Apmatnam apvisqui Og
(Nm 21.31-35)1 Aptomjac nic nat Moisés: —Ningmiyaclhec alhta moc amay, ningilpeyvoc tingma Basán. Apvisqui maa apvisay alhta Og. Ingilamyilhamquic alhta apvisqui apnalayquinta apyovoclhojo apquillhalhmaa singilpilhtetemo. Apquilpecjam alhta jingilinmelham yoclhilhma Edrei.
2 Aptomjac alhta Dios seyanya coo: ¡Lhip Moisés, nongya nasa lhip! Otnesquisic sat coo, yoyam emacpoc apvisqui Og najan apyovoclhojo apquillhalhmaa. Quellhip sat elnapoc maa, elnasojoc sat apquiltomjaclha siclhoc alhta apvisqui Sehón tingma Hesbón, najan apquillhalhmaa amorreos.
3 Ingilyimnatasquic alhta Dios yoyam ongilnapoc apvisqui Og najan apyovoclhojo apquillhalhmaa. Am alhta ingyaymacpoc lhama. 4 Ningnatovasquic alhta aplhamoclhojo tingma apquilvanyam. Am alhta ingyaymacpoc lhama. Ningnatovasquic alhta sesenta tingma apquilvanyam. Ninsovjoquic alhta tingma apcanamaclha siclho apvisqui Og yoclhilhma Argob, yoclhilhma Basán. 5 Apquilyimnatem alhta tingma acma apjalhtam nitno, najan alyimnatem alhta apatnaoc. Najan maa poc tingma aplhamoclhojo mepqui apjalhtam. 6 Ningnatovasquic alhta apyovoclhojo, acno alhta ningnatovascama apvisqui Sehón tingma Hesbón, acyiplomo ningilnapma enlhit, najan quilvanaa najan ayitquic. 7 Ningmiyovquic alhta apnatoscama najan asoc acmamnave, ayinyema alhta cotnaja ingmoc apticyovam.
8 Ningiltimec alhta inganco yoclhilhma apancaoc apcanit apquilviscaa nipyesicsa amorreos, apquileyvomaclha alhta nicja vatsam Jordán, ayenmo alhta vatsam Arnón acvaycmo inquilhe Hermón. 9 (Sidonios appayvam acvisay nic nat as inquilhe Sirión. Najan amorreos appayvam acvisay Senir.) 10 Ningiltimec alhta inganco aplhamoclhojo tingma apquilvanyam as yoclhilhma, najan aplhamoclhojo tingma yoclhilhma Galaad, najan yoclhilhma Basán, acvaycmo Salca najan Edrei. Siclhoc alhta apvisqui Og tingma apancaoc yoclhilhma Basán — nic nat aptomjac Moisés. 11 (Refaítas aptovana alhta apvisqui Og, mepqui mocjam apnaymacoc. Yitnec mocjam as ningvamlha nac jay aysicsic apyitnamaclha apjapac, payjoc tingma Rabá nipyesicsa amonitas. Aysicsic apyitnamaclha apjapac actomja allanomalhca tava apac, cuatro metros acvinatem najan dos metros acpayjem).
Yoclhilhma nicja vatsam
(Nm 32.1-42)12 Aptomjac nic nat Moisés: —Ningiltimec alhta inganco moclhama yoclhilhma. Apquillhocac alhta yoclhilhma apquilmolhama tribu Rubén najan apquilmolhama tribu Gad, ayenmo siclho Aroer, nicja vatsam Arnón acvaycmo nalhit yoclhilhma acma inquilha Galaad, najan maa tingma apquilvanyam. 13 Apquillhocac alhta napocja apquilmolhama media tribu Manasés yoclhilhma Galaad moc nicja, najan yoclhilhma Basán, siclhoc alhta apcanamaclha apvisqui Og. Najan maa yoclhilhma Argob, actomja apquileyvomaclha enlhitaoc rafaítas. 14 (Manasés aptavin niptamin alhta Jair. Aplhocac alhta yoclhilhma ayenmo Argob acvaycmo nicja yoclhilhma Gesur najan Maaca. Apquiltimec alhta yoclhilhma Basán, cotniclhac acvisayó lhama Havot-jair, acvaycmo as ningvamlha nac jay.) 15 Aplhocac alhta Maquir yoclhilhma Galaad. 16 Apquillhocac alhta apquilmolhama tribu Rubén najan apquilmolhama tribu Gad yoclhilhma Galaad acvaycmo vatsam Arnón. Nelha intomjac alhta alvata acvaycmo vatsam Jabod, vamlha maa. Tap eyca maa apquileyvomaclha amonitas. 17 Apquillhocac alhta nicja actiyapmaclha acnim Arabá, payjoc inquilhe Pisga. Najan maa nicja vatsam Jordán, ayenmo acyayengviyam Cineret acvaycmo yingmin acvanyam Arabá, moc ningiltimem Mar Muerto (Yingmin Apac) — nic nat aptomjac Moisés.
18 Actomjac alhta silanya quellhip: —Dios Apyimtalhnamo singmescama as yoclhilhma ontimjic inganco. Elsavojo sat quellhip apquilmaycam, elpalhavoclha sat apnaymacoc israelitas, ellanac apquilimpocjay. 19 Colhnam sat apnatamcaa tingma apquilvanyam, najan ayitquic najan aclhamoclhojo apnatoscama, cotlaycaoc apnatoscama. 20 Noelvatsaoc nasa quellhip apquilpasmeyquiclha apnaymacoc Israel. Ellhovamcoc sat maa yoclhilhma Dios apquilmescama, eltimjic apancaoc as yoclhilhma. Cotnejic sat mepqui mocjam ningilinmelhamalhca lhalhma anco. Natamin elvota sat mocjam quellhip, yoyam elhnam moclhama yoclhilhma apquillhoy alhta quellhip — alhta actomjac coo. 21 Actomjac alhta siyanya Josué: Apvitac alhta lhip aptomjaclha Dios Apyimtalhnamo, yoyam eticyoc alhta apcanit apquilviscaa. Colhojoc sat apticyovam moclhama apquilviscaa apquilvoycamlha quellhip. 22 ¡Nongya nasa lhip najan apnaymacoc! ¡Epasmiclhac sat Dios, apquimja apmamyi sat etnejic apquilimpocjay quellhip! — alhta actomjac coo — nic nat aptomjac Moisés.
Apmasma Dios apquilmalhnaycam Moisés:
23 Aptomjac nic nat Moisés: —Almalhnaquic alhta Dios: 24 Lhip Dios Apyimtalhnamo, sicvisay coo silancam lhip. Elhicmosquic alhta apmopvan apanco najan aptemaclha apyimtalhnamo. Paj poc dios maa netin, paj poc as nalhpop yoyam ellana asoc simpilapquiscama, ningvita inlhojo apvamlha pac lhip. 25 Nomyov nasa lhip ovomjoc tap vatsam Jordán. Altamjo inyicje otac yoclhilhma actamila anco najan inquilhe Líbano — alhta actomjac coo. 26 Aplovquic alhta Dios ayinyema quellhip apquilsilhnanomap apanco. Apmiyovquic alhta Dios aptomja seyanya: ¡Vamlha itne! Nolhen nasa mocjam. 27 Ingyinamit sat lhip netin inquilhe Pisga. Ilanojo sat nilhqueyja najan maa nipiyam, najan actiyapmaclha acnim, najan actalhningvamlha acnim. Copvanquejec evomjoc tap vatsam Jordán. 28 Itne sat lhip appayvam ingyanic Josué: Ingyane sat evascapoc, itnesquis apyimtalhnamo Josué. Enaliclhac sat apnaymacoc as yoclhilhma, yoyam eltimjic apancaoc. Elanojoc sat lhip quilhvo nac jay — alhta aptomjac seyanya. 29 Ningmiyaclhec alhta alvata, payjoc tingma Bet-peor — nic nat aptomjac Moisés.
© © Biblia en Enhlet (Lengua Norte) © Paraguayan Bible Society, 1995.
