Santuario carpa apponquinomap
1 Aptomjac nic nat Moisés apquilanya: —Eycaso singanamaclha najan singascamaclha, yoyam elyiplovcasojo quellhip aclhamoclhojo acnim apquileyvam as yoclhilhma, yoyam ellhovamcoc quellhip, ayinyema Dios Visqui apancaoc apquilyeyjamcaa.
2 Elnatovas sat quilaycmasquiscama apancaoc, apquilayo mataa actomja apquilaoclha, apquilanyomap quellhip elantipsic maa. Elnatovas acyitnamaclha quilaycmasquiscama netin inquilhe alvinatem najan alyavatem, najan coning yamit acyivey. 3 Elnatovas sat altares apquilvatnamaclha apancaoc, elnatovas quilaycmasquiscama mataymong, elvit sat talha quilaycmasquiscama yamit, elsavojo sat apnatovascama quilaycmasquiscama acyitsomalhca dios. Colvoncomoc sat enlhitaoc apquiltemaclha apquilayo quilaycmasquiscama.
4 Noelvajanaoc nasa quellhip apquilayoclha actomja apquilaoclha. 5 Dios Apyimtalhnamo elyacyecsic sat mayayoclha nipyesicsa apquilmolhama tribus enlhitaoc, apvamlha pac lhama carpa apponquinomap, yoyam eltingya quellhip. 6 Elnapoc sat maa apnatoscama macmescama Dios malvatnama talha, yoyam colhic ayaco Dios, elmecsic sat lhama asoc acyitna inlhojo diez asoc, najan contribuciones apquilyamasma acyanmongam, najan promesas apquillhanma mepqui apquilyeycajascaoc najan ofrendas macmescama Dios, najan apquilanyomap elmecsic apnatoscama apquitcoc siclha apvitay, najan vayqui najan nipquesic. 7 Eltovamcoc sat quellhip napato Dios, apquilpasmeyquiclha familias. Elitsovacsojoc sat lhama quellhip ayinyema apquiltamjaycam quellhip naysicsa apvaticjapquiscama mataa Dios Apyimtalhnamo.
8 Apquillanac quellhip quilhvo nac jay apquiltamjoclha ellana, colapvanquejec maa yoclhilhma alhnancoc. 9 Am elvocmoc mocjam as yoclhilhma, yoyam ellhovamcoc quellhip ellovsic apquilyampay, ayinyema Dios Apyimtalhnamo. 10 Nalhit acnim eljalhtepilhquetic quellhip vatsam Jordán, elhnam sat yoclhilhma alhnancoc ayinyema apmescama Dios, mepqui apquilinmelhaycam cotnaja ingmoc najan mepqui apquilay sat cotnejic. 11 Cotnejic sat Dios apquilyacyescama acmaclha apvisay apanco, quellhip sat conyemac ofrendas macmescama Dios: apnatoscama apticyovam malvatnama talha, yoyam colhic ayaco Dios, najan macmescama Dios lhama asoc acyitna inlhojo diez asoc (diezmo), najan contribuciones acyanmongam apquilyamasma, najan apquillhanma napato Dios mepqui apquilyeycajascaoc. 12 Ellanac sat fiesta quellhip napato Dios, apquilpasmeyquiclha apquitquic najan enlhit apquiltimesaycam nipyesicsa quellhip, apquilpasmeyquiclha levitas apquiltomja apnaymacoc, mepqui alhta apquillhoy amyipayc levitas.
13 Noeltingya nasa moc acmatnamaclha aptoscama najan apquilvatnamaclha talha napato Dios. 14 Dios elyacyecsic sat mayayoclha nipyesicsa apquilmolhama tribus, apvamlha pac lhama tingma apponquinomap, eltimjic sat maa apquilanyomap eltimjic. 15 Naso, eltovamcoc sat quellhip apnatoscama acticyovam natingma, ayinyema Dios apmescama, eltimjic sat apquilpasmeyquiclha apnaymacoc mepqui actamila apquilvalhoc, acno aptoycaoc mataa quellhip popyit najan moc apyamonquilhma. 16 Noeltavaoc nasa acyiplomo em pac apmatnam, cotlhic sat em pac lhopactic nalhpop, malha yingmin acyanquinomalhca sat cotnejic.
17 Noeltovaoc nasa quellhip natingma acyilhna najan apnatoscama, apquilanyomap quellhip elmecsic Dios: acvisay diezmo trigo apactic, najan uva ayingmenic. Najan aceite, najan apnatoscama siclha apvitay vayqui ayitcoc najan nipquesic apquitcoc. Noelmiyov nasa moc asoc apquillhanma quellhip elmecsic Dios mepqui apquilyeycajascaoc, paj najan moc ofrendas macmescama Dios. 18 Eltovaoc sat mataa napato Dios payjoc mayayoclha carpa apponquinomap. Apquilpasmeyquiclha mataa apquitquic, najan enlhit apquiltimesaycam, najan levitas apnaycam nipyesicsa quellhip, elitsovacsojoc sat lhama quellhip naysicsa aptoycaoc. 19 Elane sat mataa levitas, yoyam elpasmoc, mepqui alvoncayam cotmongvoycamlha nelha.
20 Eyangviscomjoc sat yoclhilhma Dios, acno aplhanma mepqui apyeycajascaoc, elnajap sat mataa apnatoscama, yoyam eltovamcoc apquilpasmeyquiclha. 21 Apnec sat ancoc enlhit tingma apyitnama mocjay carpa apponquinomap, apvanquic elnapoc apnatoscama vayqui najan nipquesic payjoc apmaclha mocjay, acno apcanama siclho Dios. 22 Eltovamcoc sat apquilpasmeyquiclha, najan mepqui actamilaycam apvalhoc poc, cotnejic sat malha aptoycaoc popyit najan moc apyamonquilhma. 23 Noeltovaoc nasa aptoscama acyiplomo em pac (ema ac), acvisay acyimnatem anco. Colapvanquejec quellhip eltovamcoc apitic acyiplomo acyimnatem anco. 24 Cotlhic sat em pac (ema ac) lhopactic nalhpop, malha yingmin acyanquinomalhca sat cotnejic. 25 Noeltovaoc nasa maa, cotamiliclhac sat mataa apquileyvam quellhip najan apquitquic, acyitna inlhojo apquilyiplovquiscama napato Dios. 26 Elsaclha sat mataa tingma apponquinomap ofrendas macmescama Dios najan asoc apquillhanma quellhip mepqui apquilyeycajascaoc. 27 Enaliclha sat apnatoscama macmescama Dios, eticyoc sat, colhic alvatna talha netin altar. Coyanquinalhcac sat em pac apmatnam netin altar, eltovamcoc sat apjapitic apquilpasmeyquiclha.
28 Elaylhojo quellhip, elyiplovcasojo acno apcanama siclho Dios. Cotamiliclhac sat mataa apquileyvam quellhip najan apquitquic, apvita inlhojo apquilyiplovquiscama quellhip — nic nat aptomjac Moisés.
Mayayoclha quilaycmasquiscama acyitsomalhca dios
29-30 Elnatovasacpoc sat enlhitaoc actomja apquilaoclha, apquilvocmo inlhojo quellhip as yoclhilhma, ayinyema apmescama Dios, eltimjic apquileyvomaclha quellhip. Noelvajaniclhojo nasa apquiltemaclha apancaoc metnaja israelitas, noeltime nasa apquilayo quilaycmasquiscama apancaoc, noeltingya nasa maa. 31 Noelvajanaoc nasa apquiltemaclha maa naysicsa apquilayo quellhip Dios Apyimtalhnamo. Avanjec aptanoncama Dios apquilayoclha quilaycmasquiscama. Apquiltemaclha apancaoc apquilajem apquitquic macmescama quilaycmasquiscama malvatnama talha.
32 Elyiplovcasojo acyovoclhojo singanamaclha Dios siltimnascama quellhip acnim nac jay. Noelayim nasa moc, noelyeycajas nasa moc.
© © Biblia en Enhlet (Lengua Norte) © Paraguayan Bible Society, 1995.
