Moclhama nincoo
1 Aptomjac alhta Dios Apyimtalhnamo seyanya coo: 2 ¿So actomja yi? Inlingalhquic mataa nipyesicsa co Israel apquillhanmaclha nano: Aptovcamquic alhta enlhitaoc uva acyilhna lapamcaa, apquilvita apquitquic asic apmaoc — intomjac apquillhanmaclha. 3 Nasoc sicpayvam silanya quellhip: Mellhenejec sat mataa apquillhanmaclha nano nipyesicsa quellhip. 4 Coo ajancaoc apyovoclhojo enlhitaoc as nalhpop, najan apyapmayc, najan apquitquic. Enlhit apsilhnanomap apanco, ematong sat.
5 Enlhit appeyvomo aptingyac mataa nintemaclha acpeyvomo. 6 Mepasmejec mataa aptoycaoc apitic netin inquilhe, naysicsa apquilayo quilaycmasquiscama. Metnejec mataa apcayo quilaycmasquiscama nipyesicsa co Israel. Metingyejec mataa quilvana cotnaja aptava. Mepatjetamquejec mataa aptava naysicsa acyamasma actom. 7 Metvacsejec mataa poc, acyitna inlhojo apmaycaoc nasa. Aptajesquic mataa aplhoy asoc monquinatquiscama apmaycaoc nasa. Meminyilhejec mataa. Memyovejec mataa aptom, napato mayic ayajem. Memyovejec mataa aptalhnama, napato mepqui aptalhnama enlhit. 8 Memejec mataa intereses ayinyema apmaycaoc nasa poc. Impeyvoc mataa apyicpilquemo naysicsa apquilpeyvescasquiclha amyaa. 9 Aptomja apyiplovquiscama siyanamaclha najan siyascamaclha. Nasoc anco aptomja appeyvomo, emyovacpoc sat naysicsa aptiyascam — alhta aptomjac Dios.
10 Apnec sat ancoc apquitca apmapsom apticyovam inyap, acyitna aptemaclha apanco. 11 Mepqui alhta aptemaclha apanco apyap. Appasmec mataa aptoycaoc apitic netin inquilhe, acyiplomo apcayo quilaycmasquiscama. Aptingyac mataa quilvana cotnaja aptava. 12 Aptovasquic mataa enlhit mepqui asoc, mepqui apquilnatam, aptomja apminyilhma. Mepqui aptajescama asoc monquinatquiscama apmaycaoc nasa. Aptomja apyiplovquiscama najan apcayo quilaycmasquiscama. 13 Apmam mataa intereses ayinyema apmaycaoc nasa poc. Copvanquejec etyisam mocjam as enlhit. Apyiplovcasquic mataa actemaclha sictanoncama coo, ematong sat as enlhit, ayinyema apsilhnanomap apanco — alhta aptomjac Dios.
14 Aptomjac alhta mocjam: Apnec lhaja apquitca as enlhit, apvita inlhojo aptemaclha apanco apyap, aptemaclha apanco apsilhnanomap apyap. Am eyiplovcasac mataa aptemaclha apanco apyap. 15 Mepasmejec mataa aptoycaoc apitic netin inquilhe, naysicsa apquilayo quilaycmasquiscama. Metnejec mataa apcayo quilaycmasquiscama nipyesicsa co Israel. Metingyejec mataa quilvana cotnaja aptava. 16 Metvacsejec mataa poc, acyitna inlhojo apmaycaoc nasa poc. Aptajesquic mataa aplhoy asoc monquinatquiscama apmaycaoc nasa poc. Meminyilhejec mataa. Memyovejec mataa aptom napato mayic ayajem. Memyovejec mataa aptalhnama, napato mepqui aptalhnama enlhit. 17 Metvacsejec mataa poc. Memejec mataa intereses ayinyema apmaycaoc nasa poc. Aptomja apyiplovquiscama siyanamaclha najan siyascamaclha coo. Emyovacpoc sat as enlhit. Mematnejec sat acya'mongam apsilhnanomap apanco apyap — alhta aptomjac.
18 Aptomjac alhta mocjam: Apyap alhta aptovascama mataa poc, aptomja apminyilhma, aptomja apmapsom nipyesicsa apnaymacoc. Ematong sat ayinyema apsilhnanomap apanco. 19 Eltimjic selanya quellhip: ¿So actomja yi? ¿Apsilhnanomap apanco apyap, mematneje ya lhama apquitca? — sat eltimjic. Aptingyac mataa nintemaclha acpeyvomo apquitca, apyiplovquiscama mataa siyanamaclha coo: naso etyisam sat, mematnejec sat. 20 Ematong sat aptomja apsilhnanomap apanco. Mematnejec mataa apquitca ayinyema apsilhnanomap apanco apyap. Mematnejec mataa apyap ayinyema apsilhnanomap apanco apquitca. Elhcac sat acyanmongam enlhit appeyvomo. Colhic sat acyanmongseclho aptemaclha apanco apmapsom — alhta aptomjac Dios — nic nat aptomjac profeta.
Aptemaclha appeyvomo Dios
(Ez 33.10-20)21 Aptomjac alhta mocjam: Apyanmoncasquic sat ancoc moc apvalhoc enlhit apmapsom, apquilvatesa aptemaclha apanco. Apyiplovcasquic sat ancoc siyanamaclha najan siyascamaclha najan nintemaclha acpeyvomo, nasoc anco emyovacpoc, mematnejec sat maa. 22 Melhenejec sat mataa aptemaclha apmapsom nano. Emyovacpoc sat ayinyema aptemaclha appeyvomo. 23 Altamjoc coo mengyitsepejec enlhit apmapsom, omyoc sat mataa sicvita inlhojo apyanmonquiscama moc apvalhoc. Eycaso sicpayvam sicvisay Dios — alhta aptomjac.
24 Aptomjac alhta mocjam: Apquilvatasquic sat ancoc apyiplovquiscama enlhit nintemaclha acpeyvomo. Nasoc anco apyiplovquiscama nintemaclha acmasom. ¿Apvanqui ya emyovacpoc as enlhit? Coyitnamejec mocjam ejatic aptemaclha alhta appeyvomo. Ingyitsapoc sat ayinyema apsilhnanomap apanco najan aptemaclha apquilvatescama appeyvomo. 25 Apquilanayquic quellhip motnaja sicpeyvescasquiclha acpeyvomo. Quip elaylhojo quellhip enlhitaoc Israel. ¿Apquilanayqui ya quellhip motnajac sicpeyvomo? Jave coo sicmasom, quellhip eyca apquilmapsomcaa. 26 Apquilvatasquic sat ancoc enlhit aptemaclha appeyvomo, etniclhac mocjam apmapsom. Ingyitsapoc sat ayinyema aptemaclha apanco apmapsom. 27 Moc actemaclha. Apquilvatasquic sat ancoc aptemaclha apanco apmapsom enlhit. Apyiplovcasquic sat ancoc nintemaclha acpeyvomo, emyovacpoc sat. 28 Apyicpilcangvocmec sat ancoc acvisay acmasom, apquilvatasquic sat ancoc aptemaclha apanco apmapsom mengyitsepejec sat maa, emyovacpoc sat — alhta aptomjac.
29 Aptomjac alhta mocjam: Quellhip enlhitaoc Israel apquilanem motnaja sicpeyvomo coo. Quellhip eyca meltomja apquilpeyvomo. 30 Olyicpilcojoc sat quellhip, opquiniclhac sat ayalhnaclhojo apquilvalhoc moclhama quellhip, ayinyema apquiltemaclha apancaoc. Eycaso sicpayvam sicvisay Dios. Vamlha eltime quellhip apquiltemaclha apancaoc, vamlha otnesquisic actemaclha apquilsilhnanomap apanco, elmiyvacpoc sat maa. 31 Elvatsaoc sat quellhip apquiltemaclha apancaoc, actomja seyinmelhaycam coo. Eltingya sat apquilvalhoc alhnancoc, acyiplomo apquiltemaclha alhnancoc. ¿Apquililtamjo ya elmasquingvomoc quellhip? 32 Coo eyca altamjoc olmeyvoc quellhip. Elvatsaoc quellhip apquiltemaclha acmasom, elmiyovacpoc sat — alhta aptomjac Dios — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
