Moc actemaclha ninpayvam yoyam ongilpamejitsic Dios
1 Elinlhanmojo sat quellhip apquiltemaclha apquilasicjayo. Elvascap sat yoyam ellhovac sat apquilmopvan ayinyema Espíritu apanco Dios actemaclha apquillingascama amyaa ayinyema Dios. 2 Apvanquic sat ancoc enlhit moc actemaclha appayvam yoyam epamejitsic Dios. Aplingac mataa Dios actemaclha appayvam, am eyca elyasamcoc mataa apnaymacoc. Actemaclha aplhanma ayinyema Espíritu apanco Dios actomja malha asoc acyilhomalhca. 3 Apvanquic sat ancoc enlhit elngacsic amyaa ayinyema Dios, alyasamcojoc sat mataa apnaymacoc actemaclha aplhanma. Eycaso aplhanma actomja acyimnatescama ingvalhoc najan actomja acyascasingvoyam ingvalhoc najan actamilquisquiyam ingvalhoc. 4 Enlhit apmopvan moc actemaclha appayvam aptomja apyimnatescama apanco apvalhoc. Eyca enlhit apmopvan elngacsic amyaa ayinyema Dios aptomja apquilyimnatesquiscama apquilvalhoc Jesucristo apmolhama.
5 Altamjo inyicje coo eltimjic quellhip apquilmopvan moc actemaclha apquilpayvam. Avanjec siltemo eltimjic quellhip apquilmopvan elngacsic amyaa ayinyema Dios yoyam cotnejic alyimnatesquiscama apquilvalhoc Jesucristo apmolhama. Am colhnoc enlhit apmopvan moc actemaclha appayvam. Apvanquic sat ancoc epeyvescasiclha moc actemaclha appayvam, cotnejic sat najan alyimnatesquiscama apquilvalhoc Jesucristo apmolhama. 6 Acvoclhec sat ancoc nipyesicsa quellhip, ¿evanqui ya olpamejitsic moc actemaclha sicpayvam yoyam colyimnatesquisic apquilvalhoc quellhip? Ayanayquic coo, paj. Actamila anco oltimnacsic quellhip actemaclha singyascasingvoyam Dios najan actemaclha ningyascamco actomja nasoc anco najan actemaclha amyaa ayinyema Dios najan actemaclha singillhicmoscama.
7 Pac oyitsic actemaclha ninpayvascama yammamoc najan yatalhpong. Am coyimnaac yammamoc najan am eyimnaac yatalhpong. Am sat ancoc cotamilac acpáyvam, mongilyasamquejec sat ayinyemayaclha acpáyvam actemaclha acpayvascama. 8 Apquilpayvasquic mataa trompeta apquilpayvascama amamyi apquilnapomap. Am sat ancoc cotamilac acpáyvam trompeta, melyasamquejec sat singilpilhtetemo yoyam elimpiclha. 9 Innoc najan quellhip apquilmopvan moc actemaclha ninpayvam. Am sat ancoc cotamilac apyamongam apquilpayvam, mongilyasamquejec sat actomjaclha aplhanma. Cotnejic sat malha lhcajayam ninlingay. 10 Inlhamoc actemaclha ninpayvam lhalhma anco actomja altamila anco. 11 Am sat ancoc oyasamcoc actomjaclha aplhanma, ingyanic sat cotnaja sictemolhama. Ongvanic sat coo lha metnaja sictemolhama. 12 Apquililtamjoc sat ancoc ellhovac quellhip singaycaoc ayinyema Espíritu apanco Dios, eltingya sat cotlaycaoc singaycaoc ningmovan, yoyam colyimnatesic apquilvalhoc Jesucristo apmolhama.
13 Apquililtamjoc sat ancoc elpamejitsic quellhip moc actemaclha apquilpayvam. Incaymalhquic elilmalhnac quellhip Dios yoyam elapvanic elpeyvescasiclha actomjaclha apquillhanma. 14 Actimec sat ancoc moc actemaclha sicpayvam naysicsa silmalhnancama, cotnejic sat acpamejitquiscama sicvanmoncama. Moyasamquejec coo actomjaclha acpayvam sicvanmoncama. Ayinyemaclha cotnaja sicpayvam ajanco. 15 Altamjoc mocjam yoyam copamejitsic sicvanmoncama. Altamjoc najan olmalhnac mataa actemaclha sicyascamco sicpayvam. Altamjoc yoyam comnaycmacsic sicvanmoncama. Altamjoc najan omnaycmacsic actemaclha sicyascamco sicpayvam. 16 Inquilmalhnaquic sat ancoc lhip apvanmoncama, copvanquejec ingmoc etnejic ingyanic: Nasoc anco, ayinyemaclha meyasamquejec actomjaclha appayvam. 17 Actamila anco almalhnancama lhip apvanmoncama. Jave eyca actomja yoyam coyimnatesic apvalhoc ingmoc. 18 Actimec coo gracias Dios sicmovan moc actemaclha sicpayvam, am olhnoc quellhip. 19 Actamila anco yoyam oltimnacsic Jesucristo apmolhama anit sicpayvam yoyam elyasamcojo, am colhno aclhamoclhojo moc actemaclha sicpayvam yoyam melyasamqueje.
20 Quellhip elyalhinga. Noeltime nasa malha sicaa. Eltime sat enlhit apquilyascamco. Eltime sat malha sicaa colyiplovquiscama acmasom. Eltime sat malha apquilvaneycaoc elyasamcojo asoc. 21 Intomjac nic nat Dios appayvam actalhesomalhca: “Eycaso Dios appayvam. Pac olpamejitsic as enlhitaoc moc actemaclha sicpayvam najan apquilpayvam poc aptemaclha enlhit. Melaylhojoc sat sicpayvam” —nic nat aptomjac Dios. 22 Incaymalhquic ellaylhojo moc actemaclha ninpayvam metnaja Jesucristo apmolhama. Incaymalhquic Jesucristo apmolhama ellaylhojo actemaclha ninlingascama amyaa ayinyema Dios. 23 Elyasamcojo quellhip. Apcaneyclhec sat ancoc aplhamoclhojo Jesucristo apmolhama yoyam elpamejitsic moc actemaclha apquilpayvam. Apquilantalhningvoctac sat ancoc metnaja Jesucristo apmolhama, etnejic sat ellhenacpoc quellhip: “Alyeyjamelhma nac quellhip” —sat eltimjic. 24 Apcaneyclhec sat ancoc quellhip yoyam ellingacsic amyaa ayinyema Dios. Aptalhningvoctac sat ancoc metnaja Jesucristo apmolhama. Comoc sat apvalhoc amyaa apquillingascama quellhip. Eyasingvoclhojoc sat actemaclha meyascalhma. 25 Ayalhnaclhojo sat coyitniclha aptemaclha napatavo quellhip. Elticlhoc sat aptapnaoc yoyam elmalhnac sat Dios etnejic apcayo. Sat etnejic ingyanic: “Nasoc anco nac apna Dios nipyesicsa quellhip” —sat etnejic.
Elsavojo sat actemaclha nintamilquiscamo
26 Quellhip elyalhinga. Eycaso actomja actemaclha nintamilquiscamo: Apcaneyclhec sat ancoc quellhip, incaymalhquic lhama ingyalhing etnejic apmamyi ningminaycmascama salmo. Poc sat elhicmocsic Dios appayvam. Poc sat elhenic amyaa apyasingvoyam ayinyema Dios. Poc sat epamejitsic moc actemaclha appayvam yoyam epeyvescasiclha actomjaclha aplhanma. Incaymalhquic yoyam colyimnatesic apquilvalhoc Jesucristo apmolhama. 27 Apquililtamjoc sat ancoc elpamejitsic moc actemaclha apquilpayvam. Incaymalhquic epamejitsic siclho lhama, natamin poc, natamin mocjam poc, vamlha sat. Poc sat eyca etnejic appeyvescasquiclha actomjaclha apquilpayvam. 28 Am sat ancoc elhnac apmopvan epeyvescasiclha actomjaclha apquilpayvam. Elvanma sat, noelpametam nasa moc actemaclha apquilpayvam naysicsa apcaneyquiclha. Incaymalhquic acvamlha apquilvanmoncama colpamejitsic Dios. 29 Yitnec sat ancoc amyaa ayinyema Dios yoyam ellingacsic. Incaymalhquic ellhicmocsic apcanit, tasic najan apnatqui. Poc sat eyca yoyam elpamejitsacpojo alhayi actomjaclha amyaa apquillingay. 30 Apnec sat ancoc lhama ingyalhing aptomja apyasingvoyam amyaa ayinyema Dios. Incaymalhquic elvaticsic siclho aptomja apquiltimnaycam apmamyi. Natamin eyca eltimnam sat ingyalhing. 31 Apvancaac aplhamoclhojo quellhip ellingacsic amyaa ayinyema Dios. Incaymalhquic mataa moclhama yoyam colyasingvomoc apquilvalhoc Jesucristo apmolhama. 32 Enlhit aptomja aplingascama amyaa ayinyema Dios incaymalhquic eltamacsic apvalhoc apanco yoyam evanma. 33 Am eyispac mataa Dios nintemaclha mepqui singiltamescama ingvalhoc. Apyispaquic mataa actemaclha actamilaycam ingvalhoc.
Yitnec actamila nintemaclha nipyesicsa Jesucristo apmolhama lhalhma anco. 34 Covanquejec ingyalhing quilvana cotnejic aclingascama tasic amyaa nipyesicsa Jesucristo apmolhama. Incaymalhquic quilvanaa colilyejiclhojo actemaclha singanama Dios appayvam. 35 Inquililtamjoc sat ancoc colyasamcojo actemaclha Dios appayvam. Incaymalhquic colilmalhna tingma ancaoc anatamcaa. Am cotamilo actemaclha quilvana cotnejic allhicmoscama naysicsa ninpayvam.
36 Elyasamcojo quellhip. Jave ayinyema quellhip Dios appayvam. Quilhvo eyca apquillhocac quellhip Dios appayvam. Colapvanquejec quellhip elyiplovsic moc actemaclha. 37 Apnec sat ancoc aplingascama amyaa ayinyema Dios nipyesicsa quellhip. Apnec sat ancoc ingyalhing apna apvalhoc Espíritu apanco Dios. Incaymalhquic elyasamcojo silanama quellhip actomja singanamaclha Visqui ingac. 38 Am sat ancoc eyiplovcasac actomjaclha siclhanma, melhenacpejec sat napato Dios.
39 Quellhip elyalhinga. Elvascap sat quellhip yoyam ellingacsic amyaa ayinyema Dios. Noelmiyov nasa elpamejitsic moc actemaclha apquilpayvam. 40 Elsavojo sat actemaclha nintamilquiscama nintemaclha.
© © Biblia en Enhlet (Lengua Norte) © Paraguayan Bible Society, 1995.
