Actemaclha apquilyiplovquiscama Jesucristo apmolhama
1 Ilane sat elyasingvomoc ingilyalhinga actemaclha ningilyajayquiclho apquilviscaa apquilyimtalhnamo. Najan actemaclha ningyiplovquiscama ongillana asoc actamila. 2 Noelane nasa elantipsam apquilvisay poc. Noelane nasa elatingmacpoc poc. Incaymalhquic coytic actamilaycam apquilvalhoc najan yoyam elasicjojo enlhitaoc lhalhma anco.
3 Yitnec nat nincoo lha nintemaclha inganco, actemaclha mongilyascamco najan actemaclha mongilyajayquiclho Dios. Ningillhinganacmec nat ninlhamoclhojo. Ningyiplovcasquic nat actemaclha ayitsepma ingnenyaoc asoc almasomcaa. Najan actemaclha ningyasipquiscama ingmoc. Najan actemaclha ningiltanoncama ingnaymacoc najan actemaclha ningiltanovmalhca ningyesicsa. 4 Natamin ingillhicmosquic alhta Dios aptomja singvomquiscama tap aptemaclha singasicjayo najan aptemaclha singamliyam. 5 Am nat ongiltamilcasalhcac inganco. Eyca ingilvomcasquic alhta tap ayinyema singamliyam Dios. Najan ayinyema singyapasquisaycaoc acvisay malha nintiyam alhnancoc. Najan ayinyema Espíritu Santo singiltimesquiscama ingjalhnancaoc. 6 Ingilmasquic nincoo Dios Espíritu actemaclha acyeycajangvaycmo, ayinyema Jesucristo singvomquiscama tap. 7 Ingiltimescasquic ningilpeyvomo ayinyema singamliyam apanco. Ongillhovac sat acyimnatem ingnenyaoc cotmongvoycamlha nelha, actemaclha aljalhneycam ingvalhoc.
8 Nasoc anco as amyaa siclhanma lhac. Altamjoc coo evascapoc lhip apyiplovquiscama. Ilane sat najan elyiplovsic poc. Yoyam najan quilhvo apquilyanmonquiscama apquilvalhoc elyiplovsic actemaclha actamila yoyam elvita apnaymacoc. Actamila anco as actemaclha yoyam ongiltimjic ningilmaycam ninlhamoclhojo. 9 Ilapajas sat tap apquiltomja apquilatingmoctamo. Najan apquillhanma amyaa nano actemaclha apquilvisay ningilyeyjamcaa. Iyitnocjas sat apquilatingmoctamo apquillhanma apcanamaclha Moisés. Am coltamilo as actemaclha, montimjic sat nincoo ningilmaycam.
10 Apnec sat ancoc Jesucristo apmolhama aptomja aptipquiscama mataa asoc acmasom, iltimnasiclhojo sat lhama najan mocjam lhama. Am sat ancoc elyajaclhoc, itipquis sat ingyalhing. 11 Apyasamcoc lhip Tito. Aplhinganacmec enlhit aptema nac lha. Etvasacpoc sat ayinyema aptamongvaycmolhma apanco.
Apcanama Pablo Tito
12 Ongvapajacsic sat siclho apnaclha lhip ingyalhing Artemas najan Tíquico. Apquilvoclhec sat ancoc maa, jetyaningvotamojo sat lhip sicnaclha tingma Nicópolis. Olhic sat as tingma piyam nac jay. 13 Ipasim sat lhip ingyalhing Zenas aptomja apyascamco nintemaclha najan ingyalhing Apolos. Ilmes sat asoc ayaymomalhca nalhit amay yoyam coymalhqueje lhama asoc. 14 Ilane sat elyasingvomoc ingnaymacoc actemaclha ningyiplovquiscama actamila najan actemaclha ningmescama asoc ayaymomalhca. Incaymalhquic coytic apquilyiplovquiscama, malha acyilhna actamila ayinyema mongilyasquiyam.
Aclhanma apvalhoc Pablo yoyam epasmoc Dios
15 Inquillhenquic apquilvalhoc aplhamoclhojo sicmolhama. Inlhenquic ingilvalhoc aplhamoclhojo ingilyalhinga maa apquiltomja singilasicjayo. Altamjoc coo yoyam epasmoc Dios Ingyapam aplhamoclhojo quellhip. Amén.
© © Biblia en Enhlet (Lengua Norte) © Paraguayan Bible Society, 1995.
