Malyacyescama siete diáconos
1 Lhama alhta aplhameclho enlhit melyasquiyam tasic amyaa (cristianos). Apquilmalyevam alhta napocja actomja appayvamo lhama griego. Apnaymacoc actomja apquilaoclha apanco alhta apquillhenacpoc. Innec alhta alayingvocmo griego lhintampaa allhoy nintom. Inquillhovamquic alhta acvamlha judíos lhintampaa. 2 Apcaneclhec alhta apóstoles apquilapajasomap. Apcansaclhoc alhta aplhamoclhojo enlhit melyasquiyam tasic amyaa apquilpamejitsa:
—Somco inyicje ongyinyoc Dios appayvam, yoyam ongmilascoc nintom, yoyam ongiltamilsic asoc alaymomalhca. 3 Ingilyalhinga, elyacyes sat nipyesicsa quellhip siete enlhit apquilpeyvomo. Apquiltomja acma apquilvalhoc Espíritu Santo najan apquilyascamco. Ongilasinac sat etnejic apquiltamjaycam. 4 Nincoo eyca ongilinlhanmojoc sat ningilmalhnancama najan ningillhicmoscama Dios appayvam —alhta apquiltomjac.
5 Apquilyispaquic alhta apquillinga apquillhanma. Apcanyacpec alhta Esteban. Enlhit aptomja meyasquiyam najan acma apvalhoc Espíritu Santo. Apcanyacpec najan Felipe najan Prócoro najan Nicanor najan Timón najan Parmenas najan Nicolás appalhavoy apquinyema tingma Antioquía. 6 Yejemoc alhta apnalantamo apnamcaclha apóstoles apquilapajasomap. Lhama alhta apquilmalhna apninquina alhta eyca apmeoc apyitsicsaoc.
7 Inpayjeclhec alhta Dios appayvam. Aplhameclhec alhta enlhit melyasquiyam tasic amyaa tingma Jerusalén. Melyasquiyam alhta apquiltomjac aplhamoclhojo sacerdotes.
Apmomap Esteban
8 Apnec alhta Esteban. Apmopvan alhta innac ayinyema Dios Ingyapam. Appasmec alhta mataa Dios Ingyapam. Apquillanac alhta asoc sinpilapquiscama najan asoc monquinatquiscama nipyesicsa enlhitaoc. 9 Apquiltanovam alhta napocja apquilinyema apcaneyquiclhilha acvisay Esclavos Libertados. Najan napocja apquilinyema tingma Cirene najan tingma Alejandría najan yoclhilhma Cilicia najan yoclhilhma Asia. Apquilatingmacpec alhta Esteban. 10 Am alhta colapvancaac elyacsilhma appayvam. Apquiltimnasam alhta actemaclha apyascamco apna apvalhoc Espíritu Santo. 11 Yejemoc alhta aptingyacpo enlhit, yoyam etipquisquisam apvisay. “Ninlingac alhta apquiltimnaycam as enlhit apquinmelhaycam Moisés najan apquinmelhaycam Dios Ingyapam” —alhta apquiltomjac aplhenacpo Esteban. 12 Apyinimcasquic alhta olhma enlhitaoc najan apquilvanyam najan apquilyascamco apquiltemaclha. Apquilpatjitquic alhta Esteban. Apquilyantamaclhec alhta apnamcaclha apquilviscaa apquilpamejitsomap. 13 Apquiltingyac alhta enlhit apquillhanma inyicje apquillingay, yoyam eltimjic apquilmopvan amyaa. Apquilpamejitsa alhta:
—Apquilinlhanacmec as enlhit aplheneycam apmapsom tingma apponquinomap. Najan aplheneycam acmasom apcanamaclha Dios. 14 Ninlingac alhta aplhanma Esteban: “Jesús co Nazaret etvacsic sat as tingma apponquinomap. Jingillhicmocsic sat moc nintemaclha acyanmongayclha nintemaclha nano singanama nic nat Moisés.
15 Yejemoc alhta apquiltamsacpo apquilaneyo apquilviscaa apquilpamejitsomap. Malha ángel napaat alhta intomjac apquilano.
© © Biblia en Enhlet (Lengua Norte) © Paraguayan Bible Society, 1995.
