1 Apquillhenacpec apquilancam apquiltomja Jesucristo apmolhama. Incaymalhquic elavojo mataa apquilviscaa apancaoc. Yoyam colhejec actimesquisa acmasom apvisay Dios Ingyapam. Yoyam najan colhejec actimesquisa acmasom actemaclha singillhicmoscama Cristo. 2 Apquillhenacpec apquilviscaa apquiltomja Jesucristo apmolhama. Incaymalhquic apquilancam elavojo mataa apquilviscaa apancaoc. Ayinyemaclha apquiltomja malha apquilpipma. Dios najan aptomja apquilasicjayo. Incaymalhquic coyangvomoc apquiltamjaycam apquilancam yoyam colhic ayasicjavo. Eycaso illhicmos sat lhip najan iyascasingvom ingilyalhinga.
Actemaclha mongyasquiyam najan actemaclha actamilaycam ingvalhoc
3 Am sat ancoc elhicmosac ingyalhing amyaa acpeyvomo ayinyema Jesucristo Visqui ingac. Am sat ancoc elhicmosac actemaclha yoyam ongilavojo Dios. 4 Eyca as ingyalhing aptomja apyimtalhnesomacpo apanco, am najan eyasamcoc actemaclha amyaa. Avanjec acmayjayo apvalhoc elatingmacpoc poc. Eycaso ayinyema mataa actemaclha ningyasipquiscama najan actemaclha ningilatingmoctamo najan ninlheneycam ingmoc najan ninganem cotnajac nasoc anco. 5 Najan apquilpameteycam acvoncaclho ayinyema enlhit malha acyeyjamelhma. Apquiltomja melyiplovquiscama actomja nasoc anco. Apquilanayquic mataa coyangvomoc apquilnatam ayinyema mongyasquiyam. 6 Naso, acno acyiviy ningilnatam actomja mongyasquiyam mepqui ningvinéycamco. 7 Am ongilsantac nincoo lhama asoc as nalhpop, mongvanquejec najan ongilsaclhac lhama asoc. 8 Yitnec sat ancoc nintom najan ningilantalhnama, incaymalhquic coytic actamilaycam ingvalhoc. 9 Apquiltamjoc sat ancoc enlhit eyeycajasacpojo apquilnatam, esilhnanacpoc sat. Malha acmam quiljanma actomja ayitsepma ingnenyic. Cotsapoc sat apnenyic aclhamoclhojo asoc almasomcaa. Apvajanamquic sat ancoc actemaclha ayitsepma apnenyic, elingamcoc sat acmasca, etvasacpoc sat. 10 Aclhamoclhojo nintemaclha almasomcaa alinyema ayitsepma ingnenyic solyayem. Apquilsilhnanacpec alhta napocja ayinyema ayitsepma apnenyaoc solyayem. Apquilvatsamquic alhta actemaclha melyasquiyam. Apquillingamcoc alhta acmasca naysicsa apquileyvam.
Ningvascapma actemaclha mongyasquiyam, malha ningilnapomalhca
11 Lhip Timoteo, aptomja lhip Dios apquitca. Ingyavojo sat lhip aclhamoclhojo acmasom aclhenomalhca. Itne sat malha ningyinyem. Iyiplovquis actemaclha acpeyvomo najan actemaclha ningayo Dios najan actemaclha mongyasquiyam najan actemaclha ningasicjayo najan actemaclha ningilinlhanyam najan actamilaycam ingvalhoc. 12 Ivascap sat actemaclha mongyasquiyam, malha ningilnapomalhca. Ipatjit sat acyimnatem ingnenyic cotmongvoyam nelha actemaclha Dios apcanama alhta lhip. Aplingasquic alhta lhip actemaclha meyasquiyam napatavo aplhamoclhojo enlhit. 13-14 Actomjac coo siyanya lhip. Aplingac najan sicpayvam Dios aptomja apquillanay nic nat aclhamoclhojo asoc. Aplingac najan Jesucristo aptomja aplingascama apvisay napato Poncio Pilato. Ilyejiclhojo sat lhip apcanyomap etnejic. Notniclha nasa moc actemaclha acvocmo acnim apvoyctamlha Jesucristo Visqui ingac. 15 Comoc sat acnim apvoyctamlha Jesucristo. Jingillhicmocsic sat Dios acma ayayo apvamlha pac lhama. Aptomja apyimtalhnamo apanco, paj lhama apno. Aptomja Apvisqui apanco, paj lhama apno. 16 Aptomja apvamlha pac lhama mengyitsepma. Aptomja apma naysicsa ayitsayolhma, mongvanquejec ontiyaningvomjo. Am nic nat etamacpoc Dios. Paj lhama enlhit apcopvanco etac. Apmopvan innac Dios najan mayayo cotmongvoycamlha nelha. Amén.
17 Ilane sat lhip enlhitaoc acma apquilnatam yoyam melyimtalhnesacpejec apanco. Noelane nasa collhenic apquilvalhoc apquilnatam yoyam colvomsic tap. Ayinyemaclha comascoc sat apquilnatam. Ilane sat collhenic apquilvalhoc Dios aptomja singmescama aclhamoclhojo asoc naysicsa ayaymomalhca asoc. 18 Ilane sat lhip enlhitaoc acma apquilnatam yoyam elimlimojo poc. Yoyam najan ellhamasiclha nintemaclha actamila, malha ninlhamasayclha ningilnatam. 19 Apquilvajanamquic sat ancoc actema nac lha, ellhovamcoc sat asoc acmamnave acvisay acyimnatem ingnenyic cotmongvoycamlha nelha.
Apcanyomap Timoteo
20 Lhip Timoteo. Itamilquis sat lhip actemaclha apcanyomap etnejic ayinyema Dios. Nongyeylhojo nasa apquilpameteycam aptomja apquillhamasomap. Nongyeylhojo nasa apquilpayvam enlhitaoc apquilanem elyasamcoc aptemaclha Dios, apquiltomja apquilmopvan amyaa. 21 Apquilyiplovcasquic alhta napocja actema nac lha. Inmasquingvocmec alhta actemaclha melyasquiyam.
Altamjoc lhip epasmoc Dios. Amén.
© © Biblia en Enhlet (Lengua Norte) © Paraguayan Bible Society, 1995.
