Asoc yoyam colvac sat
1 Aptomjac nic nat Dios Apyimtalhnamo: Quellhip layi apquiltamilquiscama sicnatoscama nipquesic. Apquilhpanec alhta sicnatoscama, apquillhinganacmec alhta, mepqui alhta apquiltamilquiscama quellhip — alhta aptomjac.
2 Dios Visqui apancaoc enlhitaoc Israel, aptomja alhta apquilanya apquilviscaa: Apquilhpancasquic alhta quellhip enlhitaoc apquilyitsomacpo sicnatoscama. Apquilinyajasquic alhta quellhip mepqui apquiltamilquiscama quellhip. Quellhip apquiltomja apquilmapsomcaa. Oyanmongsiclhac sat apquiltemaclha apancaoc. Naso coo sicpayvam sicvisay Dios. 3 Coo sat ongvansiclhac mocjam sicnatoscama apquilaymomap, apquilhpaneycam moc yoclhilhma. Onalovsingvoclhac sat mocjam, elhnam sat ayimjaclha paat. Elhamiclhac sat mocjam sicnatoscama apquilyitsomacpo enlhit. 4 Otingyasquisic sat apquilancam, yoyam eltamilquisic mataa. Melacyejec sat mataa sicnatoscama, melhnanmejec sat lhama. Naso coo sicpayvam sicvisay Dios.
5 Aptomjac alhta Dios apquilanya: Incovac sat acnim, yoyam etyamoc sat apvisqui David aptavin. Etnejic sat apvisqui apyascamco, aptemaclha appeyvomo najan aptemaclha appeyvescasquiclha appeyvomo.
6 Mepqui apquilnapomap eltimjic sat apquilmolhama Judá, mepqui apquilinmelhamap enlhitaoc Israel. Iltamjacpoc sat apvisay: Singvomquiscama tap nac Visqui ingac — alhta aptomjac Dios Apyimtalhnamo.
7 Aptomjac alhta Dios apquilanya: Incovac sat acnim, yoyam elvatsamcoc apquiltemaclha apquillhanma mepqui apquilyeycajascaoc: Visqui ingac aptomja singvomquiscama tap singyinyovquiscama yoclhilhma Egipto ningilvisay israelitas. 8 Ellhenic eyca mepqui apquilyeycajascaoc: Visqui ingac aptomja apnalovsingvoyclha israelitas yoclhilhma nilhqueyja najan moc yoclhilhma lhalhma anco apquilhpaneycam siclho — sat eltimjic maa. Elhnam sat mocjam actomja apquilaoclha — alhta aptomjac Dios — nic nat aptomjac profeta.
Apquillhenamap profetas apquilmapsomcaa
9 Aptomjac alhta Jeremías apquilanya poc profetas: Aclingac coo sepamejitquiscama Dios Visqui ingac. Avanjec acpilhyinamam evalhoc najan actiyam evalhoc. Malha anmin seyajem, ayinyema acyivey sicyam. Aptomjac seyanya Visqui ingac:
10 Avanjec apquilmapsomcaa enlhitaoc lhalhma anco, apquilvisay apquilyamasma. Avanjec apquiltemaclha apancaoc mepqui apquilpeyvomo. Aptovasquic Visqui ingac ningaoclha nincoo, inyamamquic ayimjaclha paat, malha actomja acmeta — alhta aptomjac.
11 Aptomjac alhta mocjam: Apquilmapsomcaa profetas najan sacerdotes, mepqui actamilaycam apquilvalhoc. Yitnec apquiltemaclha apancaoc congne tingma ajac apponquinomap.
12 Elyiplaclhac sat amay yatescama olhma, elyingacpoc sat, elpilapmoc sat maa. Otnesquisic sat apquillingaycamco acyimtalhnama. Eycaso sicpayvam sicvisay Visqui apancaoc — alhta aptomjac.
13 Aptomjac mocjam Visqui ingac: Acvitac alhta profetas co Samaria, apquiltemaclha selvenéycam coo. Apquillingasquic amyaa naysicsa apquillhanma acvisay quilaycmasquiscama Baal, apquiltemaclha apquilsilhnanoncama enlhit ajancaoc.
14 Acvitac coo profetas co Jerusalén apquilmapsomcaa apanco, am elhno poc. Apquilmopvancaa amyaa, apquilyinimquiscama, apquilyamasma apnatamcaa. Apquilsilhnanaquic mataa enlhit apquilmapsomcaa, colapvanquejec elyanmongsic apquilvalhoc. Acyitcasquic coo as enlhit apquiltemaclha nic nat co Sodoma najan co Gomorra.
15 Eycaso sicpayvam sicvisay Visqui sicyimtalhnamo, silanya profetas: Olmecsic sat asoc acmasca najan veneno ayingmenic, yoyam elyinamcoc. Apquiltemaclha profetas co Jerusalén, apquilsilhnanoncama apyovoclhojo enlhit as apquileyvomaclha — alhta aptomjac.
16 Aptomjac mocjam Visqui ingac: Quellhip israelitas, noelyiplovcasojo nasa quellhip apquilpayvam as profetas, apquiltomja apquilmopvancaa amyaa, jave coo ayinyema apquillingascama apancaoc.
17 Apquiltomjac apquilanyacpo selvenéycam coo: Sas mataa, mepqui amyaa. Apquiltomjac apquilanyacpo apquilmapsomcaa: Meltajanyejec sat acmasom quellhip — apquiltomjac maa.
Jeremías appayvam
18 ¿Soc profeta apyasamcoc asoc acyilhamalhca napato Visqui ingac? ¿Soc aplinga najan apvita Visqui ingac appayvam? Paj elyasamcoc apmajayoclha Visqui ingac.
19 Visqui aplom pac acyitsomalhca alhcajayam, malha yatepiyam huracán, aptovascama enlhit apquilsilhnanomap apanco.
20 Comasquejec sat aplom pac Dios acvaycmo apsovjomo aclhanmaclha apvalhoc. Incovac sat acnim, yoyam elyicpilcangvomoc sat quellhip, najan colmoc apquilvalhoc as asoc — alhta aptomjac.
Profetas apquilmopvancaa amyaa
21 Aptomjac mocjam Visqui ingac: Jave silapajascama coo as profetas, mepqui silasinancama. Apquilpecjasquic alhta ellingacsic coo sicvisay.
22 Apquilyasamcoc alhta ancoc asoc acyilhamalhca, eltimjic alhta nasoc anco apquillingascama sicpayvam, yoyam elyanmongsic apquilvalhoc naysicsa apquiltemaclha almasomcaa — alhta aptomjac.
23 Aptomjac alhta mocjam Visqui ingac: Jave coo Visqui sicna ningato, jelanic quellhip. Coo sicna mocjay, sictomja silapajascama quellhip.
24 Copvanquejec enlhit eyilhanmoc, oticlhac sat coo. Coo nac sicmaclha netin lhalhma anco najan as nalhpop lhalhma anco. Eycaso sicpayvam — alhta aptomjac.
25 Aptomjac mocjam: Aclingac alhta apquiltemaclha apquilmopvan amyaa as profetas, apquilanem alvitay apquilvanmoncama, yoyam ellingacsic sicvisay. 26 ¿Co sat acvam elvatsamcoc sat apquilyinimquiscama najan apquillingascama ayinyema apquilvalhoc aclhinganyam? 27 Apquillhenquic mataa acvitay apquilvanmoncama nipyesicsa apnaymacoc, yoyam colvoncamoc sicvisay nipyesicsa enlhitaoc, acno alvoncayam apquilyeyjamcaa, apquiltomja apquilayo quilaycmasquiscama Baal. 28-29 Incaymalhquic profeta acvitay apvanmoncama elhenic napatavo enlhit, cotnaja amyaa ayinyema Dios. Yitnec sat ancoc amyaa ayinyema coo, incaymalhquic profeta elngacsic actomja nasoc anco. Noelquinatquis nasa acvisay actic ningimposcay, najan moc acvisay ayimpeoc. Coo sicpayvam acyitsomalhca talha, najan acyitsomalhca martillo nimpalhcatma mataymong acyivey. Eycaso sicpayvam sicvisay Visqui apancaoc — alhta aptomjac.
30 Aptomjac mocjam Visqui ingac: Ongvinmelham sat as profetas apquiltomja apquilminyilhma poc apanco appayvam, apquilanem ayinyema coo sicpayvam — alhta aptomjac. 31 Ongvinmelham sat as profetas apquillhanma apquilpayvam apanco, apquilanem ayinyema coo sicpayvam. 32 Ongvinmelham sat as profetas apquillingascama amyaa, malha acvitay apquilvanmoncama. Apquiltomja eyca apquilsilhnanoncama enlhit ajancaoc. Jave silasinancama as profetas, colapvanquejec elyascasingvomoc enlhitaoc. Eycaso sicpayvam sicvisay Visqui apancaoc — alhta aptomjac.
Apcanyomap Jeremías
33 Aptomjac alhta seyanya Visqui ingac: Lhip Jeremías, elmalhnacpoc sat lhip ayinyema sacerdote, najan poc profeta, najan poc enlhit, etnejic ingyanic: ¿Yitne ya asoc acyimtalhnama ayinyema Visqui ingac? — sat etnejic. Ingyatingmojo sat lhip: Quellhip apquiltemaclha apancaoc actomja acyimtalhnama, eyinyoc sat Visqui ingac asoc acyimtalhnama. 34 Aplingac sat ancoc lhip mocjam aplhanma profeta, najan sacerdote, najan poc enlhit: soc asoc acyimtalhnama ayinyema Visqui ingac, oyanmongsiclhac sat aptemaclha apanco najan apquiltemaclha familia. 35 Elmalhnacpojo sat nipyesicsa quellhip: ¿Yitne ya appayvam ayinyema Visqui ingac? Pac ongilyasamcojo apcatingmaycam Visqui ingac — sat eltime quellhip. 36 Elvatsaoc sat quellhip apquilpayvam: asoc acyimtalhnama ayinyema Visqui ingac. Elngamcojoc sat quellhip acyimtalhnama, acyitna inlhojo mocjam apquilpayvam quellhip. Apquillhinganimcasquic quellhip appayvam ayinyema Dios apyimtalhnamo, aptomja Dios Visqui apancaoc apyimtalhnamo — alhta aptomjac.
37 Ilmalhna sat profetas: ¿Yitne ya appayvam ayinyema Visqui ingac? Pac ongilyasamcojo apcatingmaycam Visqui ingac — sat itne. 38 Aplingac sat ancoc appayvam: asoc acyimtalhnama ayinyema Visqui ingac. Ingyatingmojo sat lhip: Aptomjac alhta Visqui ingac singilanya: Apquilsilhnanomap apanco quellhip ayinyema apquilpayvam singascama Visqui ingac, yoyam ongillhenic. 39 Oyinyoc sat quellhip, malha sicyamasma asoc acyimtalhnama, najan tingma apquillhoy quellhip najan apquilyeyjamcaa. Etlhacpoc sat mocjay quellhip. 40 Ellingamcojoc sat quellhip macvenéycam najan apquilmancactama cotmongvoycamlha nelha — alhta aptomjac Visqui ingac.
© © Biblia en Enhlet (Lengua Norte) © Paraguayan Bible Society, 1995.
