Eliú apayvam segundo discurso
1-2 Aptomjac nic nat mocjam appayvam Eliú: Quellhip enlhit apquilyascamco, elaylhojo sicpayvam.
3 Ingjaycoc actomja acjalhenmo nimpayvam, acno ingalhcoc acyipconma nintom.
4 Ongilyipconic sat amyaa aclhenamalhca, yoyam colhic acpeyvescasquiclho.
5 Ninlingac lhac Job appayvam: Sicpeyvomo coo, apyascacme eyca Dios.
6 Dios aptomja seyinmelhaycam, apcanem sicsilhnanomalhca ajanco — lhac aptomjac.
7 Quellhip lhac apquilpayvam: Aptemaclha apanco Job, aptomja apquinmelhaycam Dios, malha apyam yingmin aptomjac.
8 Appalhavocmec mataa enlhit apquilmapsomcaa, evjanamcoc apquiltemaclha apancaoc.
9 Apcanem alhta, alhto inyicje nintemaclha ningayo Dios — lhac apquiltomjac quellhip.
10 Quip elaylhojo quellhip apquilyascamco: Copvanquejec mataa Dios apyimtalhnamo etnejic asoc acmasom, copvanquejec esilhnanacpoc apanco Dios.
11 Dios aptomja apyanmongsayclha apquiltemaclha apancaoc apquilmapsomcaa, moclhama aptomjaclha acmasom.
12 Naso, copvanquejec mataa Dios apyimtalhnamo etnejic asoc acmasom, copvanquejec esilhnanacpoc apanco Dios.
13 ¿Co laa ayinyema apmopvan apanco? Apvamlha pac lhama Visqui apyimtalhnamo as nalhpop.
14-15 Apmiyovquic sat ancoc acyimnatem ingnenyaoc, ongilitsapoc sat ningilanalhco, ongiltimiclhac sat mocjam lhopactic.
16 Lhip Job, ¿yitne ya lhquip acyascamco apvalhoc? Ingyeylhojo sat sicpayvam.
17 Copvanquejec Dios apyimtalhnamo etnejic mepeyvomo. ¿Apquinmelham ya lhquip Visqui ingac apyimtalhnamo?
18 Apvanquic Dios ingyanic, ellhenacpoc apquilmapsomcaa apquilviscaa najan mayayo.
19 Mepqui apmasma mataa apquilviscaa najan enlhit mayayo napatavo mepqui apquilnatam. Apyovoclhojo enlhitaoc apquillanomap, ayinyema Dios.
20 Pilapcasquic mataa apquilitsepa enlhit alhtaa. Elmasquingvomoc enlhit apquilimpocjay (apquilinmelhaycam), elvonquepoc sat apquilviscaa apquilyimnatem, mepqui apquilvascapma enlhit.
21 Apyasamcoc Dios yavamlha etnejic enlhit, apyasamcoc apquiltemaclha apancaoc.
22 Colapvanquejec elyilhanmoc apquilmapsomcaa naysicsa yatescamalhma, elvitac sat Dios (elvitacpoc sat maa).
23 Am elhenac Dios lhama acnim, yoyam elyipconacpoc enlhitaoc napato maa.
24 Coymalhquejec elyipconacpoc siclho apquilmopvancaa, elanyacpoc sat poc apquilya'monquiscama apquilantipsomap.
25 Apyasamcoc Dios apquiltemaclha apancaoc, enatovacsic sat mataa lhama alhtaa.
26 Elyicpilhquetacpoc sat apquilmapsomcaa napatavo apyovoclhojo enlhit.
27 Apquillingamcoc alhta inyicje, ayinyema mepqui apquilyiplovquiscama appayvam.
28 Eycaso ayinyema apquilpalhamaycam enlhit mepqui apquilnatam, apquiljalhnoc maa Dios.
29 Am sat ancoc ingyajalhnoc Dios, ¿soc enlhit yoyam ingyinmelham? Apyilhanmec sat ancoc Dios, ¿soc enlhit apmopvan eticlhac mocjam Dios? Colapvanquejec elinmelham enlhitaoc,
30 apquilvita inlhojo aptimesomap apvisqui apmapsom, ayinyema Dios.
31 Yitnec sat ancoc aplhanma enlhit: Dios Visqui ingac, alvatasquic coo sictemaclha ajanco sicmasom.
32 Jelhicmos sat aclhinganyam evalhoc coo, motingyejec sat mocjam moyascalhma coo — intomjac aplhanma.
33 Lhip Job, ¿apquiltamjo ya lhquip Dios eyicpilcojoc sat enlhit apyanmonquiscama apvalhoc, colhic acyanmongseclho aptemaclha siclho? Iyasamcojo sat lhip, jingiltimnas aclhanmaclha apvalhoc lhip.
34 Jeltimnacsic sat quellhip apquilyascamco najan apquiljalhenmo sicpayvam:
35 Mepqui apyascamco nac Job, acyitna appayvam ayinyema acyeyjamelhma apvalhoc.
36 Incaymalhquic ongilyipconic mocjam Job, ayinyema ninlinga appayvam, malha ayanem appayvam (acyeyjamelhma appayvam).
37 Meyascalhma nac Job, aptomja apquinmelhaycam Dios, najan apcatingmoctama Dios, naysicsa aptemaclha apveneycam Dios — sat jeltimnacsic quellhip — nic nat aptomjac Eliú.
© © Biblia en Enhlet (Lengua Norte) © Paraguayan Bible Society, 1995.
