Apquilimpocjay tingma Jerusalén
(2~R 24.20—25.212~Cr 36.17-21Jer 52.3-30)1 Aptimec nic nat nueve años apvisqui Sedequías nipyesicsa apquilmolhama Judá. Apvocmec nic nat diez piltin año nac jay. Apquillanac nic nat apquilimpocjay co Babilonia apvisqui ilhnic nat Nabucodonosor. 2 Invocmec nic nat once años aptimem apvisqui Sedequías, apvocmo ilhnic nat cuatro piltin najan nueve acnim año nac jay. Apquilvaac nic nat cotnaja ingmoc tingma apvanyam. 3 Apquilantalhnec nic nat singilpilhtetemo apquilviscaa co Babilonia, apcanvocmo payjoc atong central. Apvisay nic nat Nergal-sarezer, poc nic nat Samgar-nebo, poc nic nat Sarsequim, poc nic nat apvisayó lhama Nergal-sarezer, yatapquilviscaa ilhnic nat maa.
4 Intiyacmec nic nat apvalhoc apvisqui Sedequías najan apnaymacoc singilpilhtetemo apquilvita cotnaja ingmoc. Apquinyajamquic nic nat apquilyinyova tingma apvanyam. Alhtaa ilhnic nat apquilantepa tingma, apquilyiplaclho ilhnic nat amay ayimjaclha yamit altamila. Apquilmilanquic nic nat atong naysicsa anit mataymong apjalhtam. Apquilyiplaclhec nic nat amay acyascama vatsam Jordán. 5-6 Apquilimjamquic nic nat singilpilhtetemo caldeos. Apquilpatjetquic nic nat apvisqui Sedequías ningatoc tingma Jericó. Apmacpec nic nat maa, apyantamacpo apnaclha apvisqui Nabucodonosor, payjoc tingma Ribla, yoclhilhma acvisay Hamat. Apcanama ilhnic nat Nabucodonosor eticyoc apcanit apquitquic Sedequías, napato apquilyap. Apcanama ilhnic nat eticyoc apyovoclhojo apquilyimtalhnamo siclho nipyesicsa enlhitaoc Judá. 7 Apcanama ilhnic nat eljalhyovacsic apataoc Sedequías apmomap, elyicpilhquetacpoc cadenas, colhic sat acyantama tingma Babilonia.
8 Apquilvatnec nic nat talha caldeos cotnaja ingmoc, apvisqui tingma apac najan apyovoclhojo tingma. Apquilyaninquic nic nat mataymong apjalhtam. 9 Lhama guardia apvisqui ilhnic nat Nabuzaradán. Apnalaclhec nic nat Babilonia apyovoclhojo apquilaymomap tingma apvanyam. Apsovjacpoc nic nat enlhitaoc apquilmomap. 10 Apquilaymacpec nic nat napocja co Judá mepqui asoc, mepqui apquilnatam. Apquillhocac nic nat ayimjaclha uva najan amyip yoyam elcaoc.
Profeta Jeremías
11 Aptomjac nic nat apvisqui Nabucodonosor de Babilonia apcanya apvisqui guardia Nabuzaradán, aplhenacpoc profeta Jeremías: 12 Itamilquis sat lhip as enlhit, notvas nasa, nomyov nasa asoc apquilmalhna inlhojo asoc — nic nat aptomjac. 13 Apmiyaclhec nic nat apnaclha Jeremías apvisqui Nabuzaradán, aplhalhma ilhnic nat Nabusazbán, poc nic nat Nergal-sarezer, apquilviscaa ilhnic nat. Najan poc nic nat apquillhalhmaa apquilyimtalhnamo co Babilonia. 14 Apquilyinyovcasquic nic nat apmaclha Jeremías napocja tingma apnamcaclha guardia. Aplhalhma ilhnic nat aptamilquiscama apvisay Gedalías, Ahicam apquitca, Safán aptavin. Apyantamacpec nic nat tingma pac Jeremías. Am nic nat eyinyavac mataa apnaymacoc natingma Jeremías.
Aplhenamap Ebed-melec
15 Apnec nic nat Jeremías apmomap mocjam nipyesicsa guardia. Aptomjac nic nat Visqui ingac apcanya: 16 Lhip Jeremías, iyoclhojo sat apnaclha Ebed-melec co Etiopía: Eycaso sicpayvam sicvisay Dios Visqui sicyimtalhnamo: Osavojoc sat siclhanmaclha nano, yavamlha cotnejic sat. Etvasacpoc sat as tingma, lhip sat etnejic apvitaycamco. 17 Omyoc sat lhip, memacpejec sat lhip nipyesicsa cotnaja ingmoc. Naso coo sicpayvam siclhanma. 18 Ovomsic sat tap lhip, yoyam mematnejec. Ingyinyejic sat lhip mepqui apmatnam, ayinyema meyasquiyam lhip coo sicpayvam. Eycaso sicpayvam sicvisay Visqui apancaoc — alhta aptomjac — nic nat aptomjac Jeremías.
© © Biblia en Enhlet (Lengua Norte) © Paraguayan Bible Society, 1995.
