Amyaa singillhicmoscama acyimnatem ingnenyic
1 Ningiltalhescasquic quellhip actemaclha aplhenamap siclhoc ayenmoclha nic nat, apvisay Apyimnatescama ingnenyic. Ninlingac nat nincoo appayvam. Ningvitac nat nincoo apyovoclhojo. Ningilanoc nat nincoo. Ningilpatningvocmoc nat nincoo. 2 Apvitacpec nat apvaa. Ningvitac nat nincoo. Ninlingasquic nincoo nipyesicsa quellhip apvisay Apyimnatescama ingnenyic. Apnec nic nat apnaclha Ingyapam netin. Apvitacpec nat apvaa. 3 Ninlingasquic nincoo nipyesicsa quellhip actemaclha ningvitay najan ninlingay nat nincoo. Ningiltamjoc eltimjic quellhip lhama ningilpasmeyquiclha nincoo. Acno nincoo ningiltomja ningilpasmeyquiclha Dios Ingyapam najan Apquitca Jesucristo. 4 Ningiltalhescasquic quellhip as amyaa yoyam coyangvomoc acpayjayclha apquilvalhoc.
Dios aptomja ayitsayolhma
5 Ninlingasquic nincoo nipyesicsa quellhip actemaclha singillhicmoscama Jesucristo ninlingay nat nincoo. Eycaso amyaa nac jay: Dios aptomja ayitsayolhma. Am coyitnac apvalhoc yatescamalhma. 6 Ninlhenam sat ancoc nintomja ninpasmeyquiclha Dios naysicsa ningileyvam mocjam yatescamalhma. Ongiltimjic sat ningmovan amyaa mepqui ningyiplovquiscama actomja nasoc anco. 7 Apnec mataa Dios naysicsa ayitsayolhma, ongiltimjic sat ningilpasmeyquiclha nincoo. Dios Apquitca Jesucristo em pac actomja acmascoscama mongilyascalhma.
8 Ninlhenam sat ancoc mepqui mongilyascalhma nincoo, ongilsilhnanalhcac sat nincoo. Am coyitnac actomja nasoc anco ingilvalhoc. 9 Dios aptomja appeyvomo najan mepqui apyeycajascaoc actemaclha aplhanma. Ninlhenquic sat ancoc mongilyascalhma, yejemoc sat emascocsic mongilyascalhma. Jingyinyovsic sat nintemaclha acmasom. 10 Ninlhenam sat ancoc mepqui mongilyascalhma nincoo, ontimesquisic sat apmopvan amyaa Dios. Am comac mocjam ingvalhoc appayvam.
© © Biblia en Enhlet (Lengua Norte) © Paraguayan Bible Society, 1995.
