Amyaa apmayjayoclha Dios aplhanma alhnancoc
1 ¿Apquilanayqui ya quellhip ningiltomja ningilyimtalhnesomalhco inganco? ¿Apquilanayqui ya quellhip ningiljalhanma vaycajac yoyam jingiltalhesquisic quellhip, yoyam najan ongiltalhesquisic nincoo quellhip? 2 Ayanayquic coo paj. Ayinyemaclha quellhip apquiltomja malha vaycajac ningiltalhesquiscama quellhip. Yitnec apquilvalhoc quellhip actalhesomalhca. Apquilvitac sat ancoc poc enlhitaoc, malha apquilyipsatem sat cotnejic apquilvalhoc quellhip. Melquinatsejec sat poc enlhitaoc apquiltemaclha quellhip. 3 Naso, quellhip apquiltomja malha vaycajac ayinyema Cristo ningiltalhesquiscama quellhip. Malha vaycajac cotnaja actalhesomalhca lápiz ayingmenic. Dios Espíritu apanco aptomja aptalhescama. Malha vaycajac cotnaja actalhesomalhca mataymong nicja. Actomja eyca actalhesomalhca apquilvalhoc quellhip.
4 Eycaso actomja mongyasquiyam Dios ayinyema Cristo. 5 Jave nincoo ningmovan inganco yoyam ongillanac lhama asoc. Apvamlha Dios ayinyema ningmovan ongillanac aclhamoclhojo asoc. 6 Apvamlha Dios aptomja singilasinaycam ongilpayecsic amyaa apmayjayoclha Dios aplhanma alhnancoc. Eycaso ayinyema Espíritu apanco Dios. Cotnaja ayinyema ningyiplovquiscama singanamaclha actalhesomalhca nano. Ingillhicmosquic nincoo singanamaclha actalhesomalhca yoyam ongnatovasalhca. Espíritu apanco Dios eyca aptomja apyimnatescama ingnenyaoc.
7 Intalhesalhquic nic nat mataymong nicja singanamaclha ayinyema Dios. Apmesacpec nic nat Moisés. Yiplovcoc nic nat ayapongmatem napaat. Am nic nat colapvancaac enlhitaoc Israel elanojo napaat Moisés. Ayinyemaclha avanjec nic nat ayapongmatem napaat. Inmasquec nic nat mocjam ayapongmatem napaat, ayinyema singillhicmoscama singanamaclha yoyam ongnatovasalhca. 8 Actamila anco amyaa ayinyema Espíritu Santo malha acyiviy ayapongmatem, am colhno ayapongmatem acyiplomo nic nat singanamaclha Moisés. 9 Actamila anco amyaa ayinyema Dios yoyam ongilvomsalhcac tap. Malha acyiviy ayapongmatem, am colhno ayapongmatem ayinyema amyaa yoyam ongnatovasalhca. 10 Actamila anco ayapongmatem ayinyema amyaa alhnancoc, am colhnoc moc ayapongmatem singanamaclha nano. 11 Actamila anco asoc yoyam cotnejic cotmongvoycamlha nelha, am colhnoc asoc actomja acyavataclhojo acyimnatem.
12 Ningilpayesquic mataa tasic amyaa mepqui ningay, ayinyemaclha acyitna aljalhneycam ingvalhoc actamila. 13 Mongilvajanamquejec nincoo mataa aptemaclha ilhnic nat Moisés apcalascama napaat apava. Am nic nat elyasamcoc enlhitaoc Israel acmasca ayapongmatem napaat. 14 Am nic nat elyasamcoc enlhitaoc Israel acvocmo quilhvo nac jay. Inquilyipsatalhquic sat ancoc amyaa apmayjayoclha Dios aplhanma nano, melyasingvomejec mataa. Ayinyemaclha actomja malha alalasomalhca apava apquilvalhoc aplhamoclhojo enlhitaoc Israel. Colapvancaac eljalhyovacsic mataa. Apvamlha Cristo apvanquic eljalhyovacsic ayalomalhca apquilvalhoc yoyam elyasingvomoc. 15 Am elyasingvocmoc mocjam acvocmo quilhvo nac jay. Malha alalasomalhca apquilvalhoc intomjac naysicsa apquilyipsateycaoc singanamaclha Moisés. 16 Apquilyanmoncasquic sat ancoc apquilvalhoc enlhitaoc Israel elyoclhojo Dios Visqui ingac, colcalhcac sat ayalomalhca apquilvalhoc. 17 Apno mataa poc, Dios Visqui ingac najan Espíritu apanco Dios. Apnec sat ancoc Espíritu apanco Dios Visqui ingac, comascoc sat actemaclha ningmomalhca. 18 Nincoo ninlhamoclhojo, am coyitnac ninglalascama ningaat apava. Yitnec mataa ningaat ayitsayolhma apanco Visqui ingac. Malha laneyo intalhamavo intomjac ningaat. Invitalhquic ningaat acyitna ayitsayolhma ayinyema Visqui ingac. Ongilinmalhingvoclhac sat nincoo aptemaclha Cristo. Inyangvocmec mataa ayitsayolhma apanco, inyangvocmec najan ayapongmatem ningaat. Eycaso aptimesquiscama Dios Visqui ingac ayinyema Espíritu apanco.
© © Biblia en Enhlet (Lengua Norte) © Paraguayan Bible Society, 1995.
