Mardoqueo najan Amán
1 Nalhit acnim nic nat intomjac. Apcanyacpec nic nat Amán, Hamedata apquitca Agag aptavin, etnejic sat aptamjaycamó lhama apvisqui Asuero nipyesicsa enlhitaoc. 2 Apquilanyacpec nic nat apyovoclhojo apquiltimesaycam apvisqui tingma pac, elticlhic mataa aptapnaoc, apvitacpo inlhojo apyeycajay Amán. Eycaso apcanama ilhnic nat apvisqui Asuero. Am nic nat coyacmoc elyejiclhojo Mardoqueo.
3 Apquililtamjoc nic nat elyasamcojo apquiltimesaycam mayayo, aptemaclha Mardoqueo, melyajayquiclho apvisqui appayvam. 4 Apquilnasoc nic nat apquilmalhnaycam aclhamoclhojo acnim, am nic nat elyajaclhoc mataa Mardoqueo. Aplingac nic nat Amán aptemaclha Mardoqueo apvisay judío. 5 Aplovquic nic nat Amán aplinga amyaa melyajayquiclho Mardoqueo. 6 Pilapcasquic nic nat aplinga apvisay judío. Inquitamquic nic nat apvalhoc, yoyam ematong Mardoqueo, yoyam eticyoc sat najan apyovoclhojo apnaymacoc judíos lhalhma anco yoclhilhma apcanamaclha Asuero.
Amyaa yoyam eticyoc judíos
7 Año alhnancoc alhta, lhama piltin, moc apvisay Nisán. Aptimec nic nat doce años apvisqui Asuero, apquilyasingvocmo ayinyema apquilmaycam sicas napato Amán, yavamlha eltimjic. Apquilyasingvocmec nic nat acnim trece najan piltin doce, moc apvisay piltin Adar, yoyam elsavojoc sat apquilnapma judíos.
8 Aptomjac nic nat Amán apcanya Asuero: —Lhip visqui mayayo. Apquileyvec mataa ningileyvomaclha poc apquiltemaclha enlhitaoc. Yitnec mataa apquiltemaclha apancaoc, mepqui apquilyajayquiclho lhip appayvam. Ilapajas sat lhip, montimjic ningilpalhquemalhca. 9 Apquiltamjoc sat ancoc lhip, ilapajas sat lhip apcanamaclha actalhesomalhca, yoyam eticyoc apyovoclhojo judíos. Coo eyca ongvansiclhac sat 330.000 kilo de plata, colhic acmesa apquilviscaa acyitnamaclha solyayem — nic nat aptomjac.
10 Apliquic nic nat anillo pac apcatquiscama apopjejic, apmesa Amán, aptomja apquinmelhaycam judíos. 11 Aptomjac nic nat apvisqui apcanya: Imyov sat plata lhip. Apquilnapma judíos, itne sat apquiltamjoclha etnejic — nic nat aptomjac.
12 Invocmec nic nat trece acnim najan piltin lhama (primer). Apquilanyacpec nic nat secretarios aptalhosaycaoc apvisqui tingma pac, yoyam eltalhosquisic vaycajac apcanamaclha apvisqui rey, elyipsitic sat apquilviscaa yoclhilhma najan mayayo nipyesicsa enlhitaoc. Intalhesalhquic nic nat apquilpayvam apancaoc moclhama apquileyvomaclha provincia. Yitnec as vaycajac firma apvisay apanco apvisqui Asuero najan sello pac. 13 Apquilsaclhesquic nic nat vaycajac apquilsoycam amyaa lhalhma anco. Intomjac nic nat amyaa actalhesomalhca: —Eticyoc sat apyovoclhojo enlhitaoc judíos, najan apquilyimnanic najan apquilvanyam, najan sicaa najan quilvanaa. Elnajap sat lhama acnim, acvisay trece najan piltin doce, moc apvisay Adar. Elsavojo sat apquilnatam apancaoc apticyovam — nic nat intomjac vaycajac.
14 Apquilpayesquic nic nat as apcanamaclha apvisqui lhalhma anco yoclhilhma apquileyvomaclha enlhitaoc, yoyam elpenacsojo, acvaa inlhojo as acnim. 15 Apquilsaclhesquic nic nat vaycajac apquilsoycam amyaa. Inquilyipsatalhquic nic nat vaycajac natingma Susa. Apquillanac nic nat anmin ato apvisqui najan Amán. Intiyacmec nic nat apquilvalhoc apnaycam natingma Susa.
© © Biblia en Enhlet (Lengua Norte) © Paraguayan Bible Society, 1995.
