Apyanmongsayclha Dios apquiltemaclha co Edom
1 ¡Quellhip enlhitaoc apnaycam lhalhma anco, ellhingma jilip yoyam elaylhojo! Incaymalhquic elaylhojoc apyovoclhojo enlhitaoc as nalhpop, najan acyovoclhojo asoc aleyvam as nalhpop.
2 Avanjec aplom pac Dios Visqui ingac, apvita apquiltemaclha apquilinmelhaycam cotnaja ingmoc lhalhma anco. Inlhenquic apvalhoc esavojoc sat apquilnapma.
3 Mepqui apquilatoynamap apticyovam cotnaja ingmoc, inticjancasquic acmasom ayinyema enlhitaoc apjapaoc. Malha ayinyem cotnejic sat ema apancaoc apticyovam payjoc inquilhe.
4 Elvonquepoc sat apyovoclhojo apyová netin. Malha ninpilhyamcameycaoc vaycajac (copilhyamcamcoc sat) cotnejic sat netin. Comascoc sat ningvitay apyová, epalamoc sat nalhpop, malha yamit ava acpaliyam, najan malha acyilhna ápac acpaliyam sat cotnejic.
5 Invitalhquic maa netin sovo acvinatem apanco, yoyam colnapoc enlhit. Pilapcasquic actiyacmo, yoyam colnapoc apyovoclhojo co Edom.
6 Invitalhquic acyivey ema najan aptipilhmoc, ayinyema sovo pac Visqui ingac. Acno apticyovam nipquesic najan yataay macmescama Dios. Aptomja apticyovamaclha Visqui ingac payjoc tingma Bosra, najan apticyovamaclha nipyesicsa co Edom.
7 Inticyovquic maa apnatoscama yamvayqui, najan vayqui najan vayqui inquilinava. Invitalhquic nalhpop ema najan aptipilhmoc actalhna congne lhopactic.
8 Acvisay acnim apyanmongsayclha Visqui ingac apquiltemaclha apancaoc cotnaja ingmoc apquilinmelhaycam enlhitaoc co Jerusalén.
9 Asoc acpasyam brea actomjayclho yingmin ayinyem yoclhilhma Edom. Lhopactic actomjayclho azufre acpayesayclha talha, colhic sat alvatna talha as nalhpop.
10 Am casponac mataa as talha acnim anco najan alhtaa, am comascac mataa etin acyivey acmiyayclha netin. Intomjaclhec yoclhilhma actamopeycaoc, mepqui mataa enlhit apquileyvam maa.
11 Inquilyancac maa sovaya najan nata navjac. Inquillanac alhanaoc cuervo mama apyayem najan lechuza nata navjac. Apquilyipsatquic Visqui ingac navayc yoclhilhma, cotniclhac sat actamopeycaoc mepqui enlhit.
12 Paj lhama enlhit etnejic apvisqui apancaoc, paj lhama enlhit mayayo.
13 Invitalhquic ayimjaclha amaoc congne tingma apquiltamila, najan ayimjaclha amaoc ortigas najan cardos congne tingma apquilyimnatem. Actomja aleyvomaclha (alyancaclha) chacales yamvavo, najan apquileyvomaclha lhapin.
14 Inquilpalhavocmec quilhcalhic alyancaclha yamvavo chacales. Apquilpayvec maa yataay apquilinava, malha quilyicjamo, najan moc actemaclha quilyicjamo alvitamalhca alhtaa, colovsic sat alyampay.
15 Yitnec maa aplhancoc sovaya quilyicjamo, colyetapongam apquitcavoc. Apquilpasmeclhec maa apyovoclhojo mama, apquilinava najan apquilvanaa— nic nat aptomjac.
16 Elyipsit sat quellhip vaycajac ayinyema Visqui ingac: Mepqui ayaymomalhca lhama nata navjac, najan asoc navjac, inquilpasmeclhec acyovoclhojo. Ayinyema siclho apcanama espíritu apanco Visqui ingac.
17 Apquilmilasquic Visqui ingac yoclhilhma maa actemaclha sicas apquilmaycam. Innec alyipsata acvamlha navayc yoclhilhma, yoyam eleyoc sat maa cotmongvoycamlha nelha — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
