeclha singilpilhtetomaclha yavey Satanás. 8 Colhong sat yoyam colsilhnana aplhamoclhojo enlhitaoc lhalhma anco. Colhong sat yoyam colsilhnana enlhitaoc apnaycam yoclhilhma Gog najan Magog. Colansiclhac sat singilpilhtetemo yoyam colanic elnapacpoc. Aplhamoclhojo maa enlhitaoc, malha lhopactic anic mongmovan ongilyipsitic. 9 Appayjeclhec enlhitaoc lhalhma anco. Apquilvocjingveclho apnamcaclha Dios apmolhama najan tingma apcasicjamap. Yejemoc alhta acpalentamo talha ayinyema netin. Insovjoc alhta talha enlhitaoc. 10 Inyinyovalhquic alhta yavey diablo actomja alsilhnanoncama naysicsa talha acvanyam macpalhaquiscama azufre acpayesayclha talha. Inyinyovalhquic alhta lhama asoc navjac aclom najan profeta apmopvan amyaa. Comasquejec sat mataa allingaycamco acmasca acnim najan alhtaa cotmongvoycamlha nelha.
Singyicpilquemo acyitnaclha Visqui aptajanem acmopoy
11 Natamin acvitac alhta Dios aptajanem apanco acyiviy acmopoy. Acvitac alhta Dios apma netin aptajanem acyiviy. Malha ayinyem alhta intomjac as nalhpop najan netin napato Dios apma netin aptajanem. Am alhta colvitalhcac mocjam. 12 Acvitac alhta apquilmasquingvaycmo nano. Apcanam alhta napato Dios apquilvanyam najan apquitcaoc. Innec alhta almayesamco vaycajac. Najan moc vaycajac acyitna apquilvisay enlhitaoc acyimnatem apnenyaoc. Innec alhta alyicpilco apquilmasquingvaycmo nano acno allhanma vaycajac acnatalhesomalhca, actemaclha apquilyiplovquiscama melitsepmaclha alhta.
13 Apquilantiyapvocmec alhta naysicsa yingmin acvanyam apquilmasquingvoyam nano. Apquilantiyapvocmec alhta poc apquilitsepma nano najan poc apnaycam alyascamaclha ingjangaoc. Innec alhta alyicpilco actemaclha apquilyiplovquiscama melitsepmaclha alhta. 14 Inyinyovalhquic alhta naysicsa talha acvanyam acvisay ningitsepma najan acvisay alyascamaclha ingjangaoc. Eycaso talha acvanyam acvisay moc ningitsepma. 15 Am sat ancoc coyitnac apvisay actalhesomalhca vaycajac acyitna apquilvisay enlhit acyimnatem apnenyaoc, yiplovcoc apyinyovmap naysicsa talha acvanyam.
© © Biblia en Enhlet (Lengua Norte) © Paraguayan Bible Society, 1995.
