Apquilvisay apquillhalhmaa Esdras
1 Apvisqui co Babilonia ilhnic nat Artajerjes. Am nic nat emyavac eltajiclhac apquilaoclha israelitas. Eycaso ilhnic nat vaycajac acnatalhesomalhca apquilvisay moclhama apquilmolhama najan apyapmayc, apquillhalhmaa ilhnic nat Esdras:
2-3 Gersón, Finees aptavin nic nat. Daniel, Itamar aptavin nic nat. Hatúa, Secanías apquitca, David aptavin nic nat. Zacarías, Paros aptavin nic nat. Apquillhalhmaa ilhnic nat, 150 apquilmolhama. 4 Elioenai, Zeraías apquitca, Pahat-moab aptavin nic nat, 200 apquilmolhama. 5 Secanías, Jahaziel apquitca, Zatu aptavin nic nat, 300 apquilmolhama. 6 Ebed, Jonatán apquitca, Adin aptavin nic nat, 50 apquilmolhama. 7 Jesaías, Atalías apquitca, Elam aptavin nic nat, 70 apquilmolhama. 8 Zebadías, Micael apquitca, Sefatías aptavin nic nat, 80 apquilmolhama. 9 Obadías, Jehiel apquitca, Joab aptavin nic nat, 218 apquilmolhama. 10 Selomit, Josifías apquitca, Bani aptavin nic nat, 160 apquilmolhama. 11 Zacarías, Bebai apquitca, Bebai aptavin nic nat, 28 apquilmolhama. 12 Johanán, Hacatán apquitca, Azgad aptavin nic nat, 110 apquilmolhama. 13 Elifelet, Jeiel najan Semaías, Adonicam aptovana, 60 apquilmolhama, alhayi apquilvactamo. 14 Utai najan Zabud, Bigvai aptovana nic nat, 70 apquilmolhama.
Apquiltimesaycam tingma apponquinomap
15 Coo sicvisay Esdras. Ayansaclhec alhta siclhalhmaa payjoc ayinyem yingmin malha vatsam Ahava. Ningnaclhec alhta maa tres acnim. Acvitac coo enlhitaoc najan sacerdotes, am alhta otaac lhama levita. 16 Alyacyesquic alhta coo: Eliezer, Ariel, Semaías, Elnatán, Jarib, Elnatán, Natán, Zacarías najan Mesulam, apquiltomja mayayo. Poc mocjam maestros Joiarib najan Elnatán. 17 Alapajasquic alhta apnaclha Ido, apquimja apmamyi amyip Casifia, colhic sat altimnasa sicpayvam napato Ido najan apnaymacoc apquiltimesaycam tingma apponquinomap. Apnam alhta amyip Casifia. Apquilanyacpec alhta elyantamentac apnaymacoc, yoyam eltimesam Dios tingma pac apponquinomap. 18 Gracias a Dios, apnalantac alhta 18 apquilmolhama, apquilvisay: Serebías enlhit mayayo, levita Mahli aptavin alhta, apquillhalhmaa alhta apquitquic najan apquilyalhing. 19 Apnalantac alhta mocjam veinte apquilmolhama: Hasabías najan Jesaías, Merari aptovana alhta, najan apquitquic najan apquilyalhing.
20 Innec alhta actalhesa apquilvisay 220 apquiltimesaycam tingma apponquinomap apquillhalhmaa alhta. Apvisqui David nic nat apquilyacyescama, najan enlhit mayayo nipyesicsa.
21 Ninganeclhec alhta nicja vatsam Ahava, yoyam ontimjic ningilmalhnancama Dios mepqui nintom. Ningiltamjoc ongilyasingvomoc actemaclha ningilsilhnanomalhca inganco napato Dios. Yoyam ongilmalhnesquisic Dios jingilmeyvoc nalhit amay, najan apyovoclhojo ningilmolhama najan ningilnatam. 22 Am alhta opamejitcasac apvisqui rey, yoyam jingnaliclhac sat singilpilhtetemo nolhing apcapaoc. Acmancaquic alhta jingilmeyvoc nincoo napatavo cotnaja ingmoc nalhit amay. Ninlingasquic alhta amyaa napato apvisqui: Dios Visqui ingac aptomja apmasma enlhitaoc apquilyajayquiclho. Aptovasquic mataa Dios enlhitaoc apquilvatseycaoc najan apquilyamasma — alhta ningiltomjac. 23 Eycaso alhta ningilmalhnacama mepqui nintom, yoyam jingilmeyvoc nalhit amay. Apjalhnoc alhta Dios ningilmalhnancama.
24 Ayansaclhec alhta doce enlhit mayayo nipyesicsa sacerdotes: Erebías, Hasabías najan diez apnaymacoc. 25 Alyipsatquic alhta yoyam elmoc tacja plata najan oro, elpatmaoclhac sat tingma apponquinomap apmaclha Dios. Ayinyema alhta apquilmescama nasa apvisqui rey, najan yatapquilviscaa, najan singilpilhtetemo apquilviscaa najan apyovoclhojo israelitas. 26 Veintiún mil cuatrocientos cincuenta kilos de plata, najan cien apquilmaycam allanomalhca plata, najan tres mil trescientos kilos oro. 27 Veinte ingjaycoc allanomalhca oro actomja ocho kilos. Najan dos apquilmaycam allanomalhca bronce alyinmom anco, malha oro alyinmom.
28 Actomjac alhta siyanya: Quellhip apquilponquinomap napato Dios najan apquilmaycam altomja alponquinomalhca napato Dios. Najan Dios apanco acyovoclhojo plata najan oro, aptomja Visqui apancaoc ningilyeyjamcaa. 29 Eltamilquis sat mataa acvaycmo acnim apquilvoycamlha tingma apponquinomap. Elsavojoc sat apquilmescama quellhip as asoc napatavo apquilimja apmamyi sacerdotes, najan levítas, najan apquilyapmayc apquilmolhama Israel, payjoc tingma Jerusalén — alhta actomjac coo. 30 Apquilpatmaoclhec alhta tingma Jerusalén sacerdotes najan levitas acyovoclhojo plata najan oro najan apquilmaycam, yoyam elmoc tacja maa.
31 Ningyinyovquic alhta vatsam Ahava acnim 12 najan piltin primero, ningmiyaclho tingma Jerusalén. Ingilpasmec alhta Dios Visqui ingac nalhit amay, ningiltajanyaa inlhojo cotnaja ingmoc najan enlhit apquilminyilhma. 32 Ningnaclhec alhta tingma Jerusalén tres acnim, yoyam ongilovsic ningilyampay. 33 Ningilpatmaoclhec alhta plata najan oro najan apquilmaycam, yoyam elmoc tacja congne tingma apponquinomap. Apmec alhta tacja sacerdote Meremot, Urías apquitca. Aplhalhma alhta Eleazar, Finees apquitca, najan maa levitas Jozabad, Josué apquitca, najan Noadías, Binuy apquitca. 34 Apquilmec alhta tacja acyovoclhojo asoc, apsovjoc alhta acnatalhesa maa.
35 Apcaneclhec alhta apyovoclhojo apquilmomap siclho apquilvactama tingma. Apquillanac alhta asoc macmescama Dios acyanmongam melyascalhma. Apquilnapquic alhta 12 vayqui inquilinava, 96 nipquesic apquilinava, 77 nipquesic apquitcoc najan 12 yataay apquilinava. Actomja alhta malha apquilmescama nasa apyovoclhojo israelitas macmescama Dios acyanmongam melyascalhma. Apquilvatnec alhta napato Dios netin apquilvatnamaclha. 36 Apquilsantimcasquic alhta vaycajac ayinyema apvisqui rey. Apquillhocac alhta apquilviscaa as yoclhilhma, payjoc vatsam Éufrates actalhningvamlha acnim. Actamilaycam apquilvalhoc alhta apquilviscaa. Apquilpasmec alhta mataa enlhitaoc Israel najan maa tingma apponquinomap apmaclha Dios.
© © Biblia en Enhlet (Lengua Norte) © Paraguayan Bible Society, 1995.
