Apquiljalhtipilhquitma vatsam Jordán
1 Alhtooc nic nat intomjac. Apquimpaclhec nic nat mocjam Josué najan aplhamoclhojo enlhitaoc Israel apquicjingvamlha amyip Sitim. Apquilvocmec nic nat vatsam Jordán. Apnatiyanvocmec nic nat yicpintama apquiljalhtipilhquitma vatsam. 2 Invocmec nic nat natqui acnim. Apquilpayesquic nic nat amyaa apquilimja apmamyi nipyesicsa apquicjingvamlha.
3 Apquiltomjac nic nat apquilanya: —Elimpiclhac sat apquilmamyi levitas sacerdotes apquilsovm yamit aysicsic acyitnamaclha Dios appayvam. Elimpiclha sat quellhip lha, elyiplov sat. 4 Elyasamcojoc sat quellhip amay apquilyasaclha. Am elvoyac mocjam quellhip as amay. Noeltajanyiclhojo nasa yamit aysicsic acyitnamaclha Dios appayvam. Apquilmamyi sat apquilsovm, malha un kilometro sat cotnejic apquilvamlha mataa quellhip — nic nat apquiltomjac.
5 Aptomjac nic nat Josué apquilanya: —Ellaniclha sat apquilvalhoc quellhip. Elvitac sat secaseclha actemaclha simpilapquiscama ayinyema Dios — nic nat aptomjac.
6 Aptomjac nic nat Josué apquilanya sacerdotes: —Elimpiclha sat apquilmamyi. Elsov sat yamit aysicsic acyitnamaclha Dios appayvam — nic nat aptomjac.
Apquilquimpaclhec nic nat apquilmamyi. Apquilsovquic nic nat yamit aysicsic acyitnamaclha Dios appayvam.
7 Aptomjac nic nat Dios apcanya Josué: —Pac otnesquisic lhip apyimtalhnamo nipyesicsa aplhamoclhojo enlhitaoc Israel. Elvitac sat actemaclha sictomja siclhalhma lhip, acno actemaclha alhta siclhalhma Moisés. 8 Apquilsovquic mataa yamit aysicsic sacerdotes. Itne sat elanic sacerdotes: Apquiltamac'ac sat ancoc yingmin nicja vatsam Jordán, yejemoc sat eltama quellhip — nic nat aptomjac.
9 Aptomjac nic nat Josué apquilanya enlhitaoc: —Elyipitcangvomjo quellhip. Elaylhojo sat actomjaclha appayvam Dios. 10 Aptomjac nic nat mocjam: Elyasamcojo quellhip. Dios Apyimtalhnamo apna nipyesicsa quellhip. Elantipsic sat yoclhilhma enlhitaoc cananeos apquilvocmo sat quellhip, najan enlhitaoc heteos, najan heveos, najan ferezeos, najan gergeseos, najan amorreos najan jebuseos. 11 Quip elanojo. Comilanic sat amamyi vatsam yamit aysicsic acyitnamaclha Dios appayvam. Eycaso Dios aptomja Apvisqui apyimtalhnamo as nalhpop. 12 Elyacyes sat doce enlhitaoc apquilinyema moclhama apquilmolhama enlhitaoc Israel. 13 Esovc sat sacerdotes yamit aysicsic actomja apanco Dios Apyimtalhnamo as nalhpop. Apquiltamac'ac sat ancoc sacerdotes yingmin vatsam Jordán, coyaptalhcac sat nalhit yingmin. Nitnoc sat coytic yingmin moc nicja ayinyemayaclha yingmin — nic nat aptomjac Josué.
14 Apquilquimpaclhec nic nat mocjam apquicjingvoycamlha enlhitaoc. Apquiltamjoc nic nat eljalhtipilhquetic vatsam Jordán. Apquilmamyi ilhnic nat apquillhingam sacerdotes. Apquilsovquic nic nat yamit aysicsic acyitnamaclha Dios appayvam. 15 Apquiltamac'ac nic nat vatsam apquilsovm yamit aysicsic. Apquilyeysoc nic nat apmancoc apquiltamay yingmin sacerdotes. (Inyejingvocmec nic nat yingmin nicja vatsam. Invocmec nic nat acmamay'aclha.) 16 Nitnoc nic nat inyitnac yingmin moc nicja ayinyemayaclha yingmin. Acpayjo tingma Adam mocjay nic nat inyitnac yingmin. Invocmec nic nat acvisay Saretán. Inyamacac nic nat moc nicja vatsam acvocmo Arabá. Invonquipquic nic nat yingmin acvocmo acvisay Yasic Yingmin (Mar Muerto). Inyaptalhquic nic nat yingmin. Apquiljalhtipilhquitquic nic nat enlhitaoc Israel. Apquililtamjoc nic nat elyacsic tingma Jericó. 17 Apquilsovquic nic nat sacerdotes yamit aysicsic. Apca'nam nic nat naysicsa vatsam acyamac'aclha. Apsovjacpoc nic nat enlhitaoc apquiltamac'a acyamac'aclha nalhit vatsam.
© © Biblia en Enhlet (Lengua Norte) © Paraguayan Bible Society, 1995.
