Macmescama Dios acyanmongam ningilsilhnanomalhca
1 Aptomjac nic nat Dios apcanya Moisés: 2 Iltimnas sat lhip israelitas: Apvitacpec sat ancoc enlhit apsilhnanomap mepqui apyascamco aptovascama singanamaclha, etnejic actema nac jay:
3 Apsilhnanacpec sat ancoc apvisqui sacerdote, actomja malha apquilsilhnanomap apyovoclhojo enlhitaoc. Incaymalhquic etingya vayqui ayitcoc inquinavo, cotnejic macmescama Dios mepqui acmasom ayimpejic, acyanmongam meyascalhma. 4 Eyantemiclhac sat napato Dios payjoc apatong carpa apponquinomap. Epquinic sat apmic netin apcatic vayqui, natamin ingyajic sat napato Dios. 5 Natamin elcoc sat ayitcoc ema ac vayqui esaclhac sat congne carpa apponquinomap. 6 Etnejic sat apopjejic congne ema, ingyilhpajac sat siete veces apava apjalhtamomap aplhancoc apponquinomap. 7 Eltilhnamcoc sat ema ayitcoc payjoc inquipetaoc altar apquilvatnamaclha asoc acmasis, acyitnaclha congne carpa apponquinomap. Moc ema ayaymomalhca eyanquinic sat payjoc altar avjac apquilvatnamaclha apnatoscama, acyitnaclha payjoc apatong carpa apponquinomap. 8 Natamin elcoc sat acyovoclhojo acpilhmoc avalhoc vayqui, 9 najan anit alyayem ac najan acpilhmoc acyipitcay alyayem ac, najan acpilhmoc acyipitcayo ajicjic, elcoc sat ajicjic najan alyayem ac. 10 Cotnejic sat acno ningajem vayqui inquinavo macmescama Dios actemaclha singasicjayquiclha. Natamin elvitic sat talha sacerdote as asoc netin altar apquilvatnamaclha holocaustos. 11 Cotlhalhcac sat tap tingma aclhamoclhojo asoc: najan vayqui ayimpejic, najan apitic, najan apcatic, najan amancoc, najan vayqui ayi, 12 acvisay acyovoclhojo vayqui inquinavo, payjoc tap tingma campamento acyitnamaclha tajap. Ingyicjecsic sat alhpongja, natamin elvitic sat talha maa.
13 Apquilsilhnanacpec sat ancoc apyovoclhojo enlhitaoc comunidad mepqui apquilyascamco apnatovascama singanamaclha. 14 Elyasingvomoc sat actemaclha apquilsilhnanomap maa. Incaymalhquic eltingya vayqui ayitcoc inquinavo, cotnejic macmescama Dios acyanmongam melyascalhma. Coyantamalhcac sat payjoc carpa apponquinomap. 15 Elninquinic sat apmeoc apquilvanyam israelitas netin apcatic vayqui, natamin elajic sat maa. 16 Natamin elcoc sat sacerdote apvisqui vayqui ema ac ayitcoc, esaclhac sat congne carpa apponquinomap. 17 Etnejic sat apopjejic congne ema, ingyilhpajac sat siete veces apava apjalhtamomap aplhancoc (apvalhoc) apponquinomap. 18 Eltilhnamcoc sat ema ayitcoc payjoc inquipetaoc altar apquilvatnamaclha, acyitna congne carpa apponquinomap. Moc ema ayaymomalhca eyanquinic sat payjoc altar avjac apquilvatnamaclha holocaustos, acyitna payjoc apatong carpa apponquinomap. 19 Natamin elcoc sat acpilhmoc avalhoc vayqui, elvitic sat talha netin altar apquilvatnamaclha. 20 Cotnejic sat acno ningajem vayqui macmescama Dios acyanmongam melyascalhma. Colhic sat acmascosa melyascalhma apyovoclhojo enlhit, elasicjacpoc sat mocjam. 21 Cotlhalhcac sat tap tingma aclhamoclhojo asoc, acyovoclhojo vayqui, comyetic sat maa, acno siclho vayqui macmescama Dios acyanmongam melyascalhma.
22 Apsilhnanacpec sat ancoc apvisqui apquilmolhama tribu, mepqui apyascamco aptovascama singanamaclha Dios. 23 Eyasingvomoc sat aptemaclha apsilhnanomap apanco. Incaymalhquic etingya yataay apquitcoc apquinavo, mepqui acmasom apyimpejic, cotnejic macmescama Dios acyanmongam meyascalhma. 24 Epquinic sat apmic netin apcatic yataay apquitcoc, ingyajic sat aptoscama payjoc acticyovamaclha apnatoscama elvitic sat talha. Acvisay macmescama Dios acyanmongam meyascalhma. 25 Etnejic sat sacerdote apopjejic congne ema pac ayitcoc, (ingyilhpajac sat) eltilhnamcoc sat inquipetaoc altar apquilvatnamaclha holocaustos. Moc ema pac ayaymomalhca eyanquinic sat payjoc altar avjac apquilvatnamaclha holocaustos. 26 Comyetic sat netin altar acyovoclhojo aptipilhmoc, colhojoc sat malvatnama talha macmescama Dios actemaclha singasicjayquiclha. Colhic sat acmascosa meyascalhma apvisqui apquilmolhama tribu.
27 Apsilhnanacpec sat ancoc enlhit (mepqui apyimtalhnamo), mepqui apyascamco aptovascama singanamaclha Dios. 28 Eyasingvomoc sat aptemaclha apsilhnanomap apanco. Incaymalhquic etingya yataay apquilvana mepqui acmasom apyimpejic, cotnejic sat macmescama Dios acyanmongam meyascalhma. 29 Epquinic sat apmic netin apcatic yataay, ingyajic sat aptoscama payjoc acticyovamaclha apnatoscama elvitic sat talha. 30 Etnejic sat sacerdote apopjejic congne ema pac ayitcoc, eltilhnamcoc sat inquipetaoc altar apquilvatnamaclha holocaustos. Moc ema pac ayaymomalhca eyaninic sat payjoc altar avjac apquilvatnamaclha holocaustos. 31 Comyetic sat netin altar acyovoclhojo aptipilhmoc, colhojoc sat malvatnama talha macmescama Dios actemaclha singasicjayquiclha, Dios apyisponcama. Colhic sat acmascosa meyascalhma enlhit mepqui apyimtalhnamo.
32 Apvanquic as enlhit etingya aptoscama nipquesic apquilvana. Incaymalhquic etnejic nipquesic apquilvana mepqui acmasom apyimpejic, cotnejic sat macmescama Dios acyanmongam meyascalhma. 33 Epquinic sat apmic netin apcatic nipquesic, ingyajic sat aptoscama payjoc acticyovamaclha apnatoscama elvitic sat talha. 34 Etnejic sat sacerdote apopjejic congne ema pac ayitcoc, eltilhnamcoc sat inquipetaoc altar apquilvatnamaclha holocaustos. Moc ema pac ayaymomalhca eyanquinic sat payjoc altar avjac apquilvatnamaclha holocaustos. 35 Comyetic sat netin altar acyovoclhojo aptipilhmoc, colhojoc sat malvatnama talha macmescama Dios actemaclha singasicjayquiclha, Dios apyisponcama. Colhic sat acmascosa meyascalhma enlhit mepqui apyimtalhnamo.
© © Biblia en Enhlet (Lengua Norte) © Paraguayan Bible Society, 1995.
