Actemaclha apnincanma solyayem
1 Quellhip elyalhinga. Pac oltimnacsic quellhip amyaa actemaclha apquimlaycmo Dios aplhamoclhojo Jesucristo apmolhama apnaycam yoclhilhma Macedonia. 2 Inyipconalhquic alhta melyasquiyam naysicsa apquillingaycamco acmasca. Avanjec alhta eyca acpayjayclha apquilvalhoc. Mepqui apquilnatam alhta Jesucristo apmolhama yoclhilhma Macedonia. Avanjec alhta apninquinaycaoc solyayem, malha acma ningilnatam alhta apquiltomjac. 3 Coo alhta sicvitaycamco. Apninquinquic alhta solyayem mepqui apquilmasma. Apninquinquic alhta cotlaycaoc solyayem mepqui maltimnascama. 4 Ingiltimnasquic alhta actemaclha aclhanma apquilvalhoc. Apquililtamjoc elapajasquisic solyayem yoyam elpasmoc Jesucristo apmolhama apnaycam tingma Jerusalén. 5 Pilapcasquic alhta ningvita cotlaycaoc apquilansayclha solyayem. Apquilmesomap apanco apquiltomja Dios, malha asoc macmescama Dios. Eyca ayinyema apquilyajayquiclho apmayjayoclha Dios. Singilyajayquiclho apancavo najan nincoo lha. 6 Altimnasquic alhta ingyalhing Tito yoyam esavojo apcansayclha solyayem nipyesicsa quellhip. Ayinyemaclha apcansaclhec alhta siclho solyayem apquinyectamlha. 7 Cotlaycaoc asoc acyitna quellhip: yitnec melyasquiyam quellhip, yitnec najan Dios appayvam, yitnec najan actemaclha apquilyasingvoyam najan actemaclha apquilvascapma najan actemaclha singilasicjayo nincoo. Elyimnac sat quellhip apquilyiplovquiscama actemaclha apquilmescama asoc yoyam elpasmoc mataa poc.
8 Cotnaja siyanem elyiplovcasojo quellhip actema nac jay. Acvamlha aclhanma mataa evalhoc acyitna apquilvascapma poc Jesucristo apmolhama. Altamjoc coo oyasamcojo actemaclha apquilasicjayo quellhip. 9 Apquilyasamcoc quellhip actemaclha singilasicjayo Jesucristo Visqui ingac. Cotlaycaoc nic nat apquilnatam Visqui ingac. Apyinyovquic nic nat apquilnatam. Aptomjac nic nat mepqui asoc yoyam eltimjic quellhip malha acma apquilnatam, ayinyema mepqui asoc Visqui ingac.
10 Pac oltimnacsic quellhip actamila sicpayvam yoyam elvajanamcoc quellhip. Apquilansaclhec alhta quellhip solyayem siclhoc anco año alhta, ayinyema apquilpamejitsomap quellhip. Apquilmamyi apquilvajaneycaoc alhta quellhip. 11 Elinlhanmojo sat apquilyiplovquiscama yoyam elsavojo actemaclha actamila. Elvascap sat apquilyiplovquiscama acno siclho anco. Elninquin sat mataa solyayem acvamlha acyitna inlhojo. 12 Apquiltamjoc sat ancoc ingyalhing eninquinic acvamlha acyitna inlhojo, cotnejic sat macmescama Dios. Mejingilmalhnamejec Dios ongilmesic asoc coyitna inlhojo.
13 Apninquinquic sat ancoc solyayem yoyam elpasmoc poc, incaymalhquic cotnejic mepqui mayc quellhip. 14 Incaymalhquic colhojoc mataa moc. Apvancaac quilhvoc quellhip elpasmoc poc actomja ayaymomalhca asoc. Invocmec sat ancoc acnim ayaymomalhca asoc quellhip, ellhnasojoc sat najan apnaymacoc yoyam elpasmoc. Colhojoc sat mataa moc. 15 Acno actemaclha aclhanma ilhnic nat Dios appayvam actalhesomalhca: “Am nic nat coyeycajangvocmoc asoc, aptomja apcansayclha aclhamoclhojo. Am nic nat coymalhcac mataa asoc, acyitna inlhojo anitoc asoc” —nic nat intomjac.
Tito najan apquillhalhmaa
16 Inpayjeclhec evalhoc sicvita actemaclha apvascapma ingyalhing Tito. Apquiltamjoc mataa epasmoc quellhip acno sictemaclha mataa coo. Eycaso actemaclha ningvascapma ayinyema Dios. 17 Ayapajasquic alhta ingyalhing Tito yoyam etnejic maycaa nipyesicsa quellhip. Apquilyajaclhoc alhta sicpayvam. Eyca appecjeycam apanco alhta yoyam elvita quellhip mepqui siyapajascama.
18 Pac ongilapajacsic mocjam lhama ingyalhing yoyam etnejic aplhalhma Tito. Innec alhta ayaco as ingyalhing nipyesicsa aplhamoclhojo Jesucristo apmolhama, ayinyema aplingascama mataa tasic amyaa. 19 Apquilasinaquic alhta Jesucristo apmolhama as ingyalhing yoyam etnejic siclhalhma. Apquililtamjoc yoyam jingilpasmoc as ingyalhing naysicsa ningiltamjaycam yoyam ongilpasmoc ingnaymacoc. Ningiltamjoc mataa yoyam colhic ayaco Visqui ingac. Eycaso ayinyema najan sicmayjayo ajanco. 20 Ningiltamjoc yoyam colhejec singillhenamcaa naysicsa ningiltamilquiscama solyayem acninquinomalhca. 21 Ningiltamjoc mataa yoyam cotamilic aclhamoclhojo asoc napato Visqui ingac najan napatavo enlhitaoc.
22 Ongilapajacsic sat mocjam lhama ingyalhing yoyam etnejic aplhalhma. Acvitac alhta mataa actemaclha apvascapma naysicsa sictamjaycamo lhama. Appecjamoc eyacsic nipyesicsa quellhip, ayinyemaclha apcayo aptomjac mataa quellhip. 23 Ningiltamjoc nincoo yoyam elmoc tacja quellhip apnatqui ingilyalhinga ningilapajascama: Lhama apvisay Tito aptomja sictamjaycamo lhama naysicsa ningiltamjaycam najan ningillhicmoscama quellhip. Najan poc ingilyalhinga apcanit apquiltomja apquilapajasomap ayinyema Jesucristo apmolhama. Eycaso apnatqui ingilyalhinga ayinyema apquiltamjaycam yoyam colhic ayaco Cristo. 24 Ellhicmos sat quellhip actemaclha apquilasicjayo yoyam elyasamcojo Jesucristo apmolhama apquilinyectamlha apnatqui ingilyalhinga. Yoyam najan elyasamcojo Jesucristo apmolhama actomja nasoc anco actemaclha ningilayo quellhip.
© © Biblia en Enhlet (Lengua Norte) © Paraguayan Bible Society, 1995.
