Evac sat singvomquiscama tap
1 Aptomjac nic nat profeta: Quellhip co Jerusalén, elpenacsojo yoyam eltajanyac apquilimpocjay. Apquilvocjac cotnaja ingmoc, yoyam elmoc apvisqui co Israel, elngamcojoc sat acyimtalhnama.
2 Tingma Belén yoclhilhma Efrata, apquitcoc as tingma nipyesicsa apquilmolhama Judá. Ingyinyemac sat maa apvisqui apancaoc Israel. Apvisay aptavin niptamin apquilyeyjamcaa nanoc nat.
3 Melmiyovejec sat mocjam Dios Apyimtalhnamo enlhitaoc Israel, acvaycmo acnim, yoyam cotimsic ayitca lhama quilvana. Ingyaniclhac sat mocjam apquilmolhama Israel apquilhpaneycam nano.
4 Etnejic sat apvisqui apquiltamilquiscama apnaymacoc. Colhic sat actamilaycam apquilvalhoc enlhitaoc. Etnejic sat apyimtalhnamo apanco apvisqui lhalhma anco as nalhpop.
5 Evac sat aptomja singmescama actamilaycam ingvalhoc. Ellanac sat apquilimpocjay co Asiria, elnatovacsic tingma ingac apquiltamila. Ongilapajacsic sat siete apquilviscaa najan ocho enlhit apquilyimtalhnamo.
6 Eltimjic sat apquilviscaa yoclhilhma Asiria, apcaoclha ilhnic nat Nimrod. Jingilyinyovsic sat cotnaja ingmoc apquilvisay asirios, apquilvoya inlhojo apquilimpocjay ningaoclha nincoo.
7 Apnam enlhit apquilaymomap Jacob aptovana niptamin nipyesicsa enlhitaoc lhalhma anco. Ellhojoc sat yalya ayinyema Dios Apyimtalhnamo, malha yingmin acmamay payjoc ayimjaclha paat, acvoy anco acmamay, jave enlhit aptimesquiscama.
8 Apnam enlhit apquilaymomap apquilmolhama Jacob (aptovana niptamin) nipyesicsa enlhitaoc lhalhma anco. Ellhojoc sat yamacmeyva asoc navjac aclom, actomja alnapma nipquesic congne aplhancoc. Cosavojoc sat alnapma, mepqui apcaymomap lhama.
9 Lhip Dios visqui ingac, esavojoc sat lhip apquilnapma cotnaja ingmoc — nic nat aptomjac profeta.
10 Eycaso appayvam Dios Apyimtalhnamo: Olnapoc sat apquilquinamtem nolhing, onatovacsic sat carros apancaoc.
11 Onatovacsic sat tingma apancaoc apquilvanyam, najan tingma apquilyilhanmomaclha.
12 Osavojoc sat silnapma apquilyojolhma najan apquilmaycam nipyesicsa quellhip.
13 Onatovacsic sat quilaycmasquiscama najan mataymong apquilmalhnancamaclha. Colapvanquejec mocjam eltimjic apquilayo quilaycmasquiscama, apquillanay apanco quellhip.
14 Ongvaptic sat moclhama yamit alponquinamalhca. Osavojoc sicnatovascama tingma apquilvanyam apancaoc.
15 Naysicsa siclom oyanmongsiclhac sat apquiltemaclha apancaoc melilyajayquiclho sicpayvam enlhitaoc lhalhma anco — alhta aptomjac Dios — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
