Apquillanay tingma apponquinomap
1 Yitnec nic nat amyaa ayinyema Dios profeta Hageo najan profeta Zacarías, Ido apquitca, apquilanyacpo co Judea najan co Jerusalén. 2 Apnam nic nat Zorobabel, Salatiel apquitca najan Josué, Josadac apquitca. Apquiltamjam nic nat apquilpasmeyquiclha ellana mocjam tingma apponquinomap tingma Jerusalén. Apquilpasmec nic nat mataa profetas Dios apquilasinancama.
3-4 Apnec nic nat apvisqui Tatnai vatsam Éufrates, payjoc actalhningvamlha acnim. Poc nic nat Setar-boznai najan apnaymacoc, apquililtimnascactac nic nat: —¿Co laa ayinyema apcanama ellanacpoc mocjam tingma apponquinomap najan yamit actemaclha apquilpaclhanma? ¿Co laa apquilvisay apquiltamjaycamó lhama? — nic nat apquiltomjac. 5 Am nic nat elinmelhacpoc judíos ellanac tingma, ayinyema appasmom Dios. Inlhenquic nic nat apquilvalhoc eltalhosquisic vaycajac apvisqui Darío, elyasamcojo yavamlha eltimjic.
6 Eycaso acvisay anit vaycajac acno moc siclho, yoyam elyipsitic apvisqui Darío. Aptalhescama ilhnic nat vaycajac Tatnai, najan Setar-boznai najan apnaymacoc apquillhalhmaa apvisqui yoclhilhma vatsam Éufrates, payjoc actalhningvamlha acnim. 7-8 Intomjac nic nat vaycajac:
Lhip visqui ingac. Coytic sat lhip mataa actamilaycam apvalhoc. Pac ongilyascasingvomoc lhip ningiltomja alhta maycaa yoclhilhma Judá. Ningvitac alhta Dios tingma pac apponquinomap. Mataymong alyivey alhta apquillanomap as tingma. Quilhvoc apquillanay tingma napocja yamit nicjaa. Avanjec alhta apquilvascapma apquillanay tingma. 9 Ningilmalhnaquic alhta apquillhinquiscama apquillanay tingma, ayinyemayaclha apcanamaclha, yoyam ellanacpoc as tingma najan yamit acpaclhanma. 10 Ningilmalhnaquic alhta apquilvisay, yoyam colhic actalhesa apquilvisay apquillhinquiscama apquillanay tingma, yoyam elhcac sat lhip as vaycajac. 11 Apquiltomjac alhta singilanya: —Ningiltomjac ningilayo Dios apyimtalhnamo, apquillanay nic nat netin najan as nalhpop. Ningillaneclhec nincoo tingma apponquinomap, siclhoc nat apquillanay lhama visqui apyimtalhnamo nipyesicsa enlhitaoc Israel. 12 Yitnec nat siclho apquilsilhnanomap apanco apquilyeyjamcaa napato Dios apna netin. Yiplovcoc nat apquilmomap, apnalayclha nat apvisqui Nabucodonosor yoclhilhma Babilonia. Co Caldea ilhnic nat apvisqui, aptomja aptovascama tingma apponquinomap. 13 Niptamin maa apvisay nat Ciro aptomja apvisqui co Babilonia. Apcanama nat, colhic allana Dios tingma pac apponquinomap.
14 Ingiltimnasquic alhta amyaa, apquilpatmaoclho asoc apquilmaycam oro najan plata, ayinyema nat tingma apponquinomap tingma Jerusalén apnincanma congne acyitnamaclha quilaycmasquiscama apancaoc co Babilonia. 15 Apcanama nat apvisqui Ciro, yoyam eltajicsojo mocjam apquilmaycam. Innec nat acmesa as asoc yatapvisqui Sesbasar, apcanyacpoc nat elpatmaoclha asoc apquilmaycam, colninquinalhcac sat congne tingma apponquinomap. Apcanama nat Ciro, ellanacpoc mocjam tingma apponquinomap apyitnamaclha siclhoc nat. 16 Apmiyaclhec nat Sesbassar tingma Jerusalén ellanac tingma apvajac najan apquillanay netin as tingma apponquinomap. Am alhta elsovjac mocjam tingma apponquinomap.
17 Quip ingyeylhojo visqui Darío. Isavojo sat apquilyipsatem vaycajac acnatalhesomalhca nano tingma pac apvisqui Babilonia. Nasoc lhaja apcanama nat apvisqui Ciro, colhic allana tingma apponquinomap tingma Jerusalén. Jingiltalhosquis sat lhip visqui ingac vaycajac, ongilyasamcojo yavamlha ontimjic — alhta apquiltomjac singilanya — nic nat intomjac vaycajac.
© © Biblia en Enhlet (Lengua Norte) © Paraguayan Bible Society, 1995.
