Actemaclha anit ingvalhoc
1 Apquicjingvoctac alhta enlhit appintalhnama. Apquilyenacpec alhta enlhitaoc. Inquiltamalhquic alhta mataa poc apmancoc. Yejemoc alhta apquiltimnasamcaa Jesús. Apquiltamsoycaoc alhta apquilpamejitcasac siclho:
—Elavojo anco apquimpascaoc fariseos, moc ningiltimem actemaclha anit apquilvalhoc. 2 Cotalhcac sat asoc ayapomalhca. Colngalhcac sat acvisay asoc acyilhomalhca. 3 Colngalhcac sat amyaa naysicsa ayitsayolhma actomja apquiltimnascama quellhip naysicsa yatescamalhma. Amay sat elyimnaticsojoc apquilpayvam quellhip eliltimnasam amyaa apquiltomja apquilmalyevasomap congne tingma mayapayclha atong —alhta aptomjac Jesús.
Ningilanyomalhca ongilavojo
(Mt 10.26-31)4 “Actomjac coo siyanya quellhip enaymacoc: Mongacyejec nincoo enlhit, yoyam jingilnapoc ningyovoclhojo. Colapvancaac jintimesquisic mocjam moc. 5 Pac olhicmocsic, yoyam ongavojoc nincoo. Ongavojoc nincoo actomja apmopvan jingilnapoc najan jingilapajacsic cosponeyaclha talha. Actomjac coo siyanya mocjam: Naso, ongavojoc maa.
6 “¿Naso ya anit solyayem ayitcoc acyanmongam cinco nata ayitcoc? Paj lhama nata ayitcoc alvoncayam Dios. 7 Inquilyipsatomalhquic najan ingva inpatcoc. Mongacyejec nincoo. Ningiltasi (ningmamnave) nac nincoo, am ongnoc aclhamoclhojo nata ayitcoc —alhta aptomjac Jesús.
Ninlhanma apvisay Jesucristo napatavo enlhitaoc
(Mt 10.32-33Mt 12.32Mt 10.19-20)8 “Actomjac coo siyanya quellhip: Coo nac Sictiyam Sictomja Enlhit. Apquillhenquic sat ancoc quellhip sicvisay nipyesicsa apnaymacoc, olhenic sat coo apquilvisay quellhip napatavo ángeles Dios apquilasinancama. 9 Apquilyinimcasquic sat ancoc quellhip apquilanem mejeyicpilcac, elyinimsacpoc sat quellhip napatavo ángeles Dios apquilasinancama.
10 “Ningiltovascasam sat ancoc apvisay Aptiyam Aptomja Enlhit (Jesús), comascosalhcac sat. Ningiltovascasam sat ancoc apvisay Espíritu Santo, comascosalhquejec sat.
11 “Innec sat ancoc acnalaclho quellhip tingma apcaneyclhilha najan ningyicpilcomalhcoclha najan napatavo apquilviscaa, nocolquitam nasa apquilvalhoc apquilpayvam, yoyam elatingmojo. 12 Cotlapsic sat elhicmocsic quellhip Espíritu Santo, yoyam elatingmojo quellhip —alhta aptomjac.
Singascama cascama ningilnatam
13 Lhama enlhit nipyesicsa apnaymacoc aptomjac alhta apcanya:
—Visqui, ingyane sat javoc ingyilhpansic nicja asoc apquillhoy. Nicja sat coo jelmesic —alhta aptomjac.
14 Apcatingmavoc alhta Jesús:
—Lhip emoc. ¿Soc lha actomja siyanyalhco otnejic sicyicpilquemo najan sicyayescama nicja apquilnatam? —alhta aptomjac.
15 Aptomjac alhta mocjam:
—Elavojo quellhip actemaclha ningmayjayo ongyeycajasalhcojo ningilnatam. Jave aclhamoclhojo ningilnatam actomja acyimnatescama ingnenyic —alhta aptomjac.
16 Apquiltimnasamcaa alhta Jesús actemaclha apyitquiscama:
—Apnec nic nat lhama enlhit ningilnatam inyap. Avanjec nic nat acnaclhomalhquilha acyilhna. 17 Yejemoc nic nat aclhena apvalhoc ningilnatam inyap: “¿Jalhco sat otnejic? Paj sicnincanmaclha acyilhna.” 18 Natamin aclhena nic nat apvalhoc: “Va, sat eyca olanac maa. Pac olcoc siclho tingma acyitnaclha nintom. Oyancasiclhojoc sat silanayclha. Oninquinic sat maa acyilhna najan silnatam. 19 Colhenam sat mataa evalhoc sicnincanmaclha silnatam. Mosovjec sat aplhamoclhojo piyam. Oytic sat mataa, otoc sat, oynic sat, ongvitsovacsojoc sat” —ilhnic nat intomjac apvalhoc. 20 Aptomjac nic nat apcanya Dios Ingyapam: “Enlhit meyascamcolhma nac lhip. Ingyitsapoc sat lhip alhtaa nac jay. ¿Soc sat enlhit etnejic apancaoc apquilnatam apnincanma lhip?” —nic nat aptomjac Dios Ingyapam.
21 Aptomjac alhta apquilanya Jesús:
—Eycaso ningyitsomalhco nincoo ningiltomja ningincajaycaoc ingancaoc asoc. Am coyitnac asoc ayinyema Dios —alhta aptomjac.
Dios Ingyapam aptomja aptamilquiscama apquitquic
(Mt 6.25-34)22 Aptomjac alhta Jesús apquilanya apquiltamsoycaoc:
—Actomjac coo siyanya quellhip: Mepqui ancoc aptoycaoc, nocollhen nasa apquilvalhoc acyimnatem apnenyaoc. Mepqui ancoc apava, nocollhen nasa apquilvalhoc apquilyovoclhojo. 23 Intasic anco (acmamnave anco) ningyimnatem, colhnoc nintom. Intasic anco ningyovoclhojo, melhnoc apava —alhta aptomjac. 24 Quip elanojo apquiltemaclha mama. Am ecnaycamcoc actic najan enaclheycamcoc acyilhna. Am coyitnac apnincanmaclha aptoycaoc najan aclhamoclhojo asoc. Apcamquic mataa aptoycaoc Dios Ingyapam. Ingiltasic nincoo, mongnoc nata. 25 ¿Ingvanqui ya ongilvonquiclha medio metro tap ayinyema allheneycam ingvalhoc? 26 Am sat ancoc ongvanac ongilana asoc ayitcoc, ¿soctomja allhenamcaa nac ingilvalhoc? —alhta aptomjac.
27 “Quip elanojo actemaclha ilhnamoc. Am cotnajaycam najan am conilhpongamac. Actomjac coo siyanya quellhip: Actamila anco ilhnamoc, am elhnoc nic nat apvisqui Salomón apna apquilantalhnama aptamila. 28 Apquilanescasqui inyicje Dios Ingyapam ayimpeoc paat ayictingam yoclhilhma. Inquictinquic as acnim nac jay, secaseclha sat covatnalhca. ¿Soctomja ningyascacmo nac nincoo? Coyanvomoc sat singilmescama ningilantalhnama Dios Ingyapam —alhta aptomjac. 29 Colhenamejec ingvalhoc nincoo, yoyam ontingyamcoc nintoycaoc najan ningyinaycaoc. 30 Aptingyamquic mataa as asoc enlhitaoc lhalhma anco. Apyasamco eyca Ingyapam netin asoc ayaymalhco nincoo. 31 Ningilanyalhquic ontingyac siclho Dios apquilnancascama. Ongillhovamcoc sat asoc alaymomalhca —alhta aptomjac Jesús.
Ningilnatam acyitnama netin
(Mt 6.19-21)32 “Noela nasa quellhip sicnatoscama apcanito. Apquiltamjoc Ingyapam netin elmesic apquilnancascama. 33 Elquilhaoc asoc apancaoc. Elmesaoc sat apnaymacoc. Elana quellhip najapa, cotnejec sat ápaoc (solyayem). Colhic sat apquilnatam netin mevoycamlha apminyilhma. Cotovejec ascoc maa. 34 Colhenam sat mataa apquilvalhoc acnamquilha apquilnatam —alhta aptomjac Jesús.
Ningilanyomalhca ongilpenacsojo
35 “Elpenacsojo quellhip. Elapongmajatsiclha sat calevascama apancaoc. 36 Ellhojo quellhip enlhit apquiljalhanma apvisqui apancaoc. Etajingvoclhac sat alyimjapmaclha. Elpecjesam sat apliquiscama atong apvactamo sat. 37 Apquilinyejemoc anco apquilancam apvitangvactamo apquiljalhnaclha apvisqui pac. Actomjac coo siyanya quellhip: Naso, ingyenojoc sat epenacsojo apvisqui. Elhnesam sat nicja mesa. Elmesic sat aptoycaoc. 38 Evotac sat lhaja alhtaa aysicso. Alhtooc anco lhaja. Apquilinyejemoc anco apquilancam apvitangvactamo apquiljalhnaclho. 39 Elyasamcojo quellhip. Apyasamcoc alhta ancoc enlhit apmolhama apyap, yoyam evac apminyilhma alhtaa. Pac alhta elaylhic, yoyam elyacsilhma apminyilhma etvacsic tingma pac. 40 Elpenacsojo quellhip lha. Apquilanayquic sat ancoc mevotac Jesús apvisay Aptiyam Aptomja Enlhit, cotlapsic sat evota —alhta aptomjac.
Lhama apquilancam apquilyajayquiclho, poc eyca melyajayquiclho
(Mt 24.45-51)41 Aptomjac alhta apcanya Pedro:
—Visqui, ¿ningilvamlha ya nincoo singiltimnasa actemaclha apyitquiscama, inlhoyqui laa aplhamoclhojo enlhit? —alhta aptomjac.
42 Apcatingmavoc alhta Jesús:
—¿Apne ya nipyesicsa quellhip lhama enlhit apyitsomacpo mayordomo? Aptema nac mayordomo apquilyajayquiclho najan apyascamco. Aptomja apcanem apvisqui etamilsic tingma pac. Aptema laa apmilasictem aptoycaoc apquilancam. 43 Apquilinyejemoc anco apquilancam nac maa. Apvactamo sat apvisqui, etangvotac sat aptamjaycamcaclha apcanyomap elana. 44 Actomjac coo siyanya quellhip: Naso, ingyanyacpoc sat etamilsic aclhamoclhojo apvisqui apquilnatam. 45 Intomjac sat ancoc apvalhoc apquilancam: Mevotayc sat lhaja quilhvoc apvisqui ajac —sat cotnejic apvalhoc. Eyca pa elyicpilhquetamcoc enlhit apquiltamjaycam najan quilvana altamjaycam. Melnaycaoc (avanje) aptom najan apyamo anmin as apquilancam. 46 Cotlapsic sat evotac apvisqui pac naysicsa meljalhanma apquilancam. Ingyascacsojoc sat apyimpejic acyanmongayclha. Ingyanyacpoc sat epalhavomoc enlhitaoc melilyajayquiclho.
47 Lhama apquilancam apyascamco apmayjayoclha apvisqui pac. Am sat ancoc elyajaclhac apcanyaclha elana, coyavojoc sat acmasca acyanmongayclha. 48 Eyca poc apquilancam meyascamco apmayjayoclha apvisqui pac. Am sat ancoc elyajaclhac apcanyaclha elana, casilhtojoc sat acmasca acyanmongayclha. Inlhamaclhec sat ancoc asoc apmesomap enlhit, colhamojoc sat najan actingyamalhca asoc apnaclha. Inlhamaclhec sat ancoc asoc apcanyomap etamilsic enlhit, coyangvomoc sat actingyamalhca asoc apnaclha.
Jesús aptomja apquilhpanquiscama
(Mt 10.34-36)49 Aptomjac alhta mocjam Jesús:
—Acvaac coo, yoyam olvitic talha as nalhpop. Altamjo inyicje quilhvo colhic ayalevasa talha. 50 Olngamcojoc sat acmasca seyapajasquiscama. Eyovse inyicje coo olinlhanmojo. 51 Acvaac coo as nalhpop. ¿Apquilanayqui ya quellhip oltamilcasiclha apquilvalhoc enlhitaoc? Actomjac coo siyanya quellhip: Paj, pac olsilhnana. 52 Elatingmacpoc sat cinco apmolhama. Apnatqui sat elinmelham apcanit. Apcanit sat elinmelham apnatqui. 53 Apyap sat ingyinmelham apquitca. Apquitca sat ingyinmelham apyap. Inquin sat conmelham ayitca. Ayitca sat conmelham inquin. Inyipyamong sat conmelham atapa. Atapa sat conmelham inyipyamong —alhta aptomjac Jesús.
Asoc monquinatquiscama
(Mt 16.1-4Mr 8.11-13)54 Aptomjac alhta Jesús apquilanya enlhitaoc:
—Apquilvitac sat ancoc yipjopay actepa actalhningvamlha acnim. Yejemoc sat eltimjic quellhip: Comamac sat. Nasoc sat cotnejic coma (comama). 55 Apquilvitac sat ancoc quellhip apquilhcajacmo piyam. Yejemoc sat eltimjic quellhip: Eyquey, samangi anco. Nasoc sat cotnejic eyquey. 56 Enlhit apquilaycmascam nac quellhip. Apquilyicpilco inyicje quellhip asoc apquilvitay acyitnama netin najan nalhpop. ¿Soctomja apquilquinatquisa nac asoc monquinatquiscama apquilvitay as ningvamlha nac jay? —alhta aptomjac.
Nintamilcasayclha ingvalhoc napato singinmelhaycam
(Mt 5.25-26)57 “¿Soctomja melyicpilco nac quellhip actemaclha acpeyvomo? 58 Aptimec sat ancoc lhip aplhalhma aptomja apquinmelhaycam, elyacsic singyicpilquemo tingma pac. Naysicsa apquillhingam ilinlhanmojo etamilcasiclha apvalhoc. Yoyam meyantamoc lhip apnaclha singyicpilquemo. Ingyanic sat singyicpilquemo apquilancam emoc lhip. Elhnescomoc sat lhip singilpilhtetomaclha. 59 Actomjac coo siyanya lhip: Metyepejec sat mataa lhip singilpilhtetomaclha, mesovjomo apquilhayclha solyayem (apmaycaoc nasa) —alhta aptomjac Jesús.
© © Biblia en Enhlet (Lengua Norte) © Paraguayan Bible Society, 1995.
