Actemaclha fiestas
(Nm 28.16-25)1 Aptomjac nic nat Dios apcanya Moisés:
2 Iltimnas sat lhip sicpayvam napatavo israelitas: Eycaso alvisay acnim alponquinomalhca, yoyam ingyaniclhac sat quellhip.
3 Eltamjam sat quellhip seis acnim. Incaymalhquic elhnam sat quellhip mepqui apquiltamjaycam, acvocmo inlhojo séptimo acnim. Ingyaniclhac sat mataa quellhip as acnim. Colhic sat ayaco Dios as acnim lhalhma anco.
4 Eycaso alvisay acnim, yoyam ingyaniclhac quellhip eltimjic fiesta mayayo Dios:
5 Acnim catorce, najan piltin primero, actalhnam anco cotnejic fiesta Pascua Singmasmaclha, colhic ayaco Dios.
6 Acnim quince, najan piltin primero, cotnejic fiesta acvisay pan mepqui apquimpascaoc, colhic ayaco Dios. Eltovamcoc sat pan mepqui apquimpascaoc acvaycmo siete acnim. 7-8 Ingyaniclhac sat quellhip primer acnim, colapvanquejec quellhip eltamjam as acnim. Moc acnim mataa eltingya asoc macmescama Dios malvatnama talha. Ingyaniclha sat quellhip acnim séptimo ellanac fiesta nimpayvam. Colapvanquejec quellhip eltamjam as acnim.
Fiesta siclha ningvitay acyilhna
(Nm 28.26-31)9 Aptomjac nic nat Dios apcanya Moisés:
10 Iltimnas sat lhip sicpayvam napatavo israelitas: Elvitac sat quellhip yoclhilhma alhnancoc, yoyam ellhovamcoc quellhip. Elvitac sat trigo apyilhna, elsaclha sat quellhip apnaclha sacerdote amamyi anco lhama acpilhtetem trigo apyilhna. 11 Moc acnim sat cotnejic, emoc sat sacerdote acpilhtetem trigo, cotnejic macmescama Dios. 12 Najan as acnim nac jay etingyac sat nipquesic apquitcoc un año, mepqui acmasom apyimpejic, actemaclha holocausto mayayo Dios. 13 Elsanta sat cuatro kilos y medio harina alpalhquemalhca aceite, cotnejic macmescama Dios malvatnama talha, apyisponcama Dios. Cotnejic sat moc macmescama Dios un litro uva ayingmenic. 14 Apquilpenasquic sat ancoc macmescama Dios as acyilhna, natamin eltovamcoc sat quellhip lha pan, najan trigo apactic macyilhnayam, najan apactic angvitic (apvitic). Comasquejec mataa singanamaclha nac jay cotmongvoycamlha nelha.
15 Natamin acnim ninnayclha, apquilpenesa inlhojo macmescama Dios trigo apyilhna, elyipsitaoc sat siete semanas. 16 Vocmec sat ancoc cincuenta acnim natamin acnim ninnayclha (natamin siete semanas), eltingya sat moc macmescama Dios trigo apyilhna. 17 Elsanta sat apcanit pan acyiplomo levadura, malha cuatro kilo cada uno, cotnejic sat macmescama Dios siclha apquilvitay acyilhna. 18 Apquilsantac quellhip pan, acyiplomo apnalayquinta siete apnatoscama nipquesic apquitcavoc un año mepqui acmasom apyimnpeoc, najan lhama vayqui inquinavo, najan apcanit nipquesic apquilinava, actemaclha holocausto malvatnama talha, colhic ayaco Dios, actemaclha apyisponcama, mocjam macmescama Dios trigo apactic najan uva ayingmenic.
19 Mocjam macmescama Dios yataay apquinavo ematong acyanmongam melyascalhma, najan apcanit nipquesic apquitcavoc un año, ematong sat acyanmongam singasicjayquiclha mocjam. 20 Etingyac sat sacerdote as apnatoscama macmescama Dios, acyiplomo pan apquinyema apyilhna siclha apvitay, najan apcanit nipquesic apquitcavoc. Eycaso altomja macmescama Dios, yoyam eltovamcoc sacerdotes.
21 Incaymalhquic quellhip ingyaniclhac as acnim santo, mepqui apquiltamjaycam. Comasquejec sat mataa singanamaclha actema nac jay cotmongvoycamlha nelha.
22 Vocmec sat ancoc acnaclhamalhquilha acyilhna, noelsavojo nasa trigo apyilhna, elayim sat mataa napocja apyilhna. Eltingyac sat nalhit acnim enlhit mepqui asoc najan metnaja israelitas. Coo sicvisay Dios Visqui apancaoc quellhip — nic nat aptomjac.
Actemaclha fiesta trompetas
(Nm 29.1-6)23 Aptomjac nic nat Dios apcanya Moisés:
24 Iltimnas sat lhip sicpayvam napatavo israelitas: Primer acnim, najan piltin séptimo ingyaniclha sat quellhip, cotnejic fiesta santa acvisay apquilpayvascama trompetas. 25 Eltingya sat asoc macmescama Dios malvatnama talha colhic ayaco Dios, mepqui apquiltamjaycam as acnim.
Actemaclha fiesta singasicjayquiclha
(Nm 29.7-11)26 Aptomjac nic nat Dios apcanya Moisés:
27 Vocmec sat ancoc acnim diez, najan piltin séptimo, cotnejic sat fiesta Singasicjayquiclha mocjam, moc acvisay Acmascosomalhquilha mongilyascalhma. Cotnejic sat apcaneyquiclha santa, mepqui aptoycaoc as acnim, eltingyac sat asoc macmescama Dios malvatnama talha, colhic ayaco Dios. 28 Colapvanquejec eltamjam quellhip as acnim, acvisay acnim Singasicjayquiclha moc acvisay Acmascosomalhquilha mongilyascalhma. Elasicjacpoc sat mocjam quellhip napato Dios. 29 Am sat ancoc eyiplovcasac enlhit as acnim mepqui nintom, etvasacpoc sat ematong sat nipyesicsa apnaymacoc. 30 Aptamjam sat ancoc enlhit as acnim, memyovacpejec sat napato Dios, ematong sat nipyesicsa apnaymacoc.
31 Colapvanquejec eltamjam as acnim. Comasquejec sat mataa singanamaclha nac jay cotmongvoycamlha nelha. 32 Acvisay acnim ninnayclha mepqui nintom, ayenmo acnim nueve actalhnam acvaycmo moc acnim actalhnam, cotnejic sat nelha.
Fiesta Enramadas jamilh apancaoc
(Nm 29.12-40)33 Aptomjac nic nat Dios apcanya Moisés:
34 Iltimnas sat lhip sicpayvam napatavo israelitas: Acnim quince, najan piltin séptimo, ellana sat quellhip fiesta acvaycmo siete acnim, acvisay fiesta Enramadas, yoyam colhic ayaco Dios. 35 Incaymalhquic siclhoc primer acnim ingyaniclhac quellhip nimpayvam santo, colapvanquejec eltamjam as acnim. 36 Eltingyac sat mataa macmescama Dios siete acnim, colhic sat alvatna talha, yoyam colhic ayaco Dios. Vocmec sat ancoc acnim ocho (octavo), ingyaniclha sat mocjam quellhip, cotnejic nimpayvam santo, acyiplomo macmescama Dios malvatnama talha. Acvisay fiesta as acnim, colapvanquejec eltamjam quellhip.
37 Eycaso alvisay fiestas, yoyam colhic ayaco Dios. Incaymalhquic quellhip ingyaniclhac mataa nimpayvam santo, acyiplomo macmescama Dios malvatnama talha, najan holocaustos malvatnama talha, najan ofrendas nintom, asoc macmescama Dios uva ayingmenic, acno apquilanyomap eltimjic quellhip. 38 Moc mataa acvisay acnim ninnayclha, yoyam colhic ayaco Dios. Moc mataa apquilmescama nasa asoc quellhip, najan asoc apquilmescama quellhip ayinyema apquillhanma mepqui apquilyeycajascaoc.
39 Acnim quince, najan piltin séptimo, apquilsovjo inlhojo quellhip apquilnaclhama acyilhna, ellana sat fiesta siete acnim, yoyam colhic ayaco. Cotnejic acnim ninnayquiclha primer acnim najan octavo (ocho) acnim. 40 Primer acnim elpatmenta sat acyilhna actamila anco ayinyema yamit, najan alha ava actengaoc, najan moc actengaoc acma ava alimja nicja vatsam. Colpayjiclha sat mataa apquilvalhoc naysicsa apquilayo Dios, acvaycmo siete acnim. 41 Moclhama año, apvocmo inlhojo piltin séptimo, ellana sat fiesta siete acnim, yoyam colhic ayaco Dios. Comasquejec mataa singanamaclha nac jay cotmongvoycamlha nelha. 42 Elhnam sat quellhip apquilvisay israelitas coning yamit acvisay jamilh, acvaycmo siete acnim. 43 Colyitnam sat apatic aptovana niptamin, actemaclha sicyinyovquiscama yoclhilhma Egipto sicmasma israelitas nalhit amay, apquillanay mataa jamilh, yoyam elhnam. Coo sicvisay Dios Visqui apancaoc quellhip — nic nat aptomjac Dios.
44 Apyascasingvocmec nic nat Moisés, elyasamcojo israelitas moclhama fiesta najan moclhama apquilayoclha mataa Dios.
© © Biblia en Enhlet (Lengua Norte) © Paraguayan Bible Society, 1995.
